穿越時空，冒充平行世界嘅另一個自己，再去呃佢條女上床: （59）

以為咁就解決，點知過左三秒，隻雞再一次復活，而且身形再增大左，已經變到同Mike平排咁高。

敵人識得復活，仲越變越大隻，Mike有啲無計可施：「可惡…點解會咁架…」

「Mike！羽毛呀！」

呢個時候，旁觀嘅阿榮發現到橋妙：「隻雞每次被消滅，都會甩一條羽毛出嚟，之後條羽毛會幻化變返做隻雞，所以你要消滅埋條羽毛先得。」

Mike一邊躲避敵人嘅攻擊，一邊聽取阿榮嘅建議。





隻雞變到成個人咁高，體型同速度都提升左唔少，反守為攻，追住Mike嚟啄。

原本鋒利嘅雞嘴只有匕首咁大，目前變到牛肉刀咁款，劈落嚟隨時手都斷。

面對敵人窮追不捨嘅攻擊，Mike只顧左閃右避，揾唔到機會反擊。

閃電技同旋風技都屬於遠攻型，敵人殺到埋身好難出招，因此睇嚟要轉用近攻。

Mike躲避對方攻擊嘅同時，腦中回憶起琴晚練成嘅第三招。





下個瞬間，兩個拳頭鋼化成為堅硬無比嘅鐵拳，連隨一個轉身右勾拳，毆落個雞頭度。

「嘭！」鐵拳嘅超級重擊，狠狠打到半個雞頭裂開。

接住Mike再嚟一下直拳，直接毆到雞頭爆開。

無左個頭，隻雞當堂就粉碎。

正如阿榮所講，隻雞被消滅後，就會跌一條羽毛出嚟。





呢刻，半空之中漂浮住一條紫色羽毛。

三秒之內，Mike要消除埋條羽毛，先可真正殲滅敵人。

佢用左兩秒瞄準，出招又用多一點五秒，結果就miss左。

每一次出招，Mike都要喺腦入面，諗返起嗰個出招畫面，然後先開到技。

之前得一招，個腦淨係諗嗰一招就得，家下有三招，佢要load多陣先load到個畫面，咁就搞到慢左出招.

飄喺半空嘅紫色羽毛漸漸幻變成，一隻超過兩米咁高嘅巨型公雞。

弊傢伙！敵人越變越大隻，再唔趁早解決，挽下手隨時會變到成座樓咁高。

重生嘅公雞先發制人，瞄住Mike瘋狂啄擊。





十五分鐘前俾佢啄一下，最多就係流血，家陣啄一下係會無命。

敵人猛咁衝埋嚟攻擊，Mike被逼只能採用近戰。

鋼化鐵拳嘅威力比想象中驚人，只要打得中，咁就一定有損傷。

Mike擊中公雞個身幾下，令到對方皮開肉綻，啲毛甩曬咁滯，可惜偏偏未擊中要害。

眼見敵人頑強不滅，阿榮決定幫拖。

佢借左支伸縮棍，然後衝埋去，同Mike一齊同隻巨型公雞埋身肉搏。

伸縮棍扑埋去可以話接近零傷害，但就分散到敵人嘅注意力。





阿榮跳起扑濕個雞冠，隻雞嬲嬲地，擰轉身想轉移攻擊目標。

就趁敵人轉身嗰下，Mike用盡全力一跳，向住雞頭飛撲埋去，揮出重拳。

呢下攻擊非常成功，一下打爆左雞頭，隻雞亦隨之灰飛煙滅。

今次阿榮醒目，踩住條甩出嚟嘅羽毛，唔俾佢飛走，Mike狠狠再補多鎚，打爛條毛，咁先至徹底消滅隻怪物。