穿越時空，冒充平行世界嘅另一個自己，再去呃佢條女上床: （63）

四手怪無腳，就咁用其中兩隻手嚟行路。

「救命！救命呀！」

兩男三女一邊逃跑，一邊嗌救命。

其中一個男仔被地下嘅坑棘到，成個人仆低。

四手怪嘅手原來可以變形，一隻手化作長長尖錐，毫不留情，從後插死個男仔。





見到同伴被殺，另一個男仔憤怒得喪失理智，執起路邊一舊石頭，衝去攻擊四手怪：「仆街！我同你死過！」

以卵擊石，最後得到同一下場，就係被怪物用尖錐監生捅死。

Mike遲左一步，救唔到兩個男仔。

「雷公！劈友！除世害！」

佢召喚出多道閃電，攻擊四手怪。





同一時候，三個受驚逃命嘅女仔跑到嚟，匿喺Mike嘅背後。

高壓閃電成功命中，四手怪嘅膊頭同手臂都被電到蓉蓉爛爛。

只但係下一秒，所有傷口居然自動痊愈。

四手怪單手抽起路邊一條燈柱，跟手好似掟標槍咁，向住Mike佢地掟碌柱出去。

「啊！！！」三個女仔嚇到尖叫。





Mike保持冷靜，一拳將撲面而嚟嘅燈柱粉碎。

「嘩！好犀利啊！」三個女仔拍手歡呼。

佢地三人都係後生靚女，身材仲唔錯。

不過家陣唔係𥄫女嘅時候，Mike叫三條女企埋一邊，自己就上前對付隻怪物。

四手怪體型龐大，全身漆黑，無頭無頸，只有一個長方形狀嘅軀體，同埋心口三條白色間條。

遠睇真係似一個鞋盒。

Mike輪流用電同風攻擊，可惜結果都同頭先一樣。

就算打到隻怪四隻手爛曬，但啲傷口都會自動復原。





之後Mike埋身近戰，展示「鐵拳之道」，瘋狂連續出拳。

都已經打到隻嘢個身穿曬窿，隻嘢唔冧低不得止，啲窿窿嚹喇好快自然愈合。

「可惡！爆裂旋…」Mike想再用旋風攻擊，殊不知突然絞肚痛。

佢彎腰掩住個肚，感覺痛到仿佛俾刀割咁。

四手怪就趁佢病攞佢命，先用個身撞到Mike跌落地下，隨即嗰隻化成尖錐嘅手，準備要出致命一擊。

「爆裂旋風！」Mike忍痛出招，旋風射破尖錐，跟住拿拿臨起返身。

個肚好痛好痛，好想去屙屎，咁嘅情況下，佢好難專心戰鬥。





「弊啦，Mike好似好唔掂！」

阿榮想出去幫手，但占士就拉住佢話：「出面好危險，我地要信阿Mike，佢一定搞得點架！」

「唔係喎，條友掩住個肚，唔知係受左傷定係有咩事。」子瑜探頭出窗。

占士就話：「無事嘅，阿Mike之前都打得贏，今次一定都無問題。」

事實就係Mike絞腸痧，連企都企唔穩，更唔好話打敗隻怪物。

四手怪步步進擊，Mike就左閃右避。

「加油啊！唔好輸啊！」嗰三個被救嘅女仔匿喺一邊，幫Mike打氣。

一隻怪已經夠難對付，之後仲嚟多五隻灰色矮仔外星人。





呢款外星人之前都見過，體型細細粒，心口有盞菱形藍燈，而且雙腳唔落地，漂浮住咁行。

呢幾個矮仔外星人無參戰，只係企左喺遠處。

由於佢地無眼無鼻，所以分辨唔到係咪喺度觀戰。

阿榮眼見Mike形勢不利，決定出手：「大家坐穩！」

「阿榮，你想做咩啊？」占士扶住前面嘅椅背。

阿榮踩恆油，揸住架開蓬吉普車加速向前。

Mike肚痛到腳軟，閃避嗰陣唔小心跌低。





四手怪鋒利嘅長錐，作勢要捅過去。

好彩就喺呢個時候，阿榮開住架吉普車衝埋嚟，撞開四手怪。

「Mike！你無受傷呀嘛！」阿榮行落車，扶起Mike。

「我…我個肚好痛…」

四手怪只係被撞開到幾米遠，佢好快企返起身，並且還擊。

尖銳嘅長錐刺埋嚟，阿榮用佢手掌阻擋。

佢嗰隻係機械手，因此就算被刺中，都唔會流血。

敵人未肯收手，將另一隻手都變埋尖錐，加強戰鬥力。

危急之際，Mike忍住肚痛，拼盡全力揮出一擊：「爆裂劈友拳！」

鋼鐵拳頭附帶住雷電同旋風，狠狠咁重擊喺四手怪身上。

呢一拳係Mike結合左三招而成，威力非同凡響，將對手打到去幾十米之外。

「Yeah！好嘢！」車上嘅子瑜咬住朱古力叫好。

另外嗰三個被救嘅女仔都拍手歡呼，仲稱讚Mike好型好犀利。

雖然四手怪被打走，但Mike知道隻嘢應該未死。

遠處，一直無出手嘅矮仔外星人，亦慢慢咁飄走左。