[微血腥] 覺能之戰 (逢二、四、六更新): 敵或友篇第二十五章：屍體的秘密 (二)

「你地都有屋企人，唔係話你怕唔怕，係屋企人都會擔心，下下見你地搵命駁。除非冇當你地係屋企人，如果唔係都會擔心。至少我做人亞媽定家姐都會好擔心！你睇下頭先？」姐姐話中帶怒氣，眾人不敢說話

「我……已經有敵人記得我個樣同名！我唔會退！我……會做到唔使人擔心！」梓旻嘗試表現出堅定和自信

接著，梓旻父母也回來了，話題沒有延續下去，寒暄了幾句家人也離開了。他們走了後，梓旻也連忙為剛才的事道歉。

「唔緊要啦！佢都係擔心唧！」樺安慰道

「講起擔心，亞旻你真係要擔心喇！聽聞總部要禁你出賽！」楓道，立即被詡大力拍頭





「吓？點解？」梓旻緊張的問

「都叫你唔好咁快提！等亞旻出院先呀嘛！」詡怒斥

「咩事唧？」梓旻心急如焚的問

「因為一角……佢放過你，佢地擔心你同一角有咩關係！」樺解釋

「一角？點會有關係？一隻怪物我點會同佢有關係？同佢溝唔溝通到都未知啦！」梓旻激動的說完立即回想起甘生與亞塵的對話，一角可能真的可以與人溝通





「放心！浩政搞掂咗！」鹿仔從門口走進來：「Candy叫我同你講聲多謝！」

「我記得佢最後意識模糊佢冇事嘛？」梓旻問

「冇，瞓返覺就好返。你就大獲啲，畀兩個敵人夾攻！」鹿仔看到梓旻的生果籃有提子便食了吃，望望楓道：「搞咩佢咁嘅樣？」

看看楓一臉悶悶不樂的，樺說：「可能……頭先畀梓旻家姐無視？」

楓點點頭，梓旻一臉歉疚的說：「對唔住……」





「唔緊要啦！我地理你咪得囉！」樺抱抱楓，楓才勉強笑一笑

「講返場戰鬥！我地都嚇親！啲敵人一模一樣樣！」詡道

「你地點知？」梓旻問

「上頭申請特別公開戰鬥畫面，我地睇到曬個畫面。」樺拿出手提電話給梓旻看

「我其實都嚇親！因為同上次我地見到畀一角殺死嘅人一樣樣！唔通係五胞胎？」梓旻看著手機上的「亞傑」們

「上頭認為係複製人！」鹿仔又拿了一顆提子

「複製人？」梓旻驚訝問

「因為盲妹佢地打嘅係三個一樣樣嘅女性！」樺按了按手機把盲妹等人戰鬥的畫面按出來，畫面同時包括了盲妹、岡仔、亞宏及Curse的戰鬥，其中三人的畫面出現了打扮誇張的女性，雖然打扮上略有不同，但可清楚看到三人五官完全一樣





「除非『獨』專收啲胞胎，咁多人一樣樣有啲難，而且政府查唔到佢地嘅身份，複製人可能性好高！」鹿仔道

「咁呢三個女又係腳AP？」梓旻問

「脷……條脷上面。」詡回答

「Kiki……佢……佢會唔會……」梓旻擔心

「冇事，但落咗禁令暫時停止部隊活動。都好嘅，佢近排要搞亞豪葬禮啲嘢。」鹿仔看起來有點不安

「葬禮？」梓旻等人問

「係，攞得返條屍，算好彩唔係人人攞得返！你地會出席㗎可？」鹿仔微笑問





「會！」眾人回

「好！唔阻你休息，我都偷完懶喇！你地都走啦！佢啱啱醒咋！」鹿仔說，梓旻注意到他偷偷拿走了兩條香蕉

「鹿仔！」梓旻叫停鹿仔，正離開的鹿仔震了震，轉身看梓旻。梓旻問：「你話浩政搞掂咗即係點？」

「即係你冇假放要返工，而佢做咗咩，講咗咩，你就要自己問佢。無聊就手機上內聯網睇下啲片！」鹿仔說完便其他人一同離開