【請勿當係真人真事】女朋友的AV: 暗黑輔導員

 一個仲夏既深夜，我坐係大學宿舍房入面打緊MMORPG。

  終於齊人今晚打RAID BOSS，我知道我要面對既係一場漫長既磨血戰，為左做好準備，我要先食返兩個杯麵先。

  星期六晚上宿合特別靜，幾乎全部人，包括我ROOMMATE都返晒屋企，加上出面落緊滂沱大雨，係拎住兩個杯麵行去茶水房既途中，我覺得自己有如將間HALL包左場。

  所以去到茶水間發覺有個人坐左係度時，我都幾驚訝。

  「RICKY。」佢望到我企左係門口。



  我答：「FRANK。」

  「我都話叫返我山本一夫啦。」山本堅持其他人咁叫佢，算唔算係某種中二病？

  「OK。」我笑笑口咁行過去想到熱水：「咁我應該叫YAMAMOTO SAN定係中文咁叫山本呢？」

  山本：「哦？你識日文？」

  我苦笑：「我完全唔識，不過以前做過啲電腦FILING，所以好無謂咁識左一堆KANJI 既KUN YOMI，不過我文法果啲完全唔識，所以係無用的。」



  山本：「其實文法唔難，識KUN YOMI 反而係最難果PART。我有N1我好清楚。」

  我放低兩個醞釀中既杯麵係枱面，就坐低問山本：「做咩獨坐茶水間呀？」

  我唔問佢做咩週末唔返屋企，啱啱先入HALL，唔返屋企既人，都唔會係一啲好想人講既原因啦。雖然OCAMP完大家扮到好以FAMILY，其實都只係識左唔夠幾星期既陌生人。

  所以我選擇輕鬆啲問下佢做乜坐係度。

  佢將枱上面既手機，反轉又反轉咁玩左一陣，突然好認真咁問我：「我想問下你，如果我有個好好既女仔，開始左叫拍拖呀咁，但我覺得佢好似想像得我太好，比你會點做？」



  我心諗，又黎啦又黎啦，我又會成為暗黑輔導員啦，不過我都決定左讀社工，倒不如速戰速決：「咁你係刻意咁營造呢個形像，定係你只係有啲過去既野你未同佢講咋？」

  山本既手停低左，全身繃緊，有一刻我覺得佢個眼神， 好似超人要用LASER射穿咗個檯面咁。

  不過佢又放鬆返，再同我講：「讀社工真係唔同啲。即是咁，我又唔係做過啲咩錯事，只係覺得可能好多人唔接受啫。如果同一個人拍拖時佢既過去係唔重要，咁我仲有無必要比佢知？」

  我CHECK下我個杯麵得未，答山本：「過去唔重要，坦白重要丫嘛。拍拖既目的，都係深入認識對方啫。是非對錯都有主觀同客觀既，如果只係主觀果啲，係兩個人之間唔係咁重要既啫。」

  我將其中一個杯麵推比山本，邀請佢同我一齊食。因為兩個人坐係度我自己一個人食兩個真係會好ODD……好彩佢都好似好肚餓。

  我一路食麵一路講：「如果同最親密既人一齊，都唔可以做最到接近既自我，咁係好可悲啫。伴侶係有得揀架嘛，可必揀可悲既呢。」

  山本：「唔唔……蟻往一佬姦。」

 我眨左幾下眼。



  山本吞左一大啖：「你講得好啱。」

  當我地兩個差唔多一齊將個杯麵打到HP0 既時候，阿LING係茶水間門口大叫：「何家俊！」就走左過黎大力拍我膊頭，差啲我成身都係杯麵湯。

  我：「係！」

  LING：「記唔記得聽日要幫我做力士呀？」

  我：「記得……SHARON 要搬過去SINGLE房丫嘛。搬入你房果個……邊個話？」

  LING：「RUBY呀，佢同你個ROOMMATE一樣都係無黎OCAMP。」

  我：「OKOK，不過……」我搓了搓下巴，一臉不懷好意咁：「你仲未講我有咩報酬喎……嘿嘿嘿。」



  LING：「得嘞得嘞，以身相許好唔好？」

  我上下打量咁：「吓？我純情學生黎喎，我唔係諗緊呢啲野架喎。」

  LING扮晒哀求咁：「咁你想要咩丫？」

  我作狀奸笑：「都係啲呼之則來揮之則去，比我鬧時仲要笑咁啦。」

  阿LING突然低頭好認真咁細細聲講：「你比我考慮下啦。」

  我比佢搞到我愕左然，就以笑住咁講：「你考慮好之前，我都係要你請我食餐飯就得啦。」

  阿LING表現一個好明顯係假笑咁：「聽日朝早見啦。」就走左出去。

  當我係度覺得自己好似講錯左啲咩，山本已經處理好左食具，仲同我講：「朋友你SCORE左嘞喎。」



  我：「哦？」

  山本：「快手啲添呀，實現天皇既崇高理想，我真係未見過兩個人係咁夾既。多謝你既杯麵。」佢拍一拍我背脊，就返左房，剩底我一個人係茶水房。

  我都要趕住去打RAID了。