穿越時空，冒充平行世界嘅另一個自己，再去呃佢條女上床: （72）

「砰！砰！轟隆！砰！Boom！」

激烈嘅打鬥聲不斷傳出，仲要一下響過一下。

子瑜俾呢啲聲嚇親，不自覺咁捉住Mike隻手。

雖然Mike破左處，但卻係第一次咁樣俾女仔捉住隻手。

對方隻手好白滑，拖住都幾好feel。





十分鐘之後，外面嘅打鬥聲慢慢停止。

呢個時候，子瑜個心定返啲，先察覺自己拖住Mike，拿拿臨縮開隻手：「你條友又借啲意抽我水！」

「下？係你主動拖埋嚟架喎。」

「咪亂講喎，我邊有主動拖你？」

「算啦算啦，我地唔好講呢啲，講返正經嘢，依家想走又走唔到，接下嚟點算好呀？」Mike問。





「唉…」子瑜深深歎氣，呢個問題佢都唔知點答。

二人沉默左片刻，大家都無出聲。

「乞嚏！」

過左一陣，佢兩個同時間打左聲乞嚏。

啱先大家跌落海，頭髮同個身都濕曬，啲風一吹埋嚟就沾寒沾凍。





同時打左個乞嚏，大家互望一眼，跟住又同時開口，聲疊聲咁講：「不如…」

「你...你講先。」子瑜對Mike講。

「不如返去阿榮佢地嗰度，之後先再諗辦法？」

「嗯，我都係咁諗。」

佢地完全唔熟悉呢個香港，都唔知可以去邊好，加上條街咁多外星人，睇嚟都係返去大本營穩陣啲，起碼有咩事都有個照應。

雖然Mike都擔心自己身份已經敗露，但都選擇返去，心諗大不了就同大家坦白。

剛才嘅外星人大戰，令成個船塢破壞嚴重，從滿地各種屍骸睇得出，贏嘅一方係矮仔外星人。

時間已經係傍晚時分，二人伴住夕陽，慢慢由黃埔船塢行返去。





可能彼此都知大家心情麻麻，所以全程都無出聲，只係靜靜咁望住自己個影前行。

而佢地一路都無發覺，有兩隻矮仔外星人一路吊住佢地尾。

「救命啊！」

都未行到工廠，離遠就聽到細路仔嘅呼喊聲。

二人加快腳步跑返去睇下咩事。

工廠嘅正門被打穿左個大窿，變得無遮無掩，一望就望見有隻黑色四手怪，正喺入面大肆破壞。

三十幾個人驚慌咁四處閃避。





「Mike哥哥，救命啊！」

一個細路額頭損左流血，佢見到Mike喺門口，就大聲呼救。

四手怪順住啲聲衝埋去，單手「的」起個細路，第二隻手就化成尖錐。

「嗚嗚嗚嗚—」個細路驚到大喊。