喺紅磡、土瓜灣徘徊左兩日嘅子瑜,坐喺茶記食緊火腿蛋治。

「嘟—嘟—嘟—」

放喺檯面嘅偵測機器忽然有反應,顯示時空裝置轉移返左嚟呢個時空。

佢快快脆埋單,出發去揾自己部機。

按照偵測儀器指示,好快佢就嚟到之前同一棟唐樓樓下。





「嘟嘟嘟—嘟嘟嘟—」

探測信號越嚟越強烈。

子瑜趁有住客打開大閘行出嚟,便乘機鼠入唐樓。

上到四樓一個單位門前,信號極度強烈,佢相信部時空裝置應該就喺單位裡面。

「叮噹!叮噹!」





佢㩒左兩下門鐘。

十分鐘前從另一個時空返嚟嘅Mike,聽到門鐘聲,慢慢行去開門。

見到一個身穿黑色緊身衫,貌似周子瑜嘅女仔企喺門口,佢問:「你…你揾邊個?」

「係咪你拎左我部時光機?」子瑜單刀直入。

Mike即時醒起眼前呢個女人,係上個禮拜喺巴士見過嘅嗰個索女,部時空裝置就係佢跌嘅。





「Er…你…你講咩話?」Mike詐傻扮懵,扮聽唔明對方講乜。

「上個禮拜我唔小心跌左部時光機,外殼係銀灰色,size就半隻手掌咁大,根據我手上部探測儀器顯示,我嗰部時光機就係喺呢度!係咪你攞左?快啲交返出嚟!」

Mike心諗今次死火,俾對方發現左部機喺自己度。

條友仲未玩夠,仲想穿越多幾次,因此唔想咁快交返部機出嚟。

「Er…唔好意思…我諗你揾錯人…」講完,Mike馬上就閂返屋企道門。

「喂!我未講完呀…」

Mike拿拿臨收埋部時空裝置,揾勻全屋睇下邊個位夠隱蔽。

「叮噹!叮噹!叮噹!」子瑜猛㩒門鐘。





Mike將部機收埋喺電視櫃頂,跟住先發現自己傻左,人地話左有部探測儀器,即係無論收埋喺邊都偵測得到。

於是佢立即就諗,有咩嘢係可以干擾到信號?

「砰!砰!」子瑜拍門叫Mike出嚟,「你再唔出嚟,咪怪我唔客氣呀!」

Mike腦筋急轉彎,行入廚房,擸左一卷錫紙,厚厚咁包住部時空裝置。

「嘟嘟嘟…嘟…嘟…」

偵測機器嘅信號無端端變得非常之唔穩定。

「咦?點解會咁嘅!」子瑜覺得好奇怪。





Mike包好部機後,隔住道門大嗌:「小姐,你揾錯地方呀!走啦!」

信號突然斷斷續續,變得非常微弱。

子瑜感到慌張,因為佢從來都未遇過咁嘅情況,心諗唔通部偵測機器壞左?

然而,直覺卻話佢聽,屋入面個男人好有可疑。

Mike透過門上嘅防盜眼,「裝」緊對方究竟走左未。

子瑜知道咁樣棟喺人地屋企門口唔係辦法,之後佢考慮左一陣,決定再睇定啲先。

Mike見到對方離開,鬆左一口氣。

家陣差唔多係中午十二點,個肚餓到咕咕聲,佢換件衫落樓去食嘢。





佢驚條女會趁佢唔喺屋企,就上嚟爆佢格,所以佢帶埋嗰部包到冚嘅時空裝置出街。

落到樓,佢打開銀包,入面只得五十蚊,佢要到附近嘅ATM㩒錢先。