連環輪回不幸事件: 第七章：陰謀 (3)

整個計劃係大家根據Eric所講，喺之後慢慢討論出嚟，相信雖不中，亦不遠。
首先，經過數次調查之後，Christopher估到要擺脫呢個困局，最終只能夠剩返佢一個人生存，於是佢打算先喺美孚嘅攤檔整爛Elvis隻錶。當然，要盡量令隻錶睇落冇問題，拎咗都唔察覺先得。不過要破壞到咩程度，呢個就好難調查，所以佢打算用螺絲批拆開隻錶，將內部齒輪整爛，有咁爛得咁爛，希望令佢嘅穿越功能消失。為咗做到呢一點，Christopher喺呢次輪回嘅開頭做咗唔少練習。不過，退一步講，整爛隻錶係咪代表就能夠令佢失效就不得而知。總之，整爛咗先講。
之後再去埋荃灣、葵興、長沙灣，整爛曬所有錶就可以完成計劃；如果過程中唔夠時間，就可以先返去美孚，然後如常上車，只要中間過程唔俾人發現，就有無限嘅時間慢慢完成計劃。
不過天網恢恢，正當佢想按照計劃，破壞Elvis隻錶之際，Elvis就喺佢面前。這一章當然令佢措手不及，因為喺上一次佢已經調查過，呢個時間點應該唔會有人喺度。原來Elvis早就覺得佢有可疑，所以今次就提早到攤檔，睇下有冇發現。
可能係狗急跳牆，事敗嘅佢一個錯手將螺絲批插咗入Elvis嘅左胸，匿喺一邊觀察嘅Eric完全阻止唔切。Christopher見狀，除咗件沾有血跡嘅外套，拎走自己嘅陀錶，就馬上搭的士去荃灣，Eric亦隨即搭的士跟上。
Christopher落車後，馬上去到荃灣其中一個攤檔，打算繼續按原定計劃進行。雖然頭先發生咗意外，但從結果睇根本無分別，計劃一定要繼續，佢一定要生存到最後。好可惜，第二個意外又再出現。
 
Eric阻止咗想破壞陀錶嘅Christopher，而Christopher見又再被阻止，把心一橫想重施故技，右手高舉螺絲批，對準Eric心口插去。好在Eric早有防備，一隻手捉住佢手握螺絲批嘅右手，另一隻手就揮拳打向對方腹部。Christopher中拳後鬆開螺絲批，試圖以力量控制住Eric，兩人慢慢扭作一團。
呢個時候開始引起騷動，Christopher覺得唔可以逗留，於是就馬上跑走。Eric當然繼續追，但要捉到佢並容易，好在有第三個意外出現。
Billy突然出現。原來Billy喺茶記食緊早餐嘅時候，留意到窗外嘅騷動，發現到惹起騷動嘅主角係認識嘅人，就即刻追出嚟。追逐嘅過程中，Billy大致知道事情嘅始末後，就突然加速，試圖捉住Christopher。




就喺被捉到之際，Christopher轉咗落地鐵站，憑著人流避開咗Billy。呢個時候Christopher望望錶，發現已經到咗要上車嘅時候，比起俾人捉住，佢更擔心上唔到車會有唔知咩後果，於是佢就沖咗入閘。
去到月台，大部份荃灣友已經集合喺度等緊車，見到三人沖落嚟都感到愕然。
Eric趁呢個時候，大致同大家講述發生咗咩事，相信佢嘅人就慢慢包圍住Christopher，唔俾佢逃走，其餘半信半疑嘅人就係核心嘅外圍觀察。
呢個情況一直維持到我同迪迪上車……