[微血腥] 覺能之戰 (逢二、四、六更新): 敵或友篇第二十六章：只能重新振作 (二)

「佢其實好唔開心……我有問我爸點解唔退隊。嗰陣佢話：『尚華，當年你仲細，我本身係做緊地盤，但係因為一啲唔公平嘅問題，我同亞頭反面，唔好彩加上個亞頭周圍唱我，成個月都搵唔到工。個陣又唔敢俾你媽咪知，你知啦……又要供樓又要養你地三個，話佢聽冇咗份工？唔使返屋企都得喇！所以成個月都係街「扮工」。扮到某一日，我終於有工做，終於可以挺起胸膛返屋企。居然遇上黑影日，我見住街上面嘅人慘叫求救，但我冇辦法救佢地！當我匿埋就諗起你地，諗起自己救唔到嘅人。

就因為咁我入咗隊……雖然我發現公司為利益問題隱瞞咗問題，有諗過退出，又有諗過公開，但公開又點？退又點？公開真係有人理咩？知嘅人唔多，會幫手防止發生死傷更少，我退咗就可能更加少人知，更加冇人救班細嘅……我要救佢地，我要救你地，我唔可以退！』就咁，哈……亞哥就入咗隊，我都入埋。」

聽完尚華的一番話，Buck在梓旻心目中的地位又再提升，也同時為他解開煩惱。本來還在想應否退出或轉隊，現在他很清楚自己應該繼續在先鋒隊，就如Buck所想，公開不了事實，退或轉也無濟於事，為何不從中防止慘劇發生？只要自己有能力，總可以做些什麼。