是咁的，我做咗份好奇怪嘅intern: 第十章

散場的時候十分混亂，我們也再見不到她們兩個了，不過……

「喂！！！」晚飯的時候，阿晴忽然拍我。「林樂婷tag咗我地喎！」

我立即查看她的動態。

「Omgggggg第一次玩 #Gamma射扇 好開心好開心好開心 多謝 @chingtinpigleg @ming_30624700 識到你地真係好 <3」

我立即讚好，再留了個言。





「進度睇嚟唔錯喎。」阿晴看來也很滿意。

「不過要再爭取見面，而家咁樣唔會有後續發展。」

於是我story post了那張Beta簽名版海報，並附了一句:「多咗一張，有無人要」。果然不出我所料，林樂婷很快便回應了我。

「我想要🥺」

「得唔得呀👉👈」





就怕你不要。

於是我成功跟林樂婷聊天，她這個人熟絡了以後，還是很願意說話的。

與此同時，我們開始另一階段的準備工作。今天我們回了公司，跟忠哥開會。

「你地嗰邊進度如何？」忠哥一來便問。

「非常良好，成功同佢地熟絡咗，ig有同林樂婷keep住傾計。」我首先匯報。





「人地仲成日秒回佢添。」阿晴似笑非笑的補充。

「咩豬話？咩叫秒回？」跟時代脫了節的忠哥一臉茫然地問，阿晴只好稍作補充。

「哦……咁聽落幾好喎。今日叫你地返嚟係有原因，我已經諗好成個計劃。」

說罷，他拿出了林偉琪這個星期送貨的路線。

「就係呢轉，朝早五點半，由荃灣送去黃大仙，我估計佢會行龍翔道。計畫係整到佢個迫力失靈，撞車而死。」

雖然我不知道忠哥怎樣確保他的車到高速行駛的時候迫力才壞，但忠哥說他懂得處理。

「但係撞車都唔一定死架……？」我疑惑地問。

「你揸槍都唔一定射得中架啦，我地只可以做啲嘢增加成功率。真係唔得嘅，之後再補刀。而家分配工作，阿晴，你去同救護嗰邊溝通，確保佢地唔好咁積極搶救。阿明，星期三晚你要同我去搞壞佢部車。你地而家邊個負責同林樂婷聯絡？」





「佢，不過要聯絡我都可以。」阿晴答。

「Ok，咁你繼續負責。我今日要交代咁多，冇乜嘢你地可以走喇。」

忠哥離開以後，阿晴說想看看我跟林樂婷的對話。

「嘩……你地進度俾我想像中更加良好喎，佢三四分鐘就覆你一次，溝死女啦！」阿晴一貫的口吻跟我說。「不過你要小心啲，要識得抽身。始終你而家係殺手，完事之後唔可以同佢有太多聯絡，直至你實習完畢。」

說實話，跟林樂婷談話是頗開心的，要抽身也實在不太捨得。不過沒辦法了，現階段只可以這樣。

這種內心的交戰，在星期三晚來襲得更狠。前往和忠哥會合的路途上，依舊收到林樂婷的訊息。

「做緊咩😆」





我不愛說謊，但我要怎樣才能告訴你，我正在預備殺掉你的父親？

「同緊你傾計囉🤭」

這種一半開玩笑一半曖昧的對話，又可以持續多久？