呢排成日發春夢: 七

食完麵，林景昊竟然真係打開電視睇Netflix。我坐係佢懷內，而佢攬住我睇得好開心。
我全程心不在焉。
佢係咪真係會表白？係嘅話會係幾時？我放空目光，皺住眉頭苦苦思索。
林景昊察覺我嘅異常。
「做咩呀。」佢身體向前傾，微微低頭錫咗我塊面一啖，然後就維持住呢個姿勢望實我，視線一刻都冇離開過。
我冇辦法同佢解釋，因為我唔知佢究竟係咪同我一樣。
我唯有轉向佢，急切咁錫向佢嘴唇，毫無章法咁親吻，想藉此宣洩我內心嘅不安。
佢有一下反應唔切，但好快就反客為主，緊緊咁將我攬實喺佢懷內，肆意掠奪。
我哋kiss咗好耐先分開。
「入房？」佢輕喘住氣撫摸我個頭，喺我耳邊廝磨。


我輕輕點頭。
房間內，林景昊一邊親吻住我，一邊將我壓喺床上。纏綿又帶住熱氣嘅吻鋪天蓋地咁落下來，令我招架不住。我攬住佢，吃力咁回應。
呢一刻，腦中彷彿有「叮」一聲響起。
就係而家。
眼前嘅一切勾起我嘅熟悉感，同我發過嘅夢重疊。而家嘅場景正正就係夢中佢表白嘅場景。
一時間我竟然有少少呆滯，分唔清而家究竟係現實，定只係又一埸夢。
錫錫吓，佢停咗落嚟，將頭埋咗喺我頸部。
「不如我哋……」佢嘅聲音好似埋咗喺枕頭入面咁，模糊不清。但我已經聽到。
我嘅心不禁提起。
「都係冇嘢喇。」但佢只係講到一半就安靜咗落嚟，然後繼續錫我嘅其他部位。


同個夢唔同嘅？我第一個反應係困惑。
但好快我就冇辦法再思考咁多，因為佢已經強勢咁侵入我。
「呼…」完事後，林景昊喘住氣繼續壓喺我身上，戀戀不捨咁錫我個嘴。
佢真係單純當我炮友？
呢一刻我決定搏一鋪，無論係我會錯意定點都好，我都想喺呢一刻為我哋嘅關係作一個了斷 。
係好衝動，但我哋呢段時間嘅相處根本唔似單純嘅炮友。
我知道自己沉咗船，如果佢冇一樣嘅感覺，我哋就此完結。
唔好再拖喇。我同自己講。我冇辦法再抑壓住自己嘅真實感情，一邊同佢親暱相處，一邊要說服自己對方只係當我炮友，任由呢段關係錯落去。
「林景昊。」我深吸一口氣，避開佢嘅親吻。
「嗯？」佢有少少不滿，仍然意猶未盡咁一下下錫我塊面同頸。


「不如我哋一齊。」
佢嘅動作有一刻僵硬，然後我對上佢錯愕嘅眼神。
「你認真？」安靜咗一陣之後，佢開口。
「係。」終於講到出口。我鬆一口氣，有種解脫嘅快感。
然後我望住佢，默默等待最後審判。
漫長嘅靜默過後，佢終於開口。
「好呀。」佢含笑望住我，眼睛內閃爍住點點星光。
趁住我仲處於呆滯，又錫咗我個嘴一下。「唔准反悔。」