穿越時空，冒充平行世界嘅另一個自己，再去呃佢條女上床: （166）

「趁支炮未發射，我地快啲救埋Mike佢地上嚟！」子瑜對陳總司令講。

對方卻搖頭說不：「如果我地出動去救埋佢地，咁就會被帝洛斯發現，我地唔可以打草驚蛇。」

「你…你唔好話我聽…你想犧牲埋其他人？」

「嗰幾個人擅自穿越時空，已經違反左時空法則，本來就要受到懲罰。」

「點可以咁架！咁即係要Mike佢地做餌啫！佢地違反規則係唔啱，但係…」





「唔好再但係！要消滅帝洛斯就得返呢個方法！」陳總司令一意孤行，然後問其他人，「依家仲剩幾多秒？」

「三十秒！」一個負責開炮嘅時空使者回答。

子瑜則苦苦哀求：「人命嚟架！你點可以犧牲無辜嘅人？求下你救埋Mike佢地啦！」

陳總司令卻心意已決，半句都聽唔入耳。

觀光塔底之下，帝洛斯掛住對付Mike，完全無留意到有支炮瞄準住佢。





「既然你個死老嘢唔肯現身，咁唯有我劏開呢個友個肚，然後抽你出嚟！」

帝洛斯左手繼續叉住Mike條頸，右手揸住邪合劍，準備劏開對方個肚。

美國鷹同阿鬼喪失戰鬥能力，想去救同伴卻無能為力。

就喺把劍掂到Mike胸口之際，死纏爛打嘅魔迪加再出招攻擊帝洛斯：「你係咪唔記得左呀！本大爺先係你個對手！」

「頂你個肺！你條友死唔斷氣！真係好煩！」帝洛斯並無鬆開手，一隻手仍然捉住Mike，另外一隻手就揮劍應付魔迪加。





「砰！！！」

忽然之間，觀光塔頂傳嚟一下巨大嘅炮火聲。

呢下聲音吸引曬所有人嘅注意力。

抬頭一望，一粒超巨型好似核彈咁嘅物體，從最頂嘅位置直飛落嚟。

帝洛斯心知不妙，第一時間鬆開手，放低Mike同手上嘅劍，然後集合全身嘅力量，用佢最強嘅絕命衝擊波迎擊。

Mike、美國鷹、阿鬼同魔迪加，以至到旁觀嘅張醫生都呆左，望住粒炮彈飛落嚟，感覺好似世界末日一樣。

帝洛斯全身爆氣，出動所有力量，向上發射出威力驚人嘅衝擊波，想抵擋嗰粒炮彈。

「BOOM！！！」





結果，帝洛斯亦不敵最強武器，粒炮彈墜落地面，發生超強烈爆炸。

地面狂震，震到觀光塔上面嘅人都感受到。

位於塔頂嘅子瑜見到炸彈爆開嗰下，個心好似裂開左咁。

佢瞇埋眼，眼皮絕望咁顫抖，唔敢面對眼前嘅畫面。

Mike等人連同帝洛斯，無一倖免，齊齊淹沒喺大爆炸之中。