主人房喺二樓,琴晚Mike就係喺門口出面,偷睇另一個自己同個鬼妹搞嘢。

主人房入面好闊落,有一張好大嘅雙人床,兩個衣櫃同一張梳妝檯,墻上仲掛住一副結婚相。

Mike估唔到另一個自己係同個鬼妹結左婚。

相入面,個鬼妹著住件低胸白色婚紗,條友一見到有波嚹,下面就有反應,心諗如果自己都咁本事,屌到鬼妹就好。

除左結婚照之外,梳妝檯上都貼有其他親密嘅合照。





其中一張貼紙相上面,有一行「MikeLoveJenny4ver」嘅字樣。

照咁睇嚟,Jenny應該就係鬼妹個名。

「乞嚏!」Mike忍唔住又打個乞嚏。

佢行去打開曬兩個衣櫃嚟揾衫。

兩個衣櫃,一個係擺男裝衫,另一個係放女裝衫。





Mike求其執左件男裝T-shirt同短褲笠上身,隨即就摷埋女裝衫嘅衣櫃,心思思想揾Jenny啲底衫底褲,拎嚟j一j。

點不知摷到半路,聽到Jenny喺外面嗌佢,嚇到佢即刻閂返個衣櫃,心急得滯仲唔小心夾親手指。

「Honey,I need your help!」

同層嘅廁所塞左,搞到沖唔到廁,所以Jenny就嚟揾「老公」幫手。

Mike唔知頭唔知路,跟對方入廁所睇下咩情況。





入到去佢見到馬桶塞左,Jenny就問佢點算。

咁嘅情況,當然係要揾嘢通一通,只不過佢左望右望,都唔見有廁所泵。

Jenny見佢周圍望,似乎揾緊嘢咁,就問:「Are you looking for the plunger ?」

Mike唔知「plunger」係廁所泵嘅英文,只係大概估到個意思,點一點頭回答「yes」。

Jenny諗左幾秒後,表示個廁所泵可能喺樓下車庫。

車庫嘅英文係「garage」,Mike load左六、七秒先意會到。

Mike嘅讀書成績麻麻,英文頂多得副學士程度,只係平時會睇下Netflix、煲下美劇咁,識得嘅英文只能勉強夠佢應付。

佢行落樓下,到車庫揾個泵。





行到半路佢突然醒覺,呢個時候照計係要諗辦法,返去自己屋企,而唔係幫人通廁所。

跟手佢拎返部時空裝置出嚟,研究點樣先開得返著部機。

唔通係無電?但係佢揾勻都唔見部機有叉電口。

「!」

突然間,Mike聽到啲雜聲。

好奇心促使下,佢穿過走廊,順住啲聲推開一道門。

而門後其實就係與車庫相連。





車庫裡面除左中間有個停車位,兩邊靠墻位置放置有兩個木架,架上面放有一啲維修用嘅工具,另外地下就放滿一箱箱雜物。

Mike一行入去,遇著另一個自己泊緊架車入嚟。

佢匿都匿唔切,直接就俾對方發現左。

「另一個Mike」落車見到Mike,嚇左一跳:「Who…who the hell are you!」

「Er…I…I am you…」 Mike解釋。

呢一刻,「另一個Mike」簡直唔敢相信自己對眼,心諗呢個世界上,居然有另一個同自己生得一模一樣嘅人?!

「Tell me who the fuck are you!」佢情緒激動咁捉住Mike嘅衫領,猛問對方係咩人,同埋點解會同自己咁似樣。

「你唔好郁手郁腳先,」 Mike轉唔切channel,直接用廣東話,「我咪講左,我就係你,你就係我,明唔明?」





「你…你講乜嘢?乜嘢你係我…我係你?」原來「另一個Mike」都識廣東話。

「好囉,你識得聽廣東話就好啦,其實成個情況有啲複雜,我都唔知點解釋,不如你放手先好無?」

「Damn!我…你…我唔理你係咩人…總之你唔可以broke in my house!」「另一個Mike」嘅廣東話有啲甩咳,發音有少少唔鹹唔淡。

「我其實唔係有心闖入你屋企...」

「So get the fuck out!」

「另一個Mike」發難,掹住Mike嘅衣領,夾硬想扯對方出門口。

「你放手先,我有腳,我自己識走。」Mike撥開對方隻手,殊不知對方以為自己要反抗,繼而動武。