[微血腥] 覺能之戰 (逢二、四、六更新): 覺力賽篇第十二章: 第一場領地爭奪戰 (一)

「我頭先嚟之前，撞到尚華佢哋個隊，偷聽到佢哋打算同我哋一樣攻咗最近個一隊人先。」樺仍在喘氣

「乜水？」美慧問

「二世祖。」詡立即回答

「勁人。」楓同時回應

「需要留意嘅人⋯」梓旻認為客觀一點的回答比較好：「佢成組好似三個P隊，一個T同一個M?」





「係，有3個P，至少有三個冇腦嘅人。」詡繼續他的偏見

「我用腦㗎喎！」楓皺眉

「你好似都係Arm Mark?」美慧提醒詡

「尚華應該算有腦嘅人。」梓旻的好評令詡有點不滿

「M組個位叫House好似可以為目標人物遠距離強化力量，雖然近身戰弱到嚇人，但頭腦嚟講佢係M隊新人中第一。」樺介紹





「佢係自負，我覺得佢近身戰弱嘅原因係因為佢避開曬啲體能訓練，覺得蠢人先要做，M隊似乎冇乜人鍾意佢。以我所知，佢對避開攻擊嘅逃避心態已經去到被考慮退隊嘅程度，只係佢個能力同頭腦令佢仲可留佢喺度。」梓旻回憶起過去與M隊一同訓練的時間

「點解唔入支援隊？咁驚戰鬥。」美慧表示疑問

「唔清楚，不過佢的確話過用腦就可以避開攻擊，完成任務。」樺搖頭

「我唔鍾意佢，佢明明好廢，但睇唔起我，成日故意走嚟話我。」楓露出不開心的表情

「T隊個位係比較細膽嘅女仔，叫芷喬，佢算係T隊念力較大個班，但因為太自卑，成日完成唔到隊長要求。」梓旻道





「自負配自卑……」美慧不解該隊伍的組成

「所以尚華好重要，佢外向嘅性格可以領導隊伍，所以先多人同佢做朋友。」梓旻對尚華的評價再次令詡不快

「點解你咁鍾意佢㗎？」詡問

「點解你咁唔鍾意佢㗎？」梓旻反問

「同佢同隊兩個同佢性格有啲似，一個叫Baldwin，係個講嘢超大聲嘅人，成日叫人精神啲，算係振奮士氣嘅角色；另一個叫Baron，係個反應快，鍾意衝前線嘅人，有佢係前面啲人會好主動跟隨。」楓補充資料

「聽落係啲好熱血嘅角色，唔想對佢哋。」美慧對熱血類型的人不太在行：「其他兩隊呢？」

「狗公加八婆隊。」詡又再說出他的偏見

「咩意思？」美慧不明白





「四隻狗公加Kristy。Kristy係個唔識正常著衫嘅八婆⋯」詡補充他的偏見

「Kristy係M隊，比較鍾意性感，所以就算T shirt都會盡力做到露池或露膊。」樺解釋為何詡有這種偏見

「而同佢同隊嘅四個男隊員都係P隊，成日係佢附近獻殷勤。」梓旻補充

「嗰四個人好似都係好大隻，但動作比較慢，都唔見得好勁，好似最多一拳打爆一道牆。」楓說

「四個都廢㗎！我同楓加埋美慧三個都搞得掂。」詡繼續他的偏見，楓點頭

「既然你兩個都覺得三個就搞掂，呢隊好似幾弱， 但四個P，點都留意一下好。仲有一隊呢？」美慧問

「好似係三M兩T。」樺回





「三個M？啲攻擊力咪好弱？」美慧驚訝

「其中一個M，叫亞宏，係最強M隊成員，但完全治療或增強唔到其他人，只能自療，同埋降低被觸摸嘅敵人嘅能力。而佢本身體格體能唔錯，經常接受近身攻擊訓練，變成打不死又善於近身戰嘅人。」樺說

「嘩，咁要留意下，咁其他呢？」美慧繼續問

「一般。」樺回

「冇記憶。」其他人都搖頭

「咁希望今次打得唔太辛苦啦⋯⋯我哋差唔多落去查下第幾區。」美慧說完，四人便起行到會場