穿越時空，冒充平行世界嘅另一個自己，再去呃佢條女上床: （6）

「汪汪！汪！」

隻狗好大隻，個樣好惡，追住Mike猛咁吠，驚到佢走夾唔抖。

與此同時，間屋嘅男主人，亦即係嗰個生得好似Mike嘅男人，著返條褲，行出房門「捉賊」。

Mike跑落樓想揾門口走佬，過程中卻唔小心叉錯腳碌落樓梯，手手腳腳撞到好痛。

痛感極之強烈，令佢意識到呢一刻，原來並唔係發夢！





不過係咪發夢都好，家下都顧唔到咁多，最緊要走人先，陣間俾人捉到就大獲。

佢拿拿臨起返身，到處搜索出口，期間一直聽到身後有狗吠聲，仲有一把同自己十分相似嘅男人聲。

好在間屋夠大，有地方可以周圍走、周圍匿，跟住全屋嘅燈突然開著曬。

咁啱呢個時候Mike揾到後門離開，一行出去就係後花園。

佢誓估唔到間屋大到連後花園都有。





「砰！」

下一秒，令佢更估唔到嘅係，間屋嘅男主人居然一邊追出嚟，一邊向佢開槍。

好彩射歪左，否則條命肯定凍過水。

呢下槍聲嚇到Mike無鞋挽屐走，唔理三七廿一跳過圍欄，搏曬老命狂奔。

佢一路係咁跑，全速跑左大約五分鐘，回頭見到無人追嚟，先至慢慢停低。





啱啱真係好險，走遲一步隨時都俾人射瓜。

佢抖順條氣，個心慢慢開始定落黎，點不知忽然又有人嗌佢個名。

「Hey Mike！」

四個踩住滑板嘅街童，路過向佢揮手打招呼。

除左嚇一跳，佢都覺得好奇怪，明明唔識佢地，點解對方會知自己個名？

然而佢無深究太多，因為依家其實都好夜，佢好鬼眼訓，淨係好想返屋企訓教。

於是佢就揾下附近，有無交通工具搭到返屋企。

而四周圍嘅環境俾佢嘅感覺，一啲都唔似香港。





原因之一係啲建築物起得好矮，街道兩旁係一棟棟獨立屋，絕大部分都係得兩三層高，兼有獨立車庫同前院後院。

二嚟就係泊喺街邊嘅私家車，全都唔係掛香港車牌，搞到Mike有啲懷疑自己係咪出左國。

行左一段路，佢依然搵唔到巴士站，連的士都唔見有，而且啲商鋪全部閂曬門，想問個路都唔得。 後尾佢行行下，盲盅盅嚟到一塊空曠嘅草地。

草地有路燈照明，喺中央位置放置左一塊石碑。

Mike行近一睇，發現塊石碑竟然係宋皇臺石？！

第一眼佢以為自己眼花，再睇多兩眼，塊石上面真係從右至左，寫住「宋皇臺」三個字。

佢喺土瓜灣住左咁多年，成日會經過宋皇臺公園，所以一定唔會認錯，呢塊一定係宋皇臺石！





喺石碑旁邊亦都立左塊牌，中英對照介紹舊石嘅歷史資料。

一下子，佢嘅思緒變得混亂…

呢度明明只係一塊草地，望嚟望去都唔似宋皇臺公園，呢附近更加唔似土瓜灣，咁呢舊石有乜理由會喺度出現？

奇怪…真係好奇怪…