我一定會拯救你地: 隱藏結局

我係Dennis 25歲
每日返工放工就係日常
返到屋企沖下涼食下嘢 睇幾頁漫畫 訓覺起身又準備返工
出嚟做嘢之後 以前讀書嘅朋友都開始少聯絡
終於約得齊人 突然又有人話公司OT之類未必黎到嘅事 都已經屢見不鮮
深深體會到踏入社會嘅殘酷

平平凡凡過每一日
有時會覺得自己嘅生活入面欠缺左d咩





今日繼續喺公司返工 瘋狂做野
就嚟中午 又諗下今日食咩
坐喺自己個位度望住個玻璃窗
見到好多中學生出去食飯 先至發覺原來暑假完左
不過我自從做野都已經冇放暑假幾年
所以都唔記得有暑假呢件事

我Dup低頭準備做埋d野就去食飯
突然有一個人影喺窗口行過
唔知點解我好在意呢個人影 所以又回頭望返出去




不過只係見到一班女學生成群結隊對路過
我冇理到 決定做埋d野就出去買個飯盒

我附近買左個燒味飯 仲諗緊好唔好買杯珍珠奶茶添
見到成班學生應該係食完飯跑緊返學校 可能就嚟夠鐘
可能佢地行得太急我見到前面有個人跌低左
其中一個女學生 應該佢朋友 笑笑口問佢 ：「你有冇事呀？」
我望住眼前呢個人 聽到呢句說話 我成個人呆左
明明只係好普通嘅日常事件
但我冇辦法將視線由眼前呢個人身上移開





呢個人我冇可能識佢 生活之中都冇咩可能有咩交集
但呢份感覺到底係咩？
我腦入面開始呈現一個畫面
我喺一個課室入面跌低左 有個女仔伸手扶起我
突如其來嘅記憶 我有d失神
我fing一fing個頭 然後我再望住眼前呢個女仔

係佢...

呢一刻好想衝埋去捉住佢 想問佢 我地到底係咪識
但諗諗下好似好痴線
結果佢地就咁離開左

由個一日開始 有更多嘅未知嘅記憶接踵而來




女神？過去？未來？

我明白到並唔係我而家處於呢個時空發生嘅事

每一日坐喺自己位 我就會望出玻璃窗
有時睇見佢過天橋落完樓梯拉高返對襪
有時見到佢撥下頭髮
有時見到佢㩒住佢個friend個頭

一年又一年過去
又到聖誕節 我出去幫手買聖誕裝飾搞公司party
行入商務諗住買下d聖誕掛飾

去到一個書架轉角嘅時候
我見到佢





我入去佢出去
個位比較窄 我打側個身讓條路比佢行
佢同我點一點頭 係我面前行過離開

短短佢喺我眼前行過呢幾秒
佢嘅氣質 佢嘅雙目 係幾咁動人 幾咁扣人心弦

到我攞完野 行返出書架嘅時候 我見到地下有個銀包
我執起左 打開銀包 係佢嘅學生證
錢就...Err... 係冇嘅

我追出去 嘗試睇下佢仲係唔係到
我環顧周圍 已經再冇佢嘅蹤影





因為我有d擔心佢返轉頭周圍搵銀包
所以我做左一樣本應唔會做嘅事
以我留意左佢咁耐 佢嘅ig 我係知道 雖然一直冇follow
我鼓起勇氣dm左佢 話左佢知我執到佢銀包
唔知佢睇唔到msg定點 佢未覆我
於是我去周圍d商場行左陣 順便等下佢有冇回應

過左一陣 佢終於覆我
佢問我係邊
我話我喺世貿 佢話而家過黎
係等緊嘅期間 我喺附近d商鋪買左道學業符
寫住“逢考必過” 然後放左入佢銀包

等左陣 佢到左 我揮手hi佢
我伸手遞返個銀包比佢





「我以為搵唔返 太好喇」

見佢放下心頭大石講左呢一句

我嘗試問佢：
「不如我地行一陣？」

佢表示要返去溫書 好快要走 但佢話都可以行一陣
我地喺附近海邊行左陣
沿途一路行都傾左一陣

行嘅呢一小段路 呢段時光 我係好珍惜 好開心

諗起喺另一個時空之下 都同佢咁樣傾過計
縱使呢份孤獨嘅記憶只活在我體內 無辦法同佢共享
佢並唔知我一路以黎嘅感情同感受
但今日呢個邂逅 足以抵得上所有野 值得我咁做

放左喺心入面好耐嘅呢句 「我鍾意你」
就一路埋藏喺我心入面好了