那些被錯過的人: 吸引

「收皮。」

一返到班房，就俾阿悠黑面。

不過又真係我唔好，拉佢去班會活動，但又走咗去。

名符其實重色輕友，難怪佢會咁嬲。

「喂，我知衰喇，咁小氣咖。。」





「咁你去咗邊？」

佢呢刻嘅眼神，彷彿望穿我內心，我內心一震。

然後我話俾自己知，呢刻一定要講真話。

「我去咗搵人。。」

「搵邊個？」





「我。。我去咗搵諾曦。」

我將嗰日發生嘅事，一五一十講哂俾佢知。

我什至話俾佢知，我鐘意諾曦。

「佢攬得你咁實，所以佢都鐘意你？」

「你又知？」





「我見到佢攬住你。」

「啊。。我送佢返屋企啫。嘻嘻。。」

睇嚟佢真係去咗搵我，又真係俾佢搵到，仲見到諾曦攬住我個刻。

我只能勉強咁迫咗個笑容出嚟。

「成日都有女仔投懷送抱。」

「痴線！邊有成日？你幾時見過？」

「感覺。」

佢輕輕將頭髮撥向耳仔，露出咗佢嘅左耳。

佢嘅耳仔好靚，小巧得嚟白裡透紅，輪廓好均勻，令人有股衝動想咬落去。

「原來你鍾意呢套。」

阿悠側頭望住我，嘴角微微上揚。

佢雙眼比平時更濕潤明亮，加上窗外射入嚟嘅光，雙眼就好似鑽石咁。

我望住佢雙眼，就好似直視緊美杜莎雙眼，全身慢慢石化。

唔同嘅，就係呢一刻喺我面前，並唔係怪物，而係女神。

我哋對望一刻，阿悠輕輕挑咗一吓眉，我俾佢呢個動作解除咗石化。

我移開眼神，唔敢再望佢雙眼。

佢嘅眼神，加上笑容真係會殺死人。

如果我唔係鍾意諾曦，我應該會瞬間沉船。

「啊，呢套？都。都都係咖。。」

我感覺到自己心跳加速，我終於感受到咩叫「電親」。

「嗯。」

阿悠輕輕回應我，就繼續望返黑板上堂 。

之後我哋就無再傾過計，直到小息後嘅第二堂。





「Class as you know, we’re going to have a short quit today. If you fail , please stay after school today.」

呢位係英文老師Miss Yuen，為人極度嚴厲，默書唔合格基本上都要留堂30分鐘。

Fail的話更加唔洗講，留到合格先準走。

「仆街，完全唔記得呢件事。」

「知你都唔會溫喇。」

「係呀，但起碼我會扮肚痛嘛！」

我相信好多人都用過呢招嚟避堂。





短短20分鐘嘅quit完了，之後就係改卷。

如果係同隔離位掉轉改，咁我就避過一劫。

但世事邊有咁好，Miss Yuen將啲卷洗勻之後再派返俾我哋，完全隨機。

我好好彩收到主席大人個份，因為佢基本上全對，唔洗幫佢寫model answer，省返啲力。

改完之後，Miss Yuen問大家邊個手上份卷係fail嘅請舉手，我見到主席大人同阿怡舉手。

中獎嘅就係我同阿悠。

Miss Yuen拎起我哋份卷，突然火冒三丈。

叫阿悠企起身，然後用一堆英文開炮。

原來阿悠交白卷，所以佢先咁嬲，最後我同阿悠今日要罰留堂到5點。

但有樣嘢我諗唔明，點解阿希會無事？

「喂，點解你Pass咖？」

「哈哈！因為係阿明幫我改！本身都諗住要留堂咖喇。」

「食屎喇！」

「咁你又唔好彩嘅，主席幫你改卷，隻字寫樣衰少少佢都圈你。」

「唉。。」

「不過同阿悠兩個人留堂喎，你哋係咪夾埋咖？」

「兩個人？」

「今日係星期一嘛，啲老師開例會開到5點幾，成個班房咪得你兩個囉。」


續