[微血腥] 覺能之戰 (逢二、四、六更新): 覺力賽篇第十章: O隊出場(二)

「話說，頭先講咩武器？」梓旻繼續之前的話題

「係吖！過咗呢場覺力賽，隊長就會就比賽嘅表現搵見習隊員商量，再同研究組開會，一個月到就有專屬武器到手。不過你個隊應該由浩政負責搵你，你知啦，富哥係盲嘅，鼓鼓爸爸要湊女。」Albert皺眉苦笑繼續道：「浩政又冇同你地講？」

梓旻點點頭，繼續問：「你哋個個都有？個個都唔同？」

「武器分兩種，一種係自己提出要求嘅，會特別唔同啲，另一種係大眾化少少，即係你咩A Mark就有類似嘅武器，但都會度身訂造，每人都有少少唔同。」Albert從腰側拿出如他大腿長的摺扇：「我就係第二種，同大部分T隊隊員一樣有副有望遠鏡功能嘅眼鏡，同一把摺扇。我嘅摺扇用超簿金屬做，可以𠝹傷敵人，末端呢個手握以我手形制訂，㩒側邊嘅制扇會打開，可以單手或雙手握實，雙手握實發動AP撥出去嘅風可以做出強而有力嘅阻力，阻礙敵方投射嘅物件前進，仲可以撥返轉頭。Dali都係摺扇，但因為佢冇乜力，加上會𠝹傷自己，佢個把係比較細把嘅木扇。」

梓旻對這話題既好奇又興奮：「咁其他人呢？」





「富哥係拐杖，佢枝拐杖用特製物料做，平時用到之外，插落地可以感應附近幾百米範圍內嘅人同動物位置，枴杖手握位會變成凹凸圖案或字，好似雷達咁提佢人或動物嘅方位，但實際操作就問佢先知。」Albert動手模仿拐杖的形狀，再指著想像出來的拐杖，描述拐杖的功能：「拐杖近手握位位置側邊同樣有個制，㩒開成枝拐杖變摺扇，用法同我差唔多

「…鹿仔係⋯類似金鋼圈咁，上面有兩條天線之類，雖然冇研究顯示可以提升能力，但佢堅持咁做可以令佢大範圍能力隊員覺能及體力同治療隊員，不過⋯佢個武器加上佢嘅光頭，有時我真係以為唐憎到場，哈哈！」Albert用兩手指模仿兩天線在左右兩側

「亞豪就係一對靴加手套，因為佢多數以跑為主，特制靴除咗可以保護雙腳，仲可以儲電發電，傳到手套作電激用途；Kiki就係哨子，不可思議嘅係佢唔需要講嘢，諗一諗，吹一吹，佢想我哋知嘅嘢就會係我哋腦海浮現，有時甚至可以提升我哋逃走嘅速度，就好似有人催我哋走咁。」Albert拍拍小腿，再模仿呼哨子的樣子。

「P隊人大部分都係拳套，最冇變化嘅武器同裝備應該就係佢哋，Buck嘅唔同之處係件行動制服，因為太亂嚟，肌肉同關節都有勞損嘅問題，所以佢件制服特別設計到可以插入試管治療液，制服內多個細孔可噴出治療液，減少佢因行動而生嘅新傷害。」Albert描述後拍一拍自己的關節位

「咁浩政呢？」這是梓旻最想知的人，因為這是唯一跟他一樣A Mark的人





「浩政呀⋯⋯」Albert有點猶豫：「佢好似係一枝筆。」

「筆？」梓旻想起上一次浩政跟他說話時把玩的筆

「係，合埋蓋就係一枝圓柱形兩邊圓頭嘅筆，我記得佢訂造咗一黑一白，佢經常帶白個枝係身，但唔多見佢用。」Albert雙手展示筆的長短

「坦白講，雖然我同浩政同A Mark，但截止現時為止，佢似乎冇乜嘢我可以參考到。」梓旻有點苦惱，完全不知道筆對他有什麼作用

「係嘅，而且係其他意義上，我都唔太建議你參考佢。」Albert笑笑





比賽開始的聲音響起，鹿仔拍一拍手便強化了隊員的AP及體力，位於A區的亞豪向D1狂奔，快得肉眼不太看得到，但D1有亞點守著，不斷向亞豪揮拳，亞豪避得很快，但就是前進不了。另一邊，身處B2的富哥及Dali在向Buck和Cade拋石，對比富哥的拋石攻擊，Dali就像小孩子玩拋石一樣弱。富哥用念力阻礙Buck前進，看來非常有效，Buck就像正推著一座山般，動也不動。而富哥身後的KiKi不斷在大叫「呀」，在強化富哥或弱化Buck就不得而知了。

Dali在Buck的左側很努力地向Cade拋石，他舉起並張開左手，手掌對著Cade，可能有設置防護才令他的拋石攻擊如此差劣。而作為醫療兵的鹿仔沒有守著陣地，只見他以不算快的速度，在Dali身後走過，大概他正以Dali作掩護，打算到D3陣地取旗。但Buck發現了鹿仔行過，立即向左奔跑，富哥及Kiki也一同奔跑，也不忘拋石及大叫。三人速度相差不多，鹿仔知道被發現後也立即找巨石作掩護，Buck前面只剩Dali一人擋在前，Dali極力阻止他前進，可見Dali怕到快要哭出來。

顯然對Dali來說阻礙兩人實在太吃力，Buck的速度只是被減慢少許，而Cade也開始加快，Buck走到Dali面前舉起右手打算揮拳而下的時候，富哥從後用念力拖拉Buck的右腳，Buck倒在地上，Cade反射性望向Buck，Dali立即加強拋石攻擊。另一方面，亞豪終於擺脫亞點，就在他快要摸到旗的一刻，換隊聲響起。