穿越時空，冒充平行世界嘅另一個自己，再去呃佢條女上床: （179）

Mike終於醒返，咁就意味住，佢地都係時候啟程返去原本嘅時空。

「多謝你地，多謝你地打敗左帝洛斯，拯救左我地嘅時空！」

Judy、阿榮仲有其他人鞠躬，向Mike佢地表示深深嘅謝意。

Mike好坦白：「唔洗多謝，嚴格嚟講，我地打敗帝洛斯，原意其實都唔係為左保護呢個時空。」

「點都好啦，總之好多謝你地。」





阿榮亦都真誠致謝，然後又話：「呢度俾外星人破壞到咁，要重建睇嚟要一段時間，同埋好希望嗰啲死去嘅亡魂，以後可以就此安息。」

呢句講完，眾人包括Mike佢地諗起逝去嘅同伴，不禁低頭為離開嘅人默哀半分鐘。

至於帝洛斯死後，其他俾佢勞役嘅外星人紛紛離開地球，呢個時空嘅香港總算係回覆返平靜。

再數數手指，Mike佢地喺呢個時空，都逗留左差唔多一個月，依家佢地終於都要離開呢個時空。

登上觀光塔塔頂，見到一架被摧毀嘅軍艦。





而陳總司令同埋一班時空使者，之前俾帝洛斯放火燒，好在揾到辦法救火，先避免被活生生燒死。

雖然死唔去，但係各人都受到唔同程度嘅燒傷，家陣正等待緊其他嘅時空使者過嚟救援。

「33568，你唔聽上司指令，嚴重違反守則，我宣佈要撤銷你以後嘅職務！」陳總司令攔喺眾人面前，佢手掌同耳仔都燒傷左。

「對唔住，我知道我唔啱。」子瑜鞠躬道歉。

陳總司令個樣好嬲，指住Mike佢地鬧：「你！仲有你地三個Mike！全部擅自穿越平行時空，破壞時空秩序，理應要受到懲罰！不過...不過念在你地最後都竭盡所能，打敗左帝洛斯，所以決定唔追究！」





「多謝司令網開一面！」子瑜衷心回應。

「你地走啦，穿過道時空裂縫，你地快啲返去各自原本嘅時空！」陳總司令移開腳步，放行俾Mike佢地離開。

之後四人穿過時空裂縫，踏入時空中轉站。

之前中轉站受到帝洛斯破壞，雖然已經修復左唔少地方，但仍然睇見被破壞嘅痕跡。

子瑜用櫃檯嘅掃描器，揾返三個Mike對應嘅時空序號，然後帶佢地到成部𨋢咁大部嘅時光機前。

大家由不相識到喺一齊經歷左咁多嘢，有打打鬧鬧，有攜手合作對付過外星人，有面對同伴嘅離去，當中有樂有悲。

回想所有經歷，感覺就好似發左場夢咁。

而佢地終於嚟到呢個離別嘅時刻。





「我地仲會唔會再見？」第一個行入𨋢嘅係美國鷹，佢斷左嘅手俾機械臂取替。

「唔知呀，應該唔會掛？」Mike唔肯定咁回答。

然後美國鷹講笑咁講：「阿鬼臨死講過，要我地繼承佢嘅遺願，搞返個超時空換妻計劃，有機會我地約埋一齊搞返個囉，雖然我老婆已經走左佬。」

「計落我地三個得張醫生你係結左婚，要搞嘅話應該得你搞到。」Mike將個「波」彈落張醫生度。

張醫生托一托眼鏡，尷尬咁笑一笑答：「我諗諗。」

「好啦唔講啦，要走啦！Bye bye！」

美國鷹揮手道別後，就輸入「AL-79」呢串英文同數字，隨即一瞬間就轉移離開。





美國鷹走左，下一個就輪到張醫生。

張醫生平時都比較少講嘢，臨別之際，佢臉上卻流露一絲傷感嘅表情。

佢傷感嘅原因有三個，第一個當然就係離別嘅不捨。

第二就係佢帶唔到嗰三個機械人老婆，返去自己嘅時時空，即係話返到去又要對住嗰三個老婆。

第三就係佢覺得當初大家齊齊整整出發，最後卻無法齊齊整整離開，呢點係一個遺憾。

「張醫生，保重。」Mike同子瑜向張醫生道別。

「你地都保重，有緣再見。」講完，張醫生都俾時光機送走。

呢刻就得返子瑜同Mike兩個人。





早喺之前子瑜就決定左，要同Mike返去原本嘅時空一齊生活。

咁啱佢俾陳總司令完全撤銷左職務，即係話佢可以名正言順咁同Mike一齊走。

「你真係肯跟我返去？」

Mike雙眼望住子瑜，想確認一次對方嘅心意：「你要知道，你已經唔係時空使者，無左時光機，到時跟左我返去後悔嘅話，你就無得返轉頭，你諗清楚架啦？」

子瑜好肯定咁點點頭，回答：「我諗清楚架啦！我願意同你一齊返去，而且唔會後悔！」

二人相視一笑，跟住Mike拖起子瑜隻手，同步踏入時光機。

Mike知道返到自己嘅時空，又會再次面對返自己嗰一個失敗嘅人生。





只係呢一次佢決定唔再逃避。外星人都殺佢唔死，相信無乜嘢再可以難到佢。

就算有，佢都一定捱得過去。

再加上有子瑜喺佢身邊，給予佢支持同鼓勵，佢相信所有嘢都可以克服，一切都可以重頭嚟過。

Mike一手拖住子瑜，另一隻輸入自己嘅時空序號。

帶住愛同希望，二人坐住時間機，成功返到去原來嘅時空，一齊開展人生嘅下一頁。


（全文完）