穿越時空，冒充平行世界嘅另一個自己，再去呃佢條女上床: （70）

「啲啲！啲啲！」

子瑜手上嘅偵測裝置，響起兩下連續聲響。

「咩事？係咪時空裂縫消失左？」Mike問。

「原定今日我要返總部匯報工作情況，但我無去到，所以嗰邊就send左封警告信俾我，叫我唔好擅離職守。」

「總部？即係話你聯絡到其他人，叫佢地直接嚟接我地走？」Mike問。





子瑜搖搖頭：「呢個係系統自動send過嚟嘅訊息，只能接收無得回覆，平時嘅話，我要靠部時光機聯絡總部嘅人，可惜就係因為你嘅保護不力，搞到部機爛左，我想揾幫手都揾唔到！」

「哈...唔緊要啦…好在我地依家都揾到時空裂縫走佬。」

二人行左超過一半路程，時間仲剩唔夠半個鐘。

途中遇到三隻八爪魚怪擋路，Mike果斷出手，一一解決左。

「嘟—嘟—嘟—」





隨住二人逐漸接近，偵測信號亦都越嚟越強。

佢地一路由土瓜灣走嚟到黃埔。

呢度嘅黃埔唔係住宅區，無黃埔花園，只有一間間近海嘅造船廠。

喺Mike成長嘅時空，黃埔船塢早已係過去式，而呢個時空，黃埔船業依然蓬勃，時空裂縫就係喺其中一間造船廠入面。

佢兩個跟住信號行入去。





間廠起碼有兩個標準足球場咁大，樓底好高，裡面除左有一排排半製成嘅船隻，亦有各種機器同工具。

好明顯嘅係，呢度有被破壞過嘅痕跡，地下有唔少著住工人制服嘅發臭屍體。

「我地係咪就到啦？」Mike問子瑜。

「嗯，應該就係呢度架啦。」

偵測裝置上嘅信號越嚟越強，但光點就越嚟越微弱，代表時空裂縫就快要消失。

「砰！！！」

忽然之間，頭頂傳出一下爆裂聲。

二人抬頭望去，一隻識飛嘅鯊魚咬住一個手揸激光長鞭嘅黑袍怪，撞破天花板墜落地下。





地球嘅鯊魚係唔會有翼，黑袍怪雖然望落係人形，但頭部卻只係一團紅光。

呢兩隻好明顯就係外星怪物。

佢地唔知咩事，居然喺度狗咬狗骨，互相廝殺。

Mike同子瑜唔想被波及，拿拿臨調頭走，點知兩隻怪物原來call左馬。

分別有十幾隻飛天鯊魚同黑袍怪，衝左入嚟幫拖。

船廠一瞬間變左兩邊怪物嘅戰場，雙方大戰互片。

兇殘嘅鯊魚滿天飛，黑袍怪啲長鞭就四圍fing，拳腳無眼，Mike同子瑜一邊躲避，一邊搜索時空裂縫。





「揾到啦，就喺嗰度！」子瑜指住船廠遠處左手邊一個角落頭，墻上有道散發住微光嘅裂縫。

目標就喺眼前，只要穿過裂縫就能返回自己嘅時空。

「爆裂劈友拳！」

Mike一路出招，打走擋住條路嘅飛天鯊魚、黑袍怪，同子瑜一步一步行去時空裂縫度。

旋風、雷電、鐵拳三招加埋嘅威力的確好勁，幾乎都係一招就打走怪物。

眼見仲有唔夠二十米就到，突然間有條激光長鞭繞住子瑜嘅左腳，跟住佢就俾條鞭fing上半空。

旁邊一個黑袍人好似西部牛仔咁，喺頭頂狂fing手上嘅激光鞭。

被條鞭綁住嘅子瑜三百六十度咁，喺半空度旋轉，無法脫身。





Mike要出招對付隻怪，拯救子瑜。

然而都未出到招，一隻飛天鯊魚就捷足先登，擘大口，從側邊突襲嗰個黑袍人，導致到敵人甩手，成條鞭連隨子瑜fing走左。

船廠三面環海，子瑜凌空撞爆船廠嘅玻璃窗，成個人好似炮彈咁飛到去離岸海中心。

時空裂縫近在咫尺，所發出嘅光已經非常微弱。

Mike相信裂縫好快就會消失，問題係佢唔可以咁衰仔丟低子瑜，自已一個人走佬。

佢清走擋路嘅怪物，擒出窗，喺岸邊見到子瑜喺海裡呼救：「救命啊！我唔識游水！」

Mike諗都唔諗就剝左面衫、面褲，一躍跳落海，用最快嘅速度游過去。





子瑜好快失去意識，個人向下沉緊。

好彩呢個時候，Mike及時游到，並且將對方慢慢咁救返上岸邊。