「我同Mike仲有你地三個Mike,都係唔屬於呢個時空,我諗大家應該都想,盡快返去各自嘅時空,不過…」

「美國Mike」打斷子瑜嘅說話:「No no no,有幸親眼見到外星人,我唔介意再留耐啲。」

「醫生Mike」就話:「其實我都唔急住返去自己嘅時空,一開始我跟另外兩個Mike穿越時空,都係想逃離下現實,唔想再對住屋企嗰三隻乸。」

「但我地唔屬於呢個時空,繼續留喺度嘅話,隨時會唔知點樣擾亂呢一時空。」子瑜回應話。

「我地又唔係幫啲外星人侵略地球,點會擾亂呢個時空?」「美國Mike」反駁。





「呢啲嘢話唔埋架…」

「Relax!計我話,我地嚟到呢個時空,全部都係命運嘅安排,命運一定係想我地幫手對付啲外星人。」「美國Mike」 相當雀躍。

「但你地唔係正職架咩,可以拋低工作唔理?」Mike呢個時候問。

除左「醫生Mike」之外,佢記得「美國Mike」係水上用品牌子Speedo嘅設計師。

「我老婆走佬嗰陣,我就同公司攞左大假搞離婚,同埋我呢啲做design嘅好free嘅啫。」





「穿越之前,我都同醫院請左假話散心。」

「哦…原來係咁…」Mike諗起自己消失咁多日,蛇頭偉哥一定炸曬形,以後都唔會俾job佢做。

之後「美國Mike」lur住Mike話想學招:「話時話,你嗰啲招係點練架?快啲教下我啦!」

「我都唔知點教你,嗰啲招係我吞左條魔蟲,然後跟住本秘笈搞嘢練出嚟。」Mike答。

「What?你吞左條蟲落肚?」





Mike點點頭。

「Jesus!That’s so disgusting!」「美國Mike」起曬雞皮。

「唔好再講埋啲咩食蟲啦,你地可唔可以諗下辦法,帶我返去原本嘅時空,等我有得投胎?」

「皮褸Mike」忍唔住要開聲:「又或者,你地諗下辦法點樣超渡我?」

「我當我地係道士咩,邊識幫你超渡。」Mike答話。

「頂!真係煩!做鬼真係一啲都唔有型!啲頭髮亂左,想撥翻正,但撥極都撥唔到!」鬼魂不停想撥啲頭髮,但隻手就係觸摸唔到。

「你做左鬼,啲外星人可能睇你唔到,咁你到時可以潛入陣地做偵測兵。」「美國Mike」對鬼魂講。

「講咩呀你?」鬼魂唔知對方噏乜。





「美國Mike」企喺身,一副好認真嘅樣,對在座各位講:「依家我地有fighter、隊醫、偵測兵,而我就提供外星人資料,仲有幾個女人洗衫煮飯做後勤,呢個簡直就係一隊perfect team嚟對付外星人!」

「隊名我都諗好左,就叫Alien Buster!以後我個稱號就係American Hawk,或者美國鷹都得,呢個係我以前成日用嘅遊戲名,至於醫生就直接啲,叫Dr.Cheung或者張醫生,變左鬼嘅就叫阿鬼,剩低你地兩個就唔知改咩名好,你地幫返自己諗啦。」

大家聽條友講完一大輪,真係唔知俾咩反應好。

然而,四個Mike以後就用四個唔同名嚟區分。