我討厭OCAMP,今時今日呢個時代,都唔知去OCAMP 黎做乜。

  所以U 個OCAMP 我索性唔去。但係我要入HALL,HALL 個O CAMP走唔甩。

  好彩有去,就有緣遇到阿LING做我OMATE。

  OCAMP 都有完既一日,係完成組人包括組爸組媽分享完最後感想之後,大家就分別返房。

  充斥住社交疲勞既我打開房門,就見到一個又高大又長頭髮既人坐左係張空床上面。



  我退後一步望一望確定我無入錯房,就心諗呢個應該係我個神秘的ROOMMATE,成個OCAMP期間,我仲心中暗喜以為我會一個人住二人房。

  我閂埋門,見佢野都未執,淨係坐左係度,個拖喼仲係床邊,連我入房都無乜反應。

  啱啱完OCAMP 既我,就好自然咁走過去佢身邊笑容滿面咁講:「你好,我叫何家俊,讀社工,你可以叫我何家俊,或者RICKY。」

  佢緩緩咁抬頭望我,好低沉咁答左一句:「張子樂。」

  我望到佢個樣時心諗,嘩你洗唔洗咁靚仔呀,啲女比你溝晒啦。



  我坐去佢對面坐返係自己張床度,我挨後少少個身,因為我想伸直對腳坐。

  我:「你無黎OCAMP,陣間你執好野我同你出去附近行個圈簡介下啦。」

  佢無出聲。我多口問左句:「做咩咁遲先搬入黎既?」

  樂:「我阿爺過左身。」

  我成個人彈起,即時正襟危坐,成個氣氛突然絶對零度咁,我眼球轉一個圈,佢可能仲係好大打擊咁。



  我好小心咁問:「你同你爺爺好CLOSE架?」

  佢望實左我對眼一陣,我淨係諗緊一個人如何可以長時間咁HOLD住一個皺眉頭既表情呢?會唔會額頭抽筋?

  我未參透到答案前,佢就講:「係……我好細個老豆老母就唔係度,係阿爺阿嫲湊大我既。」

  講完又係沉默,我聽住窗口外面既汽車聲,其至聽到巴士站停車開口既聲,好沉重呀。

  我:「不如講下比我知你爺爺係點既?」

  我問完就感到氣溫稍為上升左少少,同埋佢眉頭終於鬆開左,然後佢一口氣用左大半個鐘頭不斷講佢同佢爺爺帶去玩呀,見家長呀,買藍球比佢,見佢畫畫叻,雖然兩老唔多錢,都買好多正規畫具比佢,仲鼓勵佢讀創意媒體呀咁。

  我都有比反應佢等佢講多啲,不過我頭先建議話帶佢出去行個圈,係因為我肚餓嘞,想順便帶佢出去食宵。

  係佢講到某次生日既蛋糕時,我個肚就大大聲咁「咕~~~~~」左出黎。



  張子樂呆左一呆停左,就打開左少少拖喼既拉鏈,攞左個手板咁大既密實盒出黎,入面係塞滿左曲奇餅。

  佢打開左個盒遞比我,聞到食物香味既我,老實不客氣就攞左兩塊黎食。

  樂:「啲曲奇係自己焗既,原本係諗住應該係介紹自己既時候請人食,唔好意思頭先唔記得左。」

  我:「咁勁既你?焗野我真心覺得好難,唔好計個漿,我連溫度時間都搞唔掂。」我勁唔知醜咁再攞多兩塊塞入口,成口餅咁講:「仲有呢,你點做到呢,同出面啲曲奇唔同,無左個油淋淋既感覺呢?」

 我第一次見到張子樂有好微微既微笑,佢話:「我既獨門秘方黎,你唔好話比人知,首先,有樣野叫希臘乳酪……」

  呢個就係我首次遇到張子樂既情景。
已有 0 人追稿