[微血腥] 覺能之戰 (逢二、四、六更新): 入隊篇第二章: A Mark (Awakening Mark) 上

「喂！你都入咗……」詡突然從後走出來，但話未說完，就突然退後幾步。

「做咩？」梓旻立即檢查身上有沒有附上奇怪的東西

「你……冇沖涼幾日？好臭！」詡捏著鼻子，臉有難色的道

「唔係掛！？」梓旻立即大力聞一聞自己身上有沒有異味

「講笑咋！咁認真！」詡又突然笑起來，再把手勾搭在梓旻的肩膀上，梓旻因此而鬆了一口氣





他們進去後隨便找了個較後的位置坐下，工作人員很快就開始解說今天的流程。他們拿著一張接種同意書，上面寫著「覺能劑 (AP劑)的副作用：輕微發燒，頭暈及嘔吐。似乎副作用不重。而接種成功的人可能會瞳孔變色或身上有類似胎記的「A Mark (Awakening Mark)」出現，這些都是正常現象。」梓旻反倒覺得正常現象比副作用更嚇人。

「聽聞少數人會喺耳仔出現A Mark，多數人喺手，但眼變色嘅人多數負責指揮工作。」詡細聲說道。 

「有冇講點解？有咩分別？」梓旻好奇的問 

「冇點解㗎，但你居然連咩分別都唔知？」坐梓旻前面的一個女生轉身答話。這女生黑色長髮，束著馬尾，即使坐下也看得出她個子算高，黝黑的膚色及頗健碩的身材看得出有長期煅煉身體。雖然這女生看起來跟他差不多，但說起話像是一個小朋友般幼稚：「個個都知，印出喺耳就入醫療隊，出喺手就先峰部隊打前線，出喺眼就先峰部隊打後防。印喺手嘅人多數係肉搏戰多，喺眼嘅就念力同頭腦戰多。」

「亞楓……你都係聽朋友講知，咁樣話人唔太好！」旁邊淺啡色中長髮，五官標緻的女生轉身望向他們：「唔好意思，佢份人係比較……直接。我叫逸樺，希望大家可以好好相處。」這女生明顯比那個亞楓的女生有禮得多，她舉止溫柔且斯文，這和她那有點肌肉的身材形成奇怪對比，完全不像來投考先峰部隊的。





突然燈光轉暗，眾人目光也集中到演講台上，台上的投射屏幕播放出一段介紹覺能及部隊的短片。

「七年前的「黑影日」，一群黑色嘅外星生物如殞石般降落，襲擊附近嘅途人。雖然好快就被消滅，但仍然死傷無數。大部分外星生物屍體都收歸本生物科技公司 -- 「角」所擁有。為防止再次發生類似事件所引發嘅死傷，我地公司決定研發能對抗外星物種嘅武器。外星生物從天而降嘅第二年，我地成功研發出適用於人體嘅「覺能劑」，即係AP(Awakening Power)劑。接種AP劑嘅人都會有唔同嘅超能力，我地稱之為「覺能」，亦即係AP。由於始終都只入侵性的物質，且數據不足，現時仍未能推出予大眾使用。可惜AP劑推出後半年，突然出現一啲使用AP犯罪嘅人，即係AP犯，佢地唔知由邊度獲得非本公司研發嘅AP劑。同時，城內不時出現唔知從何而來嘅黑色怪物襲擊市民。為負起社會責任，本公司決定與政府合作推出一支覺能特種部隊。喺嚴格嘅訓練及充足嘅醫療設施下，為願意服務社會嘅各位接種AP劑，並讓大家參與各種拯救行動。在此，本公司感謝各位熱心且勇敢嘅參與，就讓我地攜手創造出安全且令人住得安心嘅耀王城啦！」

短片播完後，工作人員朗讀一次接種同意書的內容並提醒大家簽名後，就開始續一點名叫人到接種站接種藥劑。

「下一位，韋楓香。」隨著工作人員的叫喚，剛才黑色長髮的女生站起離開。

「八婆，希望之後唔會見。」詡小細說道，梓旻用眼神提醒詡，那女生的朋友逸樺仍在前面，示意他不要亂說話





「你地想入咩隊？我想入醫療隊。」逸樺突然轉身微笑道 

「手啦，我唔太叻頭腦戰。」詡似乎對剛才說亞楓的壞話沒有一絲歉意，很自然地回答逸樺的問題 

「我……我都係今日先知分別咋……」梓旻對自己的無知表示失望 

「呀…呀…其實唔知都正常，我都係識亞楓先知」逸樺支支吾吾的安慰他，眼見梓旻失望的樣子，詡也立即點頭表示同意逸樺的話 

「下一位，戴梓旻。」梓旻聽到自己名，立即挺直腰背。雖然他不怕打針及副作用，但不免有點緊張。他站起來，一步一步的向接種站出發，每走一步，他的心跳聲就愈大，他試圖深呼吸減輕緊張的感覺，但不果。進入接種站後，他便坐下報告名字，姑娘拿出針筒道：「會有啲痛，不過都係一下，之後返屋企，瞓多啲食多啲飲多啲水就冇乜事。最辛苦都係呢一下。」

那針插到手臂，雖然快，但非常痛，藥劑注射入身體的感覺有點噁心，且莫名的長時間。難受的一分鐘過去，他要到等待區等30分鐘。那30分鐘裡，他、詡、樺及楓四人自我介紹後閒談了一會，原來樺及楓也是於第一部份面試時認識，看著楓與詡二人時常話中有話暗罵對方就有點好笑。四人分享體能試的經過，詡及楓終能有一個話題得到共識。因有這三人的陪伴，梓旻這30分鐘不算難過，最後他們還是交換電話開了個群組方便聯絡。

可能是閒談令心情放鬆了很多，梓旻回家的路程不難受，還可以買些東西為晚餐添多樣餸菜。除了姐姐仍在冷戰，對他不瞅不睬外，一切也很好。那晚他吃飽便睡，並無不妥，對於自己獲得哪種覺能，還有點小興奮。此刻的他完全沒想到，接種第二天就後悔了。那天他因發燒而醒，渾身不適，全身發熱冒汗，他看到電話有多條信息： 

楓：喂，你哋有冇發燒？我燒到37.8度




樺：我都有，37.5度……耳仔特別熱到好似摸多兩摸就爛
詡：我最高38.5，又話微燒？
楓：去浸浸凍水會更舒服
詡：浸咗！超爽！
樺：旻呢？唔見人
詡：佢未讀信息
楓傳送了一段錄音
詡：你係段錄音到大嗌有鬼用咩？

梓旻看完信息笑了笑，轉身往客廳找探熱針，好讓他可以報告自己的度數。量完一看…42？42度？ 

梓旻立即於群組報告自己42度高燒的情況
楓：唔係嘩？
樺：會唔會係你枝針壞左？
楓：會唔會燒壞腦？




詡：(回覆楓) 你就燒壞腦
詡：又話微燒？……大家覺唔覺有啲暈
樺：少少
楓：冇，但想嘔，但又唔係好嘔到，我都係返去瞓，旻都去瞓啦你！
樺：我都去瞓，大家好好休息啦
詡：旻去浸下涼水，降降溫啦！

梓旻愈看愈熱，開始頭暈作嘔。「點解咁辛苦？」他腦海不斷徘徊這條問題。他相當暈，暈得要跑到廁所吐，感覺像要把整個胃都要吐出口。吐完，潄口洗面，一抬頭，一行鼻血流出，一股感覺從後腦傳到頭頂，眼前一黑失去意識了，他最後只記得姐姐的大叫聲。