[微血腥] 覺能之戰 (逢二、四、六更新): 敵或友篇第三十章：新隊友(二)

然而，情況愈來愈惡劣，幾乎每遇到認識的人也問他與樺的關係，甚至詡也有問：「旻！係真唔係？」

「唔係真！點解連你都……」

「你地又畀人地吹到咁大！」

「吹到咁大就真？」

「又咁啱佢兩個分手！」





「佢地分手係佢地問題！」

「你今朝又公開咁同樺嘈起感情問題？」

「咩感情問題？我問佢發咩癲唔講清楚畀澈硯聽佢地分手唔關我事！」

「但上次我見你夜晚跟住樺出去喎！」

「你跟蹤我？」





「我咁啱見到你跟佢走……」

「凌晨會咁啱？」

「我……我上次見佢由你房喊住咁出嚟……」

「我係同佢鬧交，但唔係因為感情問題！」

「咁係咩問題？」





「咁你答我點解你咁夜跟蹤我先！」

「都話冇洛！我……」詡的手錶突然響起，他望一望手錶，非常急的道：「亞塵同甘生叫我立即搵佢地，我走先！」

梓旻目送詡離開後便回辦公室當值，直至數小時後，詡才回到辦公室。他一臉蒼白的，無力的坐在自己的辦公桌，梓旻也不太好意思追問他跟蹤的原因。當梓旻走近詡時，詡那空洞的眼神立即重新聚焦起來，再變成恐懼的眼神，抓住梓旻的手，似哭非哭道：「對唔住呀！旻！我唔想講大話！對唔住呀！我會慢慢解釋！可以解嘅都會解你聽！」

由於詡實在太不冷靜，梓旻也不太知道如何應對，最後他嘗試安慰詡，讓他冷靜後再解釋。可是，他沒想到之後有一段長時間也沒有機會與他說話。

這一天對梓旻來說是非常心累的一天，除了要應付那些流言蜚語，還要安慰兩位男性朋友，且與一位女性朋友對罵。

隔天的比賽是最後的決賽及冠軍戰，梓旻需要到現場幫手。跟上次幫手一樣，梓旻幾乎不知道比賽場內的情況，只知最後Crystal隊獲得了亞軍。在所有比賽完結及頒發所有獎項後，甘先生到現場會見傳媒：「多謝各位記者朋友到場！多謝電視機前面嘅觀眾！我地『角』為負起社會責任，同政府合作推出呢一隊覺能特種部隊。我地嘅隊員喺嚴格嘅訓練及充足嘅醫療設施下，所有隊員都表現非常專業且優秀！但係！我地知道仲未完全足夠，所以……我地決定增加新一屆嘅新成員數目，令更多有志保護市民嘅人可以更高機會加入我地部隊！請社會各界可以多多支持！」

甘先生的說話令梓旻想起亞豪的事，他對增加隊員數量這點感到極為反感，無奈他並沒有能力阻止。那夜，他回宿舍時嘗試找詡問昨天的事，但他不在房內，致電及信息聯絡也不果。直至第二天也找不到詡的影蹤，梓旻愈來愈擔心的時候，O隊的全部成員也被召集到O隊的會議室面見四位高級隊長。