[微血腥] 覺能之戰 (逢二、四、六更新): 敵或友篇第三十章：新隊友(五)

亞塵及亞常離開時，鼓爸和鹿仔都衝了出去，澈硯也拍拍梓旻叫他一同跟上。他們停在O隊辦公室外，而梓旻及澈硯則在門口探頭偷聽。鹿仔搶先道：「我唔轉隊！」

「唔得！」亞塵一口拒絕

「我本身係O隊，點解唔可以唔轉？」鹿仔激動道

「因為加強⋯⋯」亞塵打算同之前的說法蒙混過去

「唔好講廢話！我唔理！」鹿仔堅拒轉隊





「唔好任性！我保護緊你咋！」亞塵按摩著太陽穴道：「新隊長唔會對你地咁友善！佢為自己目標唔會考慮到你地㗎！」

「咁我更加要留低！亞豪死咗，我唔會畀佢個妹有事！」鹿仔擔心被迫留下來的Kiki

「好，我嘗試幫你轉埋Kiki出嚟！」亞塵似乎被迫讓步

「而家？」鹿仔喜形於色

「要等等⋯⋯」亞塵回





「即係幾時？」鹿仔轉成懷疑的態度

「等你轉咗隊先！我要再同新O隊高級隊長交涉，佢會有一段長時間未嚟到總部住。」亞塵回答

「咁唔得！你轉到Kiki出嚟，我先走！」鹿仔堅持

「咁咪留佢係度囉！佢都唔肯走，你冇計㗎喎！」亞常插話：「唔會死人嘅！」

「好難講，以佢嘅作風⋯⋯」亞塵皺起眉頭：「你既然死都唔走，我唔留你！但鼓爸你一定要走，你仲有個女！」





「我冇意見嘅⋯⋯雖然我都好擔心，但既然個決定係為我著想都唔拒絕喇！只係有時畀我返嚟睇吓佢地情況就得。」鼓爸道

此時，梓旻想起詡的事，便衝上前問：「我想問，你地知唔知詡去咗邊？佢個日見完你地之後，出現咗一次就唔見咗人！我想知佢去咗邊！」

「詡⋯⋯唔使太擔心，我地要佢去轉換下心情，好快返嚟！」亞常輕鬆道

「轉換心情？」梓旻疑問

「係，遲啲就知咩事，你係佢朋友，等佢解釋你聽發生咩事啦！」亞常道完便與亞塵一同離開

這一次會議後就沒人提過新隊員的事，而且詡一直也未有回來。時間過得很快，終於到了二月一日，新隊員入伍的日子。