望住Lulu,此時此刻,Mike醒起「英勇Mike」交俾佢嘅嗰條手繩。

對方臨死前,千叮萬囑自己一定要交俾Lulu,於是Mike喺褲袋um出條手繩,遞俾Lulu:「呢條手繩係另一個…」

Mike本來想講係「另一個自己」送嘅,不過又驚長篇大論解釋一次自己嘅身份後,對方又唔信,所以改口就話:「…係我送俾你嘅生日禮物。」

Lulu接過手繩,呆左一秒,跟住露出笑容:「條手繩係你親手織架?」

「Er…係呀…」





「我好鐘意呀,多謝你!」Lulu扣上手繩後,錫左Mike面珠一啖。

Mike本來塊面已經紅卜卜,咁樣再俾Lulu錫一啖,就直頭紅到成個蘋果咁。

「好啦,我諗我都係落去幫婆婆晾衫先,多謝你份禮物!」講完,Lulu行落去樓下幫老婦人晾衫。

Mike塊面仲係好紅,依然回味緊俾Lulu錫嗰下嘅感覺。

「嘩嘩嘩!你條友都夠衰格囉,冒充另一個自己喺度抽水?」子瑜頭先想行上嚟二樓去廁所,咁啱喺樓梯遇到Lulu錫Mike嘅一幕





「咁…咁講左真正嘅身份出嚟,對方又未必信,咁咪唔講住囉,我無心想抽水架!」Mike為自己辯護。

「解釋即係掩飾,你係鹹濕就認左佢啦!」

「唉唔好講呢啲,你頭先話咩時空裂縫,到底係咩嚟架?同埋點解你無時光機,都穿越到嚟呢度?」Mike轉移話題。

「正正就係因為有時空裂縫,令我去到時空中轉站,再轉移嚟到呢個時空。」子瑜答。

「即係話,只要揾到時空裂縫,咁就能夠返去我原來嘅時空?」





「你可以咁理解。」

「咁仲等咩呀?拿拿臨快啲揾下,呢頭有無時空裂縫啦?」

「揾過啦,無呀!」

「咁…咁點算?」Mike問。

「所有時空裂縫都係隨機出現,只能睇彩數,無得強求。」

子瑜無奈歎氣,然後指責Mike:「其實講到尾,一日最衰都係你,無好好保護部時光機,搞到我家下困住喺,呢個到處都係外星人嘅時空,挽下手條命仔隨時凍過水!」

「呢啲你無得怪我架喎,嗰陣喺碼頭如果你無拎支槍出嚟,又話拉又話盛,咁我都唔會驚到㩒掣啦。」

「你放心,之前你肆意穿越其他時空嗰筆數,以後會慢慢同你計。」子瑜回應。





「話曬我地依家坐埋同一條船,大家應該前事不計,好好合作喎。」

「我洗咩同你合作,部探測儀器就係我手上,只要信號一響,咁我就知時空裂縫喺邊度,根本唔需要你幫手。」

「你唔係想瀨低我下話?」

「啱先你抽水抽得咁開心,咪繼續留喺度囉~」

「好啦好啦,我認衰仔,我亂用你部時光機係我唔啱,係我無好好保護部時光機,你大人有大量,唔好咁計較啦。」

為左返屋企,Mike立即認低威,子瑜就話:「睇下你氹唔氹得我開心,我心情好或者就預埋你囉!哈哈!」