[微血腥] 覺能之戰 (逢二、四、六更新): 覺力賽篇第十章: O隊出場(五)

梓旻五人本想於食堂討論比賽的事，無奈比賽期間眾多人聚集於食堂看比賽及起哄，最後只好到O隊辦公室休息。

「你哋辦公室長期都咁靜㗎喎！」楓跟著梓旻他們進入辦公室，一直走到會議室坐下

「係，啲隊員長期都去其他隊幫手，但今日係因為比賽出曬去。」梓旻回應

「我哋傾返先，知唔知我哋對個幾隊啲人實力如何？」詡問

「M隊嗰幾位應該同我差唔多，其他我都唔清楚佢哋實力。」樺回答，其他人都在搖頭





「我練習個陣冇理過其他人喎！我之後再留意下！」楓回答，她的回答從不令人失望地令人非常失望

「O隊嘅我哋更加唔知，阮超、麗瑤同我哋分開訓練。」梓旻道

「咁即係除M隊嘅人外，我哋乜都唔知啦！咁我哋攻邊方先？」美慧提議

「緊係攻最近嗰個啦！其實A1隊攻A3隊，D1攻D3咁就有兩隊出線，唔使打喇！」楓揸緊拳頭說

「但就算有兩隊奪旗成功都未停㗎！」美慧提醒





「但都有兩隊出，為第二日比賽保留實力，唔會出咁多力嘅！」楓皺眉頭

「咁未必。同變陣賽一樣，除非剩返一隊，否則唔會停。假如頭一個鐘就有兩隊出線，咁為咗盡早完成賽事就會出力啲打。」詡回應

「而且你哋為咗俾到好印象其他隊，唔可以hea 打㗎！」美慧提醒，梓旻及詡二人嘆了口氣

「唉，真麻煩⋯⋯」詡埋怨

「我哋係咪未知自己位置？」梓旻想確認自己所知





「係，當日當刻先會知。」美慧回答

「咁總之就攻咗最近個隊先！然後就去打對面贏個隊！」楓又再揸緊拳頭說

「等陣先，如果三隊都打我哋呢？」樺問

「咁你就求神拜佛唔好發生。」詡回答

「咁我哋各人點分工好？邊個攻邊個守？」梓旻問

「我諗我應該留係陣地最好，我唔似鹿仔可以弱化人⋯」樺有點羞愧

「鹿仔係特別勁嘅！唔好唔開心！」楓拍拍樺的背，樺苦笑望向楓

「我可以飛人過去，如果飛嘅人想長期自由飛行，咁我估我最多可以飛兩個，而且佢飛之後，我就冇多餘嘅念力做防守或攻擊。」梓旻舉起右手





「好弱⋯」美慧問：「咁只係飛嘅話，空中俾人掟或攻擊就防唔到，咁有乜用？」

「咁你有咩好提議呢？」詡有點不爽美慧

「我提議梓旻留守，用念力防止敵方前進，然後升一個人上天，至少佢仲有啲力做防守。樺就喺梓旻後面持續強化梓旻啦！」美慧自信且堅定地提議

「咁飛我啦！我想試下飛！」楓舉起手跳起身自薦

「緊係飛我啦！我飛過！」詡爭著說

「你哋兩個係天上面有防禦能力咩？我可以用念力防止四方八面嘅攻擊之餘，梓旻飛起我又可以瀰補返我冇嘅體力，我始終係支援隊，冇你哋先鋒隊咁跑得！」美慧的一藉話令楓及詡的興奮感覺盡失

「好叻吖你！」樺稱讚美慧，美慧得意洋洋的點頭感謝





「係呀，最叻係佢吖。」詡諷刺道，美慧得意洋洋的仿似感謝他讚賞般向詡點頭

「但我都唔知自己咁樣可以做到咩程度，而且都要知樺可以強化幾多，一陣呢場比賽完咗，我哋去技能訓練場試下？」梓旻提出

眾人回應：「好！」

「話時話，大家屋企人嚟唔嚟睇比賽？」梓旻問

「我爸媽唔太方便嚟。」樺有點困擾的回答

「我都係。」楓說

「我爸好似話嚟。」詡回答

「我都係。」美慧回答





「我父母同家姐都嚟。」梓旻說

「你家姐都嚟？我想見下，想見下。」楓很興奮的說

「做乜咁興奮嗻你？」詡皺著眉頭問

「咁我⋯我冇家姐嘛！」楓支吾道

「我就唔見喇！費事尷尬⋯」詡道

「我都係。」美慧道

「我都係。」樺道





「有冇人問過我本人意見？我想你哋見咩？」梓旻說

「Oh! 咁你俾唔俾？」楓有點期待的問

「最好唔好啦⋯好尷尬……」梓旻苦笑說，楓似乎有點失望

「比賽好似完咗，我哋去訓練場。」美慧看看手機說