連環輪回不幸事件: 最終章：待續 (3)

「吓？手握陀錶，然後細細聲讀哈利路亞chance？咁就得？」幾乎所有人都有呢個疑問。
「吓，係呀，喺幻覺入面嘅我記得係咁。」
「求婚大作戰咩！」我忍唔住講。
本身「哈利路亞chance」已經似係搞笑，加上係由SK把口講出，更加冇真實感。
「既然已經有方法，我想趁仲有少少時間，同大家講小小野。」Andy停咗一停，等大家注意力集中返自己身上，繼續：「我唔知我哋各自夢境中嘅地方實際喺邊，但點都好，如果陣間我哋真係去咗夢中嗰個地方，我哋先聯絡自己嘅組員，之後再聯絡其他人，大家記得曬所有人嘅電話號碼未？」
因為怕去到夢境之後，所有嘢都會「重置」，所以我哋決定記曬其餘11人嘅電話先。順帶一提，TB嘅夢境係屬於大自然組，Kiki係高樓大廈組。
「等等先，我哋唔知方法，突然就有人喺幻覺入面知道咗，你哋唔覺得好有問題咩？」Kiki問。
「有咩問題呀？本身我哋都可以憑口型估到，只係我哋一直冇為意到。如果個方法係由我哋自己估到，你就唔會咁諗㗎啦。死啦，我係咪好惡？」TB惡唔惡我唔知，但總覺得佢好似插咗我一刀，話緊我咁遲先同大家講有「口型」呢件事。
「嗯，只係咁橋咋嘛。」迪迪幫口。
「就係因為咁橋，我先覺得奇怪，好似所有野都有劇本咁。」Kiki道。




「可能...真係有劇本呢！」Andy加入對話。
「即係你都認同啦！」
「冇錯，一切都太橋。搵到所謂嘅線索、遇到幻覺、幻覺裏邊再被催眠，呢一切都好似俾人針對咁；相反，有人俾陀錶我哋、會用口型提供線索、幻覺裏邊嘅自己知道使用陀錶嘅方法，呢一切就好似有人幫我哋咁。如果我哋遇到嘅所有，都係人為，咁所謂嘅「咁橋」就唔係「咁橋」啦。」
「係...人為？我明啦，反正都冇其他辦法，搏一搏啦。」Kiki道。
「不過大家都唔好太樂觀，未試過我哋都唔知Work唔Work。」Andy道。
「總之唔好太樂觀，但都唔好太悲觀。時間都差唔多，我哋就搏一搏，單車都變摩托！」Bosco發司號令。
大家都懷住緊張嘅心情，手握陀錶，腦海中諗住夢中見到嘅場景。
「準備好就一齊嗌。預備，三——」
「等等！」Billy打斷Bosco嘅倒數。
「各位兄弟，仲有姊妹，我哋陣間見！」




大家對望，然後：
「好！」
「一定！」
「唔好盪失路呀！」
「大家小心！」
我望一望迪迪，再望向大家：
「陣間見！」
之後我哋一齊嗌出「哈利路亞change」，荃灣海濱公園嘅12人就咁消失咗。
然後呢個世界繼續如常運作，時間好快就到咗00:00，呢個世界終於可以迎接1月31日。
我哋對呢個世界再冇影響，但呢一刻我哋完全估唔到，我哋會對夢中所見嘅三個世界，唔止，係對整個宇宙有咁大影響。




故事雖完，但仍待續……