第二日天一光,Mike就俾油站嘅車聲嘈醒。

佢擘大眼,伸一伸懶腰,訓醒第一件事梗係試多次部機開唔開到。

而答案係:開唔到。

過左一陣,有架黑色benz駛入油站。

Mike見到另一個自己行落車入油。





日光之下,令佢可以睇得再清楚一啲。

講樣,佢兩個嘅眼耳口鼻完全倒模一樣。

論打扮,「另一個Mike」就企理好多,個頭 gel得四四正正,上身一件深藍色polo shirt,下身襯左條卡其色chino搭白色波鞋。

佢呢個係去打高爾夫球嘅裝束。

喺Mike眼中,另一個自己全身上下都散發住一股成功人士嘅氣質。





而事實上,對方又的確係成功人士,唔單止住洋樓養番狗,仲有靚車揸,又有鬼妹砌。

Mike回味琴晚偷睇人地扑嘢嘅畫面,忍唔住又扯起支旗。

「另一個Mike」一邊入油,一邊同其他司機分享琴日有賊闖入佢屋企嘅事,全程都係講英文,但係就無留意到,琴日個「賊仔」就坐喺油站便利店門口一角。

心虛嘅Mike靜靜雞匿入去便利店,免得被發現,順便買啲嘢食醫下肚。

佢喺貨架拎左支水同三文治,行到收銀處俾錢嗰陣,先發現自己身上一個仙都無。





既然無錢俾,咁唯有擺返低啲嘢,離開舖頭。

一踏出門口,佢就見到另一個自己啱啱入完油,揸車走左。

面對一個陌生嘅環境,褲袋入面無錢,個肚餓到打鼓,又唔知點先可以返屋企,Mike為此感到非常惆悵。

佢歎一口氣,再試下部機開唔開到,結果都係一樣,點撻都係撻唔著。

跟住佢就開始諗,會唔會要喺特定嘅時間,或者特定嘅地方先能夠啟動部機?

假如係後者,咁莫非要返回原地,亦即係另一個自己間屋先開到機?

喺唔排除任何可能性嘅情況下,Mike決定返去琴晚嗰間屋。

由於人生路不熟,因此佢只能憑印象,慢慢摸索返間屋嘅位置。





琴晚夜媽媽睇唔清,家下日光日白再望真啲呢個地方,真係一啲都唔似土瓜灣。

既無密密麻麻嘅唐樓,又無老化嘅街道,相反絕大部分嘅建築物,都係比較矮同疏落,而且街上面嘅路牌、招牌幾乎都係寫英文。

路過郵局、消防局門口,見外面都掛住美國國旗,令人有種去左美國嘅感覺。

「滴噠滴噠—」

陰沉嘅天空忽然落雨。

Mike加快找尋嘅腳步,喺佢印象中,嗰度應該係一間兩層高嘅獨立屋。

問題就係呢附近咁多間屋,差唔多間間都係雙層設計,佢認唔到邊間打邊間。





「滴噠滴噠滴噠—」

雨勢越嚟越大,佢要用手遮住兩邊褲袋,唔俾啲雨淋濕部時空裝置同iPod。

「汪!」

就喺呢個時候,前面傳嚟一下狗吠聲。

喺大約五十米外嘅一間屋,嗰度有隻金毛狗正由前院跑返入屋避雨。

就算唔認得隻狗,Mike都認到把聲。

隻狗睇怕就係琴晚追住佢嚟吠嘅嗰隻惡犬。

換言之,前面嗰間屋就係佢要搵嘅地方。





佢冒住雨用最快嘅速度跑過去。

間屋係典型嘅北美獨立大屋,有前院、後花園,仲有獨立車庫。

Mike唔敢喺正門口入,只能選擇擒過圍欄,再兜去後花園,偷偷地由後門入屋。

成個過程都算順利,無俾人發現。