[微血腥] 覺能之戰 (逢二、四、六更新): 對角篇第二十章：突襲 (三)

「冇牙仔呀！冇牙仔……」澈硯仍在痛哭大叫，但這奇怪的答案讓梓旻冷靜下來：「牙仔？邊個嚟？」

「冇牙仔！我養個隻紅核呀！」澈硯終於停下來，好像有點氣梓旻不知道他的紅核叫冇牙仔一樣

「啪」梓旻狠狠地拍打澈硯的後腦，憤怒地道：「妖！為隻水蛭喊！」

「咩喎！我同佢已經有咗感情，一個月就好似親人咁有愛！我知冇人好似我咁用心養！」澈硯眼泛淚光道：「但居然俾我啲血毒死咗！」

「俾你啲血毒死？」這梓旻回想夢裡曾提起過澈硯的能力，如果澈硯的能力對他人有毒的話，對他自己又是怎樣？澈硯的能力是如此特別，就如暴走的鹿仔也可輕易解決，想到這裡，究竟他曾否暴走呢？這是需要弄清楚的問題：「你有冇暴走過？如似鹿仔同鼓爸咁。」





「冇，不過亞塵有提起過我嘅能力強到好似暴走過一樣。」澈硯的答案令梓旻沉思起來，澈硯知道梓旻有點不妥：「咩事？又係夢？」

既然被澈硯估中了，梓旻也不打算隱瞞，盡量把夢的每個細節告訴他，唯獨樺為他哭這點沒有提及，因為他不想澈硯太高興。澈硯聽完神色凝重的，這始終也是關於他的死亡預告，梓旻開始擔心這會影響他的心情，但不需數秒梓旻就後悔為他擔心這件事。

「即係我嘅血可能有研究價值喎！」澈硯張開雙手，看著自己雙手的眼神就如發現新大陸一樣

「白擔心一場……」梓旻碎碎唸，開始走向升降機，是時候回辦公室當值

「你！你擔心我？」澈硯一副虛偽的感動相，跟上梓旻





「收聲！作嘔！點呀？上次話查個人查咗去邊？」梓旻推開澈硯

「問得好！我搵到喇！有名……但冇資料！」澈硯很有把握的道

「咁咪即係搵唔到？」梓旻皺眉

「你識唔識㗎？就係乜都冇先代表呢個人有嘢！有乜可能有名冇料到？」澈硯反問，這令梓旻醒悟過來。澈硯繼續說：「即係！證實咗你嘅夢含有一啲好重要嘅線索，而可能係你知道或見過，你又唔記得……」

「我冇唔記得！我重覆一次！呢啲事我係唔知，亦冇可能見過遇過！雖然我承認有諗過想你死！」梓旻不耐煩地說





「嗱嗱嗱！承認喇！」澈硯笑著手指指

「收聲啦！」梓旻非常煩躁的道

「好！講返正式嘢！我對董葦萁呢名有印象，但要再搵搵，因為比較少聽到有人用全名。」澈硯突然正經道。這時二人已回到辦公室，經過休息室，打開往辦公位置的門，第一眼看到的是在沖咖啡的鹿仔。

「喂！早晨喎！恭喜你地考試合格！」鹿仔舉高杯子，做出碰杯的動作

「係，開心咗一晚，就有人為咗啲無聊事係我房門口大喊！」梓旻盯著澈硯

「咩無聊？好大件事㗎！冇牙仔……」澈硯似乎想再解釋一次他那紅核對他而言多重要，但梓旻沒給機會他：「係係係！有你做拍擋真係煩！」

「咁你唔使煩喇！因為聽日會有大嘢要做，非行動成員要強制返屋企放假，而你就係其中一個！」鹿仔氧著咖啡回到自己座位去

「大嘢？」澈硯立即興致勃勃的快步走到鹿仔桌前坐下：「講下咩事呀！」





「係將個隻百核同埋鄭子謙轉移到主研究所嘅大日子！」鹿仔笑著喝下咖啡