[微血腥] 覺能之戰 (逢二、四、六更新): 對角篇第二十章：突襲 (七)

「新仔！」Lorre叫喊著，梓旻立即看回前方，他又再忘記自己不能從敵人移開視線。

當他視線集中回敵人時，第一時間看到的是那如蛇般纏繞著雙腿的深色紋身，再向上看那男子的臉，那是當時被一角殺死的男子。

「你地……唔走？」男子說出與上次一樣的話，一樣單腳站著，一樣露出令人心寒的笑容：「呀！嚇到走唔到呢！」

「點解你未死？」梓旻驚訝得問出口：「上次明明已經俾一角……」

「點解未死？一角？哦！認錯人喇，哥哥仔！上次死嗰個係一件失敗品，樣一樣，AP一樣，但我有能力好多！」男子奸笑著：「我叫亞傑，記得呢個名喇！我先係正牌貨！」





「新仔！唔好同AP犯講咁多！打啦！」Lorre拿起吹箭準備放到口時，被百核觸手打走，名叫亞傑的男子不知何時已把所有銀針拔掉

「等等呀！BB，唔好亂郁住！」亞傑站在百核身上拍拍百核的背，但百核明顯沒有聽他說的，打算用觸手打走亞傑。亞傑見牠不聽話就一舉起腿，用力踏下去，再把手伸進百核體內，將核心掏出，再道：「都叫你唔好郁㗎啦！仲有你……」

亞傑一下子把梓旻的鎚子踢走，快得肉眼也看不到。雖然他們的武器也沒了，但亞傑沒有攻擊他們二人，把玩著手上的核說：「我唔係嚟開戰，係嚟回收返啲未死嘅百核。呀！仲有帶個口訊俾你地上頭知！我地『獨』正式同你地『角』宣戰。仲有，你頭先好似有提起一角，我地係絕對……唔會受制於一角，我地『獨』要殺死一角以及消滅所有關於佢嘅一切，我大佬話嘅！哈哈！」

笑完後，那男子以肉眼看不到的速度跑走了。Lorre拾回武器後第一時間去查看Baldwin的情況，Baldwin似乎多處骨折而陷入昏迷，但情況穩定。梓旻把鎚子拾回後立即拿起電話打給澈硯，但沒人接聽。他跑往Lorre身邊問：「總部情況點樣？」

「我嘗試聯絡緊，由頭先打紅核個陣已經唔係好收到總部信息，未試過咁靜。」Lorre手錶上按了幾下，再說：「喂？喂？咩情況？吓……好！我立即返嚟！」





「咩事？」梓旻非常緊張的問

「Rose同Dali背叛咗我地，逃走咗……而Lina趁機殺死咗隻巨型百核，而家被囚禁係主研究所。」Lorre續說：「Lina明明應該冇AP……」

為了解澈硯的情況，梓旻沒有與Lorre等人處理災後復原的工作便離開回到總部去。
完咗呢章，對角篇就完，今次唔會有插曲，因為寫得幾順就唔想中途分心寫其他

發現出場人物已有四十幾個，如果真係唔記得某啲人物，歡迎嚟我ig (https://www.instagram.com/coerrol/) 搵返睇睇！





對角篇完咗，我會up一次啲簡介 (包括人物簡介)，俾大家易跟啲入面嘅setting


近日好開心發現各平台都好似多咗讀者！希望各位繼續支持！留言正皮都可令我更有動力寫落去！多謝大家！！