完事以後,二人攤喺床上休息。

一口氣出左三獲,Mike幾乎虛脫咁滯,索曬大氣,Jenny就挨喺佢心口,一臉滿足。

「咕…」

過左一陣,Mike個肚發出咕咕聲。

由朝早到依家接近下晝兩點,佢都無食過嘢,兼且做完咁激烈嘅運動,個肚梗係餓。





Jenny問佢係咪肚餓,佢爽快咁回答「Yes」。

於是對方著返衫,落去樓下,到廚房煮啲嘢俾佢食。

光脫脫嘅Mike大字形咁攤喺床上,回味緊啱先扑嘢嘅快活,心諗如果可以一直冒充另一個自己,以後都有得砌大波番鬼妹,咁就好啦…

只不過幻想歸幻想,現實歸現實,講到尾呢個始終都唔係屬於自己嘅時空,佢其實都知自己冒充唔到幾耐,遲早都會人拆穿。

所以無論點都好,佢一定要諗辦法返去屬於自己嘅屋企。





講起要返屋企,佢睄一睄隔籬左右,發現嗰兩部機唔見左!

佢嚇到仆街,一部係佢珍而重之嘅iPod Classic,另一部係時光機,兩部機對佢嚟講都係好重要。

好在佢好快醒起兩部機放左喺褲袋,而條褲就喺廁所。

佢衝去廁所,見到啲衫褲底橫放曬喺地下。

摷一摷褲袋,果然就揾得返嗰兩部機。





佢當堂鬆一口氣,一邊慶幸,一邊責怪自己精蟲上腦,連咁重要嘅嘢都幾乎瀨低左。

呢個時候,佢嘗試再撻著部時空裝置,可惜都係無任何反應。

著返好衫褲,佢將兩部機袋返好,並提醒自己之後去邊都要隨身帶住。

由廁所返出走廊,佢經過一間半掩門嘅房間。

從門嚹望入去,間房嘅佈置似係書房。

實際上,二樓唔算好大,就得一個廁所同兩間房。

Mike輕輕推開門,行入去一探究竟。

「嘩頂!」





殊不知,一打開門就俾隻人咁高嘅「異形」嚇親。

呢度講嘅「異形」,就真係電影《異形》入面嗰隻核突嘢。

雖則只係公仔,但係像真度非常高,好鬼得人驚。

Mike戰戰兢兢咁推開隻公仔,慢慢行入去。

書房都幾大,四邊墻貼滿電影海報,全部都係關於外星人嘅電影,譬如係《E.T.外星人》、《異形》、《黑超特警組》等等。

另外,間房有三排書架,一排主要擺放與設計相關嘅書,其餘兩排就擺滿外星人題材嘅書籍以及漫畫。

照咁睇嚟,「另一個Mike」係一個外星人愛好者,就連書檯上都放左唔少外星人漫畫同電影嘅周邊模型。





Mike坐落去書檯前嘅大班椅度,隨手翻閱檯上一本打開左嘅書,裡面啲圖片鬼唔馬六,估計又係啲講外星人嘅書,佢對此無乜興趣,揭左兩頁就無睇。

之後佢摷下啲櫃桶,無意中揾到個卡片盒。

佢多手拎張卡片出嚟望下,上面寫住「Mike Cheung」,職位就係「designer」。

呢度嘅「Mike Cheung」好明顯就係指「另一個Mike」,designer就即係設計師。

再望多兩眼,發現公司名係Speedo。

Speedo係一間國際級嘅泳衣品牌公司,Mike真估唔到呢一個時空嘅自己係咁把炮,喺間國際企業度做設計師,怪唔之得有得住大屋,娶鬼妹。

佢隨手放低張卡片,起身再行去書架𥄫下,揾下「另一個Mike」有無收埋啲鹹書之類嘅嘢。

佢求其抽本漫畫睇下,過程中有一張攝喺書本之間嘅明信片跌左出嚟。





明信片背後印住世界地圖,然而仔細一睇,地圖並唔係標示World Map,而寫住USA Map,上面有幾行英文註解,當中有一半生字Mike都睇唔明。

左睇右睇,呢個分明係世界地圖,因乜解究標示成美國地圖?佢對此感到疑惑。

「叩叩!」

Jenny托住煮好嘅食物,敲門行入嚟。

佢煮左一兜意粉配沙律,份量都唔少。

Mike將檯面本書移去一邊,擺個餐喺中間,坐定定享用。

Jenny唔阻住佢,送完餐就落去樓下做家務。





食意粉嗰陣,Mike唔小心左彈左啲茄汁去檯面嗰本書度,不過佢一於少理,繼續大啖大啖填飽個肚。