唔知大家有冇喺愛情小說/電視劇見過以下呢句對白:
「我俾____萬你,離開我個仔。」通常呢句說話都係由男主角阿媽講出嚟嘅,搭配一個不可一世嘅表情。
然後女主角就會心裏一沉,晶瑩剔透嘅眼淚喺眼眶啷下啷下,佢悲傷又帶點倔強咁話自己唔要錢,係真心鍾意男主角。
呀,幾咁淒美嘅愛情故事⋯⋯

但呢一刻,聽到呢句經典對白從朱皓言阿媽口中吐出,我內心只有一陣狂喜。
佢尖酸刻薄嘅說話對呢刻嘅我嚟講簡直係天籟之音。

成件事要由四個月前開始講起。



四個月前嘅一個晚上,我如常咁係我做嘢嗰間餐廳度放工。間餐廳只係小本經營,有老闆、兩個廚師、計埋我在內有兩個侍應。
由於我住得最近,我經常自告奮勇留低幫手執嘢。久而久之,老闆就將餐廳鎖匙交俾我,等我執完嘢可以幫佢鎖門,亦有另外計返錢俾我。
呢一晚本應係個平常嘅一晚,如果唔計喺餐廳門口瞓咗喺度嘅陌生男人嘅話。
其實所謂瞓咗喺門口,只係瞓咗喺餐廳外面張長凳度。

一開始我只係當佢醉酒佬。
行出餐廳,我警惕咁一邊望住佢一邊快速鎖門。
防人之心不可無,萬一佢突然推我入餐廳度唔知做啲乜,到時就真係叫天不應叫地不靈。
等我鎖好門擰轉頭嘅時候,個男人仍然瞓咗喺度,郁都冇郁過。
呢個時候我先至認真打量佢。佢身上着咗件深藍色嘅裇衫,手上仲帶咗隻錶,睇落唔係cheap嘢嚟。



我嘅直覺話俾我聽有啲唔對路。我唔認為一個咁樣衣著嘅人會飲醉酒瞓喺人哋餐廳門口嘅長凳度。而且我聞唔到酒味。
一個猜測馬上淨現喺我心頭。我心跳如鼓擂,手心漸漸沁出汗。
唔通⋯⋯佢俾人棄屍喺度?我係咪應該報警?
但下一秒我就否定咗自己嘅猜測。
邊有人會棄屍喺度咁張揚㗎。

諗到個男人唔係死人,我個心安定咗落嚟,試探性咁行近個男人。
喺我就嚟行到個男人側邊時,佢突然郁咗下。



我嚇一嚇,停咗喺原地,然後探頭一望。
個男人又冇咗反應。
我深呼吸,為自己壯咗壯膽後,就行前一步伸手拍一拍佢。
「先生?」
個男人睫毛郁咗郁,緩緩擘大眼。佢迷惘嘅眼神對上我嘅臉龐,然後坐咗起身。
「你冇嘢吖嘛?」我出於好意問咗句。
個男人個樣眉清目秀,可能唔係壞人,但我內心仍然有所防範。
我已經偷偷喺電話㩒定999,個男人一有咩衣郁我就會即刻打電話,同埋轉身跑走。
「咕——」一陣響亮嘅聲音由男人嘅肚入面傳出嚟,打破咗我所有假設。

我仲未反應得切發生咩事。
然後,個男人除咗佢手上隻錶落嚟遞俾我。
我下意識伸手接過。
「你有冇嘢食?」佢把聲聽落有少少虛弱。



我低頭望住佢俾我隻錶。頭先離得太遠睇唔清楚,而家近距離仔細咁望先發現原來呢隻係名牌嚟。
雖然唔知係咪假嘢嚟。
但望到佢咁慘嘅樣,斷估應該唔係啲咩歹徒,可能真係遇到困難需要幫忙。
於是,我重新打開餐廳嘅門。
「入嚟啦。」我對仍然坐喺長凳上嘅男人招手。
唉,鬼叫我善良咩。
我小心翼翼咁將手中嘅名牌錶妥善收好。