連環輪回不幸事件: 第三章：集合 (1)
「我一開始都唔肯定，但頭先聽到你哋嘅對話，我都幾肯定我哋而家確實身處喺輪回世界，雖然我唔知間陣醒番仲有冇而家嘅記憶，但如果有，記得要…上車，同埋拎…陀錶。我…開始…眼訓啦…聽日…陣間見…」四眼仔Andy講完就合埋雙眼，好似企咗喺度咁訓著咗。
「愈黎愈多人嚕！」Billy說。
「嗯。係呢，有冇…辦法可…以好似你…上次咁唔訓？」我問Billy。
呢個時候已經有八成人訓咗，包括黑仔同迪迪 。「冇架，靠意志囉！不過今次我都有啲…眼訓。下次…見…早抖…」Billy都訓埋。
我嘗試頂住唔訓，過咗一陣聽到廣播「請乘客捉緊…」好細聲，聽得唔清楚。慢慢見到其餘嘅人開始逐個消失，一個......兩個.....去到唔知第幾個時，我雙眼一黑，再見到有光嘅時候，已經係我聽到「如果我有逆轉的超能力」。
冇錯，又係我手機鬧鐘鈴聲，我又返到黎啦。今次我冇再賴床，一起身就做好出門口嘅準備。
你可能問點解仲要準備，反正過一陣又再輪回。可能我都抱住希望掛，希望一切都好似谷德昭咁講，幻覺黎架啫。但當然，去到攤檔嘅時候，我明白咩叫面對現實。
我比以住更自然咁拎咗自己隻陀錶，始終我有記憶中已經第三次，之前可能仲試過無數咁多次呢個動作。但唔知點解我有種違和感，係咩呢？人，攤檔，位置，一齊正常，係咩呢？好快我就冇諗呢個問題，因為，我見到大眼美女。
「Hi」我鼓起無比滴勇氣向大眼美女作出歷史性嘅一刻。
佢冇應我，係連頭都冇回，但我肯定佢聽到，因為我一Hi佢——即係打招呼，冇其他意思——嘅時候，佢就停咗一停，然後繼續行。
我feel到佢愈行愈快，可能係我嚇親佢掛……但我諗諗下發覺有啲奇怪，之前兩次佢都係慢過我入地鐵站，今次我仲早咗出門口，佢都仲快過我，唔通……既然歷史唔同咗，即係佢都好可能察覺到我哋輪回緊。好！我決定追上去問個究竟。
我完全冇平時個種淆底嘅感覺，因為我知我而家經歷緊另一件更恐怖嘅事，驚到我唔識得驚。或者同一個同病相憐嘅人一齊，就算唔出聲，心靈上都會好過啲。人就係咁，當你愈驚，你就會愈想逃避，愈想依賴人。所以我想追上去，唔關佢靚唔靚事，真係唔關。
當我追到上去，正想叫佢先發覺我唔知佢叫咩名，我只好係佢後面「喂」咗一聲。
「我冇見過你，你都冇見過我。」佢一路搖頭，一路「回應我」。其實我唔知算唔算回應我，畢竟佢實際上冇講過啲咩。
佢好緊張，隻手好用力咁捉住佢個斜孭袋仔條孭帶，而且語速好快，好似一早諗好咗點回應我咁，之後就轉身加快腳步咁走向地鐵站。
我心裡好清楚佢點解會咁，其實我一樣逃避緊，面對黑暗嘅將來，正常人又點會有心機媾女，我只係想將自己盡力飾演返正常生活時候嘅我，希望心理上覺得自己仍然活係正常嘅世界，儘管「媾女」係我平常唔會做都好。
但係我想講，我唔係媾緊女。