那些被錯過的人: 班會活動

我喺黑板上面，寫住「中秋班會活動」。

地點係善翠公園，一個每年中秋都聚滿人嘅地方。

「8點？」

主席大人突然打斷我。

「學生唔應該咁夜喺條街游盪，我認為食餐飯就夠。」果然，呢條友係嚟踩台。





「其實年年都係咁，學校又冇意見，定你年年冇人約，所以唔知？」

「校規係咁寫。」佢無視我向全班同學講。

Miss Wong企喺我哋中間，嘗試化解呢個場面。

「你講得啱，應該遵守校規。咁活動取消啦，大家跟主席去餐廳食月餅。」

「阿希！８點公園等，不見不散！」

我好大聲講，向所有人暗示活動繼續。

「悠，中秋有冇約人呀？」

「７點半，樓下等。」

我哋就好似忘記咗琴晚發生嘅事，簡單直接就約咗。


放咗學，我去咗4C。





入到課室，我見到阿然，諾曦同另外兩個女仔企埋一齊。

「阿杰！」

諾曦拉我過去，介紹我俾另外兩個女仔識。

「HI，我係阿婷。」

「我叫Cathy。」

「Cathy！哈哈哈！做乜用英文名呀！」

阿婷笑得好大聲，不過Cathy完全無視佢。





「你哋好熟咖？」

「啊。喺圖書館見過囉，講過兩句。」

Cathy望住我笑，好似知道啲嘢咁。

唔通佢咁醒，咁快睇穿我？

「諾曦話你把聲好好聽，好想日日同你傾電話喎。」

「冇呀！我話你把聲好聽咋，冇話要同你傾電話！」

「扮哂嘢，個晚同你傾電話，你明明係咁講！」

「冇！上次係屋企樓下，唔記得咗問佢拎電話，都冇得傾。」





唔解釋好過解釋，Cathy同阿婷聽完瘋狂抽水。

我承認我暗爽，但望住諾曦不斷解釋，其實我有啲失望。

我同Cathy對望咗一眼，呢一刻我喺度諗。

如果我同佢熟啲，佢會唔會幫我追諾曦？


最後我知道佢哋都去善翠公園，咁我就可以借機過去玩喇。

目的達成，我同佢哋三個道別之後，就離開咗班房。

行到後樓梯，聽到後面有人嗌我，我擰轉頭發現係Cathy。

「要幫手就出聲喇！」

佢剩係講咗呢句，就轉身入返課室。


返到屋企，我行咗去窗邊發呆。

今日聽唔到任何聲音，呢份寧静好陌生。

有少少唔習慣，但又有種開心嘅感覺。

「喂！！」

「咩事呀你？」





「記住星期五7點半呀！」

「知喇，白痴仔！」


續