(故事純屬虛構,如有雷同,實屬巧合)


今日係情人節,有女嘅就陪女,無女嘅毒撚就只能孤零零一個,望住街上嘅情侶攬攬錫錫、嘻嘻哈哈。

Mike就係其中一條可憐嘅毒撚。

佢坐喺巴士上層,前面有一對年輕男女。

二人喺度打情罵俏,講埋啲勁肉麻嘅說話,搞到佢起曬雞皮,冷震都打左幾個。





「BB豬,我好鐘意你份禮物呀!」「我都好鐘意你嗰份啫BB!」「我愛你BB豬…」

Mike越聽越頂唔順,拎部iPod Classic出嚟,插上耳筒,決定用音樂阻隔呢啲「雜音」。

眾所周知,iPod Classic呢款產品早於2014年停產,只不過喺2022年嘅今日,Mike依然都仲用緊。

耳仔塞住耳筒,唔洗再聽到嗰啲情侶間嘅肉麻對話,佢嘅心情堂當好返少少。

過左一陣,有一個正到沊一聲嘅靚女上左車,即刻吸引曬全車男人嘅視線,連前面條仔都冒住俾女朋友發現嘅風險,忍唔住要偷望。





咁條女係好掂,個樣靚得嚟,副偈仲好正。

佢身上著住一件黑色緊身衫,身材玲瓏浮凸,瘦得嚟有波又有籮,腳下踩住一對高踭長boot,令本身修長嘅雙腿顯得更有曲線,整體上成個造型就同《復仇者聯盟》入面嘅「黑寡婦」有七分相似。

佢上到嚟巴士上層,就坐喺Mike斜對面嘅位置。

Mike望住條女望到眼都唔眨,由頭scan到落腳,再由對腳scan返上心口同個樣。

而由於角度問題,佢只睇得清對方嘅側面,不過都已足以令佢扯曬旗。





就咁從側面睇,條女有啲似周子瑜,絕對係靚女一名。

Mike全程𥄫個唔停之餘,仲靜雞雞玩偷拍,但就影得一張咁大把,因為佢淆底,驚再影落去會俾人周到。

隨住其他乘客陸陸續續落車,巴士上層慢慢剩返Mike同條女兩個人。

Mike下面支旗keep住扯,腦入面更忍唔住開始幻想,「癡漢列車」以及「秘密搜查官」嘅AV情節。

跟住再過多個站,個靚女都起身落左車。

唔知係因為情人節太寂寞,定係條女實在太正,Mike居然有一個比偷拍更猥瑣嘅念頭。

佢左望右望,再三確認全層得返自己一個之後,就慢慢行過去啱先條女坐過嘅位置,想聞一聞櫈上面殘留嘅體香。





然而,當佢行到去個位嘅時候,卻發現櫈上面,遺留左一部iPod Classic。

佢估唔到今時今日竟然仲有人同自己一樣,仍然用緊呢款舊機。

隨即佢打消猥瑣嘅念頭,急急腳想行落車,諗住還返部機俾人。

可惜遲左一步,車門經已關上,巴士亦慢慢駛走。

透過車窗回頭望去,個女仔好開心咁買緊雞蛋仔,似乎無察覺自己跌左嘢。

Mike喺下個站落車,行返轉頭揾個女仔。

但當佢返到去上一站落車嘅地方,對方已經唔喺度,無左蹤影。

枉佢一心諗住還返部機俾人,然後好似啲電影橋段咁,同對方開展一段浪漫嘅邂逅,繼而就剝衫上床啪啪啪。





啲毒撚除左好鹹濕之外,FF嘅能力都好強,一諗就諗到去扑嘢。

只但係,有一樣嘢佢無預示到,就係呢部執到嘅「iPod Classic」,將會為佢嘅人生帶嚟巨變。