那些被錯過的人: 誤會

『唉...都係落去啦。』

「咦～咁快下次喇？」阿悠換咗身便服，小背心，真理褲，將佢嘅長處完全表露無遺。
「你杯雪糕。」
「做咩拎俾我？」
「咁我話請你食嘛，呢杯又係你自己揀嘅。」
「我食咗你個杯啦，再食會肥。」阿悠摸一摸自己個肚。
「咁你放雪櫃囉！同埋。。你都唔肥。。怕咩食多杯呀。」
「嘻。咁你等陣。」佢隔住個鐵閘，拎走咗杯Haagen-Dazs，然後聽到閂雪櫃嘅聲。
「搞掂喇～」佢行返出，我哋對望咗吓。

「你唔入嚟？」
「隔住個閘點入？」

我望咗眼佢條腿，加上佢件衫，入咗去真係會把持唔住，都係盡快走。

「你。。其實係咪冇乜朋友？」
「。。。」佢黑哂面咁睥住我。
「冇惡意咖，想同你做朋友咋。你唔想就。。」
「林俊杰！」佢打開鐵閘行出嚟。
「咩。。咩事？」佢突然伸隻手入我褲袋。

「喂！又嚟，唔好搞喇！」佢係我褲袋拎咗部電話出嚟。
「開鎖。」
「係。。」

我聽到佢電話響，原來佢打俾自己。

「你返上去啦。」講完佢就入返去。
「唉，俾人抄牌添。」

第二日返到學校，阿悠同平時一樣。

而我就不停諗放學之後要做嘅事。

4點45分，係時候去圖書館還書。
「阿杰！」諾曦見到我，大大力對住我揮手。
「諾曦，我想還書呀。」
「好呀！咦？但你上次唔係借呢兩本啵。」
「哦～幫朋友還咖。」
「原來係咁，你咁好人嘅！」

「搞掂喇！」
「搞掂喇？我仲想還埋呢兩本。」我喺背後再拎出兩本書。
「哈哈！你做咩收埋兩本書呀？仲有冇？」佢企起身睇我背後。
「其實仲有八本要還。。」我拎哂收喺背後嘅書出嚟，呢個舉動引到諾曦傻笑，笑到停唔到。
「你。。你一次過拎出嚟嘛。」





「搞掂哂喇！你唔會仲收埋幾本咖嘛？」
「你估吓！」
「唔好呀你！五點喇，唔可以再還書，同埋我都要走喇。」
「冇喇～咦, 你要走喇？不如一齊走吖？」

一切都係我嘅計劃入面。
我當然知道過咗5點唔可以還書啦，仲知道過咗5點圖書館主任一定會叫管理員走先添，所以我先等到4點45分至入嚟還書。

「可以呀，咁你喺出面等我啦。」

過咗15分鐘，諾曦同兩個女仔一齊行出圖書館, 佢見到我之後就叫兩個女仔走先，話要上去開Locker。

佢哋分開咗之後，我就行過去。

「走得未？」




「未得，你陪我去4樓呀。」
「好呀無問題。」
「咦？」

上到去之後，佢唔係行去Locker嘅方向，而係行去佢班房，望到閂咗燈之後，佢就行返轉頭。

「你漏咗嘢呀？我幫你爬入去拎呀。」我打開咗佢班房嘅窗。
「唔係呀～我望吓阿然佢哋仲喺唔喺度咋。」
「哦～你搵阿然做咩呀？」
「冇嘢呀～我哋行啦。。」
「你住邊咖？」
「我住亨德村咖，你呢？」
「咁我哋唔同方向喎，我住善翠苑咖。」

  我哋一路有講有笑，話咁快就行到去分叉口。

「咁我哋聽日見啦。」諾曦對住我微笑，準備揮手。
「啊！唔記得咗今日約咗人去善翠苑間麥記添。我同你一齊行吖。」
「又會咁啱嘅？哦～你約咗上次個靚女？」
「唔係啦！做乜約佢，佢又唔係我邊個。」

我即刻同阿悠劃清界線，原來諾曦一直以為阿悠係我女朋友。

「阿希仲話佢上咗你屋企添，原來你哋住同一棟咖。」
「阿希講嘢，你信兩成好喇！」鄧希源，今次真係多得你唔少喇，搞到我花咁多時間澄清。
「係呢，你同阿然好熟咖？」
「你話呢，我哋日日一齊食Lunch咖。」
「佢係咪好多人鐘意咖？」
「都多咖，好多靚女添，不過佢一個都冇揀。」
我見到佢眼神有啲失望，我好想問佢係咪鍾意阿然，不過我冇呢個膽量。





「我樣又唔靚，又生得矮，應該冇人會鍾意咖喇。」
「唔係呀，你個樣都幾可愛吖，唔一定要靚到阿雪或者高到阿洳咁先有人鍾意嘅。」
「我得160咋！」
原來佢有160 ，阿悠高佢少少，但望落去高佢好多，睇嚟身形比例真係好重要。
「你啲男仔唔係睇樣就睇身材咖喇！」
佢講出咗世界嘅真理，但我都要反駁一句。
「可愛都係一種美嚟咖，不知幾多男仔鍾意細細粒。」

行到佢屋苑，佢叫我去搵朋友，而我就堅持送咗佢返去先。

因為我根本冇約人。

「啊，不如你俾你電話我吖，我哋都幾啱傾，可以whatsapp傾。」

佢竟然先過我問，我拎部電話出嚟，個電話震咗一震，原來有人搵我。

04:05    蕭樂悠    等陣上我嚟度

「哇，靚女約你喎，仲要上屋企！」真失策，我估唔到阿悠會Send段咁有幻想空間嘅Msg俾我，仲要俾諾曦睇到。
「唔係呀，佢。。佢玩嘢咋，佢好鍾意講笑，你識佢就明咖喇。」我好緊張咁解釋，希望諾曦唔好誤會。
「得喇～知你地冇嘢喇～你去搵人啦。」

諾曦講完轉身就走咗。我行到一半先發現，我哋無交換到電話。

「最衰都係你！蕭樂悠！」我氣沖沖咁就準備去搵阿悠。


續