短篇sweet故合集: 男朋友出軌，所以我去咗溝第三者嘅男朋友
只要打開連登感情台，我哋就可以見識到人與人之間嘅關係可以係幾咁脆弱。
「啱啱俾人帽咗，你問我答。」
「條女發現咗我有sp話要分手，點挽回好？」
「成日同男朋友鬧交，好想搵過第二個算...」
每次睇親呢啲post，我都係一笑置之。事關我同我男朋友由高form到而家拍咗三年拖，連鬧交都好少有。即使大家升咗上唔同大學，但仍感情穩定。
所以我點都冇諗過連登感情台叫春post嘅情節會發生喺我身上。
幾個月前，我男朋友突然同我講佢啲friend叫佢一齊幫手搞ocamp。雖然不嬲都有人講ocamp組爸食組女嘅事跡，但佢提出嗰下我完全冇往呢方面諗，因為我信佢唔係一個咁嘅人。
事實證明，係我太天真。
當一個陌生嘅ig account dm send佢同我男朋友嘅親密相出嚟，叫我快啲同我男朋友分手嘅時候，我係拒絕相信嘅，仲好仔細咁望清楚相入面個男仔嘅每一個細節，想說服自己只係人有相似。
最後發現相入面嗰個真係我男朋友。
跟住我block晒我男朋友所有嘢。
佢後尾應該知道咩事，有用唔同方法搵過我，但我冇再理佢。
就係咁，我哋分咗手。
最衰我收到相嗰刻唔記得咗cap圖。如果唔係我就可以send晒俾我個ex成個圈子嘅人。
啱啱分手嗰刻，我都只係覺得好嘔心好嬲，所以我以為自己其實冇咁難過。直到幾日後經過曾經同佢去過嘅地方，我個鼻突然一酸，下一刻眼淚已經自己流落嚟。
原來我唔係唔難過，我只係唔想輸俾佢。
呢一日之後，我嘅情緒不斷喺憎恨同難過之間反覆跳躍，但我努力抑壓住。
一個月後，我喺自己學校門口見到個第三者。
我離遠一眼就望到佢，雖然我之前只係見過佢張相，但就算化咗灰我都認得佢，校門嗰個一定係佢嚟。
佢好似喺度等緊人。我喺冇幾遠嘅地方鬼鬼祟祟咁偷睇佢，想睇吓佢等緊邊個。
過咗冇幾耐，我見到佢露出笑容，跑向某個人，仲撟住對方隻手，好似好親密咁。
嗰個人面向我呢邊，我可以望到佢個樣。
望清楚嗰個人嘅樣之後，我不禁瞪大雙眼。
我識佢。
佢係馮嘉培，同我讀同一個major嘅同學。上年我有同佢一齊做過project，不過唔熟。
唔通佢哋……
遠處嘅兩個人一齊平排行，離開咗學校。
連續幾日，我都見到佢哋兩個一齊。
佢哋關係一定唔尋常。
後來有一晚，我收到陌生嘅ig dm。
「何寶澄，我哋傾吓好唔好。」
「我同佢玩吓㗎咋。」
「我真係愛你㗎。」
「我以後真係唔會再傷害你。原諒我好冇……」
一睇內容我就知係邊個，於是我直接block咗佢。
第二日，我又收到陌生dm。
又嚟？我心諗。
我認自己未放低，但我冇可能因為愛而原諒佢。
我㩒入去，又係一連串嘅message，但今次好似唔係我個仆街ex。
「我想提醒你 你同Michael已經分咗手架喇 你唔好再纏住佢」
「而家我先係佢女朋友」
而家係邊個纏住邊個……
睇嚟佢哋關係出咗啲問題。但我對佢哋之間發生嘅事冇興趣。
不過佢兩個又幾夾喎，一前一後咁send message俾我。
正當我打算照舊block嘅時候，對方又send多句嘢嚟。
「你同佢一齊咁耐 佢一早就厭咗 好心你照下自己咩樣啦阿姐 冇仔會要你架」
我知道我好唔爭氣，但呢句的確狠狠刺痛咗我。
分手嘅呢段時間，我嘅心情首先由嬲變成難過，最後變成咗自我厭棄。我無數次咁諗，係咪真係因為我唔夠吸引，所以佢先會咁輕易去搵其他人？
我同佢一齊之前已經好friend，有少少似兄弟。係咪因為咁，佢覺得我冇女人味，所以先同呢個女仔一齊？
我顫抖住咁block咗呢個account，chat record被delete，但對方講嘅嘢已經深深刻喺我腦海。
究竟佢憑咩咁理所當然去介入其他人感情，仲咁不知廉恥對住我耀武揚威？
我唔甘心。
如果係佢男朋友俾人搶返轉頭，佢係咪仲可以咁開心？
呢一刻，我諗起一個人。
馮嘉培。
如果我當初有cap低佢哋兩個張相，而家就可以直接send俾馮嘉培唔使煩。
唔係，其實就算我有相都唔會咁做。咁樣太便宜第三者喇。
我要佢體會到同我一樣嘅感受。
而機會好快就來臨。
又有一份group project要做。
聽到呢個消息之後，我即刻喺上年開嘅一個group chat入面摷馮嘉培嘅電話出嚟，然後問佢一唔一組。
佢應承咗。
我同佢又另外搵咗兩個人，終於form好一個group，仲傾好咗group meeting嘅時間。不過大家都忙，所以我哋嘅第一次meeting係喺zoom進行。
「Hello聽唔聽到？」入咗zoom之後，我望一望個list。大家都入咗，但冇人出聲。於是我試探性咁打咗聲招呼。
「Hi聽到呀。」一把帶住熟悉感嘅聲音傳嚟，係馮嘉培。
我竟然有啲緊張，可能因為佢係我即將要「攻略」嘅目標。
其他人都打咗招呼。
但接住落嚟，認真討論嘅就只有我同馮嘉培。其他人一係就唔出聲，一係就淨係附和下我哋。
我有種唔太好嘅預感。
「咁下個星期二我哋就學校見啦。」最後我哋勉強約好咗下次meeting嘅時間。
到咗約定好嘅星期二，我嘅預感成真。
其中一個groupmate臨前一日先話嚟唔到，而另一個傾咗冇耐就話要早啲走。
剩返我同馮嘉培面面相覷。
「咁我哋…自己傾住先？」佢有少少遲疑。
「好啦。」我無奈苦笑，其實另外兩個人嚟唔嚟都應該冇乜分別，真係有用心俾意見嘅就只有我同馮嘉培。
過咗三個鐘，我哋已經幫成組人分好埋工。而因為我哋兩個都得閒，所以就留低一齊搵埋可以參考嘅sources。
我有啲驚呢個project最後會得返我哋兩個做嘢。
呢個時候已經六點，我哋決定走人。
執緊嘢嘅時候，我後知後覺咁發現而家係絕佳機會。
「一唔一齊食啲嘢先返屋企？」我鼓起勇氣問。
「好呀，落canteen？」估唔到佢又幾爽快。
落到canteen，我哋各自嗌咗個頹飯。我哋學校canteen選擇真係唔多，嚟嚟去去都係白汁豬扒飯同茄汁雞扒飯嗰類嘢。
「上年我哋好似都有一齊做過project喎。」食緊飯嘅時候，我決定扮下熟，拉近距離。
「係呀，你一搵我我就記得。」好彩佢都記得啫。
其實上年做project嘅時候我哋都有幾句偈傾，但嗰陣我有男朋友，所以會刻意避嫌。做完project之後我哋就冇再聯絡。
喺呢餐飯入面，我哋天南地北咁傾咗好多唔同嘢。一時講吓上年一齊做project時發生嘅嘢，一時又講吓今年上堂啲lecturer。
一餐飯嘅時間過得好快。眨眼間我哋就食完。
其實同佢相處係幾舒服。佢唔可以話好熱情好多嘢講，但一開口總係令人不由自主咁想同佢分享睇法。
有人話，同某個人相處嘅時候，如果你無時無刻都覺得好舒服好自在，即係對方嘅情商同智商都高過你，喺度遷就緊你。
經過過上年嘅相處同呢兩次meeting，我覺得呢句說話真係有啲道理。
真係俾個第三者糟蹋晒。
我哋住嘅地方係相反方向，所以我哋就喺校門口分別。
「星期二見！」我冇忘記自己嘅目的，懶係活潑咁揮一揮手。
但其實我攰到仆街。
我同馮嘉培最後都係毫無意外咁俾人freeride咗。經過多次溝通失敗，我哋唯有死死地氣自己做晒佢，諗住之後再同lecturer report其他groupmate。
雖然兩個人做晒成group嘅project有啲辛苦，但亦因為咁，我哋慢慢發展咗一種革命般嘅情感。
都算係好事嚟嘅。
咁樣更加方便咗我嘅行動。
聽講要吸引一個男仔，第一樣嘢就係要有女人味，而所謂女人味其實就係香水。氣味呢樣嘢好神奇，平時你未必好留意，但佢帶來嘅嘅影響力一啲都唔可以睇小。
小說都有寫啦，女主角嘅髮香/體香往往都係令男主角心動嘅關鍵。啲男主角索一索就會開始心猿意馬。
利申，以上資訊都係我上網睇返嚟嘅。
雖然唔知係咪真係work，但我仍然走咗去買枝香水。去到舖頭先知道香水都分好多種類，果香味花香味木味茶味乜都有。
我最後揀咗枝果香味嘅，應該最安全。
今日一朝早我已經整裝待發，化好妝，亦噴好香水。
我平時同馮嘉培一齊做嘢嘅時候都係坐佢隔離，所以我相信佢應該聞到我嘅香水，但咁樣應該未夠心動。
我上網睇過，氣味應該要配搭埋突然嘅靠近，效果會有加成。
於是做做下project，我藉住問佢嘢嘅機會迅速痴埋佢度，接近手臂貼手臂，但未完全痴埋一齊，保持住似有若無嘅距離。
「我想問呢度呢……」我指住部notebook，努力放軟語氣。
「乞痴！」但我講都未講完，馮嘉培就突然掩口打咗個乞痴。
同我想像中唔同嘅？
「Sorry，今日天氣有啲凍，鼻敏感發作。」佢語帶歉意。
「……」我望住窗外高高掛起嘅冬日暖陽，默默咁同佢拉返開距離。
佢應該係唔聞得咁勁嘅香水，但佢冇講出嚟。
我知道佢驚我尷尬。
睇嚟香水唔可以用喺佢身上。我雖然有啲洩氣，但好快就重整旗鼓。
香水唔得啫，仲有其他方法嘅。
到咗lunchtime，我哋一齊去咗等巴士。
前排我見到有間餐廳好似幾好食，就問馮嘉培一唔一齊食。間餐廳唔係好近學校，要搭幾個站嘅巴士先去到。
好彩佢又唔介意，佢話佢對間嘢都有興趣。
上到巴士上層坐低，我感覺到一絲涼意。雖然而家係冬天，但呢排天氣都幾熱，所以巴士冷氣仍然開足。
我呼一口氣，無意間望咗馮嘉培一眼。佢今日著咗件長袖嘅黑色T-shirt，外面一件深藍色牛仔褸。
呢個時候，我又諗到喇。
曖昧必備動作——借外套！
我其實唔係好凍，但呢一刻為咗達到曖昧嘅目的，我抬起一啲都唔凍嘅雙手放到嘴邊，然後作狀咁對住佢哋哈咗口氣，再搓咗幾下。
馮嘉培本身㩒緊電話，但眼尾睄到我嘅動作，所以抬頭擰咗過嚟。
「你凍呀？」佢問。
你問就啱喇，最驚你唔問。
「係呀，你可唔可以借件……」我盡量扮到好無辜。
但我講都未講完，佢就無啦啦抬起手。
我嘅聲音俾佢嘅動作打斷。
只見佢隻手舉起，觸碰到我哋頭頂嘅冷氣位。然後佢輕輕一扭粒制，啱啱仲源源不絕咁吹向我哋嘅冷風戛然而止。
馮嘉培滿意咁收手。
「而家好啲未呀？」佢轉頭問我，眸中有關切之意。
我唔係要呢啲……
「好…好好多喇……」但我實在冇辦法厚住面皮再扮凍。
「如果你一陣熱就同我講啦，我到時幫你開返。」聽到我嘅回答，佢笑咗笑，然後繼續㩒電話。
雖然我後來keep住好積極咁勾引馮嘉培，但佢嘅表現仍然不慍不火。冇曖昧嘅回應，亦都冇疏遠我，就好似根本唔知我刻意想同佢變親密一樣。
我唔知佢究竟feel唔feel到我嘅企圖。如果feel到，而佢又想接受嘅話，唔係應該表現得熱烈啲咩？如果佢唔想接受，咁應該要疏遠我吖，始終佢有女朋友。
唔通佢真係feel唔到？
究竟係佢情感方面太木獨定係佢手段太高明呢？佢咁嘅表現反而令我更加在意佢嘅反應。
今次呢份project完咗之後，我哋冇好似上年咁斷聯絡，反而維持住咁熟絡。有時一齊上堂嘅話仲會一齊坐，上完堂就一齊食lunch。
呢一日食食吓嘢，佢突然問咗我一個問題。
「點解呢段時間唔見你男朋友嘅？以前都有見過佢嚟接你放學㗎。」
我有啲不知所措。乜原來佢見過我ex㗎？！
唔怪之得佢對我呢段時間嘅勾引手段冇乜反應啦。因為佢以為我仲同個ex一齊緊……
「前排分咗手喇。」我即刻澄清，驚佢誤會我係嗰啲鍾意俾綠帽人戴嘅女仔。
「哦…」馮嘉培露出一個「原來係咁」嘅表情。
我feel到又有一個機會要來臨！
「係佢出軌……」我適時咁低頭，擺出一副想喊又喊唔出嘅表情，意圖營造一個楚楚可憐嘅形象。
果然，佢即刻手足無措咁摷紙巾。「Sorry呀…我只係隨口一問，我唔知……」佢睇落好後悔自己問咗啲咁嘅問題。
然後佢語氣變得更加輕柔：「你唔好喊啦。」
呵，男人！
我都知你哋就係好呢味㗎喇。我一邊有少少得戚咁諗，一邊又要控制自己表情，務求扮演好「慘被背叛嘅無助失戀少女」角色。
呸，乜嘢扮演，我真係俾人背叛咗㗎。
不過講起又奇怪，呢段時間我竟然好少諗起我個ex同個第三者。俾佢咁提一提我先諗起，原來我嘅生命曾經有呢兩個人物存在。
諗到呢度，被背叛嘅回憶又浮返上嚟。憤怒同難過嘅情緒湧上心頭，一時間我眼眶竟然真係有啲濕意。
我唔應該為咗呢對狗男女而喊㗎。
指甲好用力咁拮住大脾，我想以痛楚提醒自己從負面情緒抽離。
正當我仲掙扎緊嘅時候，眼前忽然出現一片白。
馮嘉培遞咗張紙巾過嚟。
我抬頭，眼前只得一片模糊。
呢個時候我先知道原來我嘅眼淚已經喺唔知邊一刻流咗出嚟。
唉，唔應該係咁㗎。我雖然想扮可憐，但都想掌握好分寸。咁樣當住人面喊出嚟，我覺得係羞恥多過可憐。
「Sorry呀，我本身係想堅強啲面對，唔係想喊……」我係特登對佢講呢句說話，但呢啲的確係我嘅真心話。
一方面我想扮得脆弱又堅強，睇下會唔會勾起佢嘅同情，繼而拉近距離；另一方面我係真係覺得喺佢面前喊好柒，想藉此挽回啲面子。
呢個時候，一直唔出聲嘅馮嘉培突然開口。
「何寶澄，你根本唔需要堅強㗎。」
我呆咗咁望住佢。
「應該講sorry嗰個唔係你呀，錯嘅係佢哋兩個，受傷害嗰個係你，你明明完全有資格大喊一場。」佢振振有詞，眼中彷彿有著同我同仇敵愾嘅憤慨。
我俾佢嘅眼神嚇咗一跳。
回想起咁耐以嚟，佢好似係第一個提醒我，叫我唔好咁堅強嘅人。
我低頭唔敢望佢。
如果俾佢知道咗出軌嘅係我男朋友同佢女朋友，而我就係有份隱瞞嘅幫兇，佢會有咩反應……
佢咁敏銳，到時會唔會估到我接近佢嘅目的？
馮嘉培好擔心咁望住我。
呢一刻，我心入面第一次對佢萌生咗一種名為愧疚嘅情感。
我發現，自從嗰次同馮嘉培講咗我被出軌嘅經歷後，佢明顯對我積極咗。之前明明係我主動多，但而家就算唔係一齊上堂，佢都會主動約我一齊食lunch。
平時啲行為都比以前曖昧咗少少。
呢日喺間大房上堂，冷氣開得有啲勁。
我着咗外套，但都覺得凍。
呢一堂一坐就要坐兩個鐘。越坐得耐，我隻手就凍到越僵硬，寫字都開始有啲艱難。
我對住隻手狂呵氣。今次唔係扮，係真係凍。
呢個時候，坐我隔離嘅馮嘉培遞咗包嘢俾我。我下意識捉住，隨即一陣溫熱被我掌心包裹住。
係暖包嚟。
我有啲驚訝，抬頭望佢，但佢已經低頭若無其事咁寫緊notes。
佢表情咁平淡，唔知點解搞到我更加唔好意思添。我唯有努力驅趕走內心嘅奇怪諗法，專心寫notes。
另一隻手一直緊緊捉住個暖包。
過咗一陣之後，lecturer放break，我抄埋淨低嗰幾隻字就放低咗筆。
我呼一口氣抬頭，原來馮嘉培一早就寫完notes，唔知由幾時開始就一直托住頭望緊我。
我俾佢望到個心一跳。
「做…做咩呀？」
咪口吃！我同自己講。又係你話要勾引人嘅，而家喺度怕咩醜？！
馮嘉培冇出聲，但就突然伸手掂咗掂我隻手。
「唔凍喇喎。」佢講咗句，然後又迅速抽返走自己隻手。
？？
「我去廁所。」我都未反應得切，佢就輕飄飄咁掉低呢句說話起身走咗。
唔通聽到我被背叛嘅故事後，佢真係動咗惻隱之心？
但係佢自己都有女朋友㗎喎，如果佢真係同情我，唔係更應該遠離我？
我承認我好心動。始終我溝咗佢咁耐，難得終於有回應。
但同時，好矛盾地，我又好希望佢其實唔係回應緊我。
我唔希望佢係一個會背叛女朋友嘅人。
呢個念頭一升起，我都覺得自己痴咗線。我搞咁多嘢唔係就係想佢鍾意我咋咩？我一開始嘅目的就係由第三者手上搶佢過嚟，等個女仔體會一下我嘅心情。
呢段時間嘅畫面浮現喺腦海。我哋一齊趕project嘅畫面、一齊食頹飯嘅畫面、一齊上堂嘅畫面……喺我唔察覺嘅情況下，馮嘉培填滿咗我本應因為失戀而染上陰霾嘅生活。
乜原來失戀後嘅時間都可以過得咁快㗎？乜原來失戀嘅日子只係咁㗎咋？
乜原來，我咁快就已經從失戀嘅痛苦中復原喇？
上一次喊，更多係因為被背叛而生出嘅失望同自我懷疑。但我個ex同個第三者對我嚟講就只係好耐好耐以前出現過嘅路人。
我而家忘記咗當初要報復嘅決心，甚至有啲後悔自己嘅行為。
因為我真係鍾意咗馮嘉培。
我終於明白到咩叫自討苦吃。
呢個時候，馮嘉培返咗嚟。
「做咩咁嘅樣呀？」佢好敏銳咁察覺到我嘅情緒。
「冇嘢呀。」我將所有嘅悶悶不樂吞落肚。
佢亦冇再問落去。
「我聽日唔同你食lunch喇，我同我表妹食。」落堂之後，馮嘉培一邊執嘢一邊開口。
「乜你同你表妹咁friend㗎咩？」我隨口一問。其實我覺得佢係約咗女朋友。
表妹呢個藉口實在太爛，仲衰過話約咗朋友。
「係呀，我哋由細玩到大㗎，佢時不時都會過嚟搵我。」佢一邊講，一邊show佢同一大班親戚嘅合照俾我睇。
講到似層層咁，唔通佢一陣真係約咗表妹？
「嗱，呢個咪係佢囉。」佢指住其中一個女仔。
我定睛一望，卻見到熟悉嘅面容。
呢個咪第三者？？？？
「呢個…呢個係你表妹？」我嚇到爭啲走音。
「係呀，」佢唔為意我嘅反常，「遲啲都可以介紹你識。」
我冇回應，因為我心入面早已掀起驚濤駭浪。
我回想返之前喺校門見到佢哋兩個嘅畫面。
即係我一直以嚟都溝緊第三者嘅表哥？！
食lunch嘅時候，我一直諗住呢件事。其實都冇乜嘢，只係佢哋嘅關係對我嚟講太具衝擊力喇，我點都估唔到佢哋係表兄妹而唔係男女朋友。
食完lunch，我匆匆同馮嘉培告別。
老實講，喺震驚過後，我反而有種好彩嘅感覺。
好彩佢唔係人哋男朋友……
困擾我多日嘅問題喺呢一刻迎刃而解。
唯一嘅問題係，佢同佢表妹咁close，會唔會最後都發現我嘅目的呢？如果佢表妹知道我喺佢身邊，應該唔會講啲咩好說話，分分鐘屈返我轉頭都仲得。
我覺得，都係我自己搵機會同佢坦白比較好。
我想親口認真咁同佢解釋，如果佢原諒我，咁我就順勢同佢表白！
聽日佢約咗佢表妹，咁我後日先講啦。
但到咗當日，我都係講唔出口。
尤其係見到馮嘉培呢一日一反常態咁沉默之後。
佢係咪知道咗啲嘢？我心急如焚，想即刻坦白但又唔敢。
最後我哋各懷心事咁分別。但返到屋企，我已經後悔自己咁鵪鶉。
再咁拖落去真係唔掂。
我一衝動，就直接打咗俾馮嘉培。
直到佢聽電話嘅時候，我其實都未諗好要點講。
「Er…Er…你夜晚可唔可以出嚟呀？有啲嘢想講。」我緊張得滯，講咗呢句。
何寶澄你喺度講咩？！無啦啦約人出嚟，佢會唔會覺得好奇怪……
「好呀。」但佢竟然應承咗。「我過嚟你嗰邊吖。」
我迷迷糊糊咁就收咗線，而家唯有等待今晚來臨。
餘下嘅時間我都喺忐忑中度過。
夜幕低垂，我同馮嘉培並排行到海旁。
昏黃嘅街燈稀疏咁排列，偶爾有一兩盞壞壞哋嘅，吃力咁透支僅餘嘅一絲光芒。路上偶爾有跑步嘅人經過，「踏踏」嘅腳步聲由遠至近，隨即又遂漸淡出。
世界彷彿只剩低我哋兩個人。
好長嘅一段時間入面，我都只係低頭沉默咁行。馮嘉培冇催促我開口，只係不急不緩咁跟喺我隔離。
身旁一側樹影班駁，另一側係大海。
我哋停下腳步，轉而挨住向海嘅欄杆企。大海遠處嘅盡頭隱約有一點點嘅光，閃下閃下咁。
眼前平靜嘅海面間或隨著微風輕拂而悄悄波動著。
「我…..」呢一刻，我哋幾乎係同時開口。
「你講先啦。」我毫不猶豫咁讓咗個機會俾佢。有咗呢個插曲，我好唔容易鼓起嘅勇氣又被海風吹散。
感受到我嘅怯懦，佢順勢開口。
「我知道我表妹就係你同你個ex之間嘅第三者。」佢好直接就講咗出嚟，印證我嘅猜測。
果然，佢真係已經知道咗。咁佢會唔會估到我咁積極接近佢嘅目的？
我低頭不語，強行嚥下內心嘅苦澀。
「前日你見到我表妹張相之後，表情就好奇怪，所以我琴日就問我表妹係咪識你，然後就知道咗你哋嘅關係。」佢語氣好平靜，我冇辦法從中窺探佢呢一刻嘅情緒。
佢繼續講落去。
「你係咪因為咁樣，所以唔想再同我來往？」
我驚愕咁抬頭望佢。
「吓？」我脫口而出。
點解佢嘅關注點同我諗嘅唔同？
「唔係咁㗎……」我一急，連忙澄清。
唔知係咪我錯覺，我講完呢句嗰刻就feel到佢眼睛一亮，表情亦明顯放鬆落嚟。
「既然係咁，可唔可以話俾我聽你煩惱緊啲咩？」佢語氣柔和。
可能係佢神情太溫柔，令我產生咗一種「無論我做咗啲咩佢都唔會介意」嘅幻覺，我掙扎咗幾秒後就將成件事完完整整咁講出嚟。
向馮嘉培坦白之後，我有種講唔出嘅輕鬆感，而佢沉默咗好耐。
我緊張咁偷偷打量佢。最衰我哋呢個位置太暗，佢嘅輪廓若隱若現，我一時之間都分辨唔到佢嘅表情究竟有冇憤怒或者失望。
「所以你一開始接近我係以為我係佢男朋友？想利用我？」過咗一陣，佢望住面前漆黑一片嘅海開口問。
我點頭。我冇辦法否認，我一開始的確想利用佢。
「咁而家呢？」佢突然擰轉頭望向我。
我終於望清楚佢嘅表情。我見到佢臉上有種期待嘅神情，雙眼緊緊注視住我。
我忽然面紅耳赤，講唔出任何說話。
雖然一早諗好要表白，但到咗最後關頭我竟然唔敢開口。
「你而家對我係咩感覺？」一向溫和嘅馮嘉培，呢一刻居然步步緊逼。
視線仍然唔放過我。
「我……」係時候講出口㗎喇，係時候話俾佢聽，雖然一開始動機不純，但而家我對佢嘅感情係真嘅。
「我…我鍾意你……」我躲避佢嘅視線，聲音細如蚊蚋。
但我知道佢聽到。
因為下一秒我就落入佢嘅懷抱。
「咁就夠㗎喇。」佢攬實我，輕輕咁摸咗摸我嘅頭。
佢身上清爽嘅氣味撲鼻而來，我幾乎要沉淪喺其中。
我緊緊捉住佢件衫，好驚呢個只係幻覺。
佢一邊摸我頭，一邊輕聲咁同我講佢對我嘅感覺，同我講佢有幾驚我會因為佢表妹而唔再同佢來往。
「之後冇必要我都唔會同佢聯絡喇。」馮嘉培嘅聲音悶悶不樂，我知道佢係心痛我。
最後我哋攬咗好耐好耐。
耐到足以令我相信，無論之後發生咩事，佢都會咁樣攬實我。