那些被錯過的人: 萌芽的友情

嗰一日之後，過咗兩個禮拜，我哋之間好似無事發生過。

阿悠對我嘅態度好咗好多，轉堂嘅時候仲會傾兩句計。如果大家唔洗留堂，又冇嘢做，仲會一齊返屋企。

不過嗰晚嘅情景，喺我腦海揮之不去，我有時仲會拎嚟做素材。

而我同諾曦，幾乎日日都傾whatsapp，呢兩晚仲煲夜粥到1點幾先訓。

「星期六我哋班約咗睇戲，你嚟唔嚟呀？」





「你哋班喎，關我咩事？」

「一齊去喇～我同佢哋講聲就得咖喇。」

「都唔熟。。」

「就咁決定！唔。準。放。我。飛。機！」

就係咁，我被「強制出席」呢個班會活動，除咗我同諾曦，仲有阿然，Cathy，阿婷同埋另外幾個人。





而時間好快就嚟到睇戲前一日。

「鈴！！！！！！」

3點15分，落堂鐘聲響起，因為係星期五，大家都雞咁腳離開學校。

「你等陣有冇嘢做？」阿悠問。

「無。。」





「咁你可唔可以陪我去一個地方？」阿悠孭起袋企喺我面前。

「有咩好介紹？」

「冇。只係想有人陪啫。。」

「哦好。但要請我飲嘢！」

「是但。」

「好嘢！悠悠請飲嘢！」

「再咁叫我打你咖！」阿悠舉起手作狀想打我。

雖然斷估佢都唔敢打我，不過都係唔好試好啲。我哋離開咗學校，行去巴士站。





「要坐車咖？」

「係，去舊邨。」

我哋區比較大，學校位於市中心附近。近鐵路嗰邊有條邨，有大型商場食肆，所以我哋習慣叫新邨。

而舊邨故名思義，就係比較舊嘅區，得一架巴士入到去。

市中心行入去都要15-20分鐘，嗰度得一座單層屋邨商場，人流好少，但就細鋪林立，各式各樣嘅嘢都買到。

「哇我好耐無去嗰邊啦，順路買糯米糍食呀。」

舊邨有對公公婆婆不定時出嚟擺檔，賣自己親手整嘅糯米糍，十蚊有三粒，好好生意，好快就賣完。





「糯米糍？」

「係呀，有對公公婆婆係街邊賣咖，粒粒拳頭咁大。」

「係咩。。不過應該無賣喇。」

阿悠好平淡咁回答，我正想問佢點解嘅時候，諾曦突然搵我。

你係邊呀? 15:34

「邊個嚟？」阿悠伸個頭過嚟，而我都無咩需要避諱，所以由得佢望。

去買糯米糍食!(笑) 15:35
咁好?同邊個? (疑問) 15:35





雖然阿悠都算高，但同我相比仲有段距離，佢睇嘢嘅時候，將塊面貼咗喺我膊頭旁邊。

「如果俾佢知你同女仔一齊會點？」

「梗係唔可以啦！」

我擰過去望住阿悠，呢刻我哋距離好近，嘴唇之間只係相差幾厘米。

「咁如果俾佢見到我哋錫呢？」

阿悠輕輕嘟起個嘴，而我即刻向後退開。

「講笑咋，咁你點覆？」阿悠再一次行近我，我哋膊頭貼住膊頭。

哈哈同好朋友去 15:36





「好朋友囉。」

「咩呀，宜家唔係咩？普通人我唔會俾佢咁抽水囉！」我指住佢個膊頭。

車到咗，我哋坐喺最後排，不斷講學校嘅八卦，細聲講大聲笑。

隔離坐咗幾個男學生，佢哋眼甘甘望住阿悠，然後細細聲討論。

「你望咩？」

「無，我見對面班仔係度眅你啫。」

我指一指對面班仔，班仔即刻避開眼神。

「哦。。你上堂都成日眅我。」

「吓。。你條裙咁短，條腿又長，係男人都望喇。。」

「死鹹濕仔，你塊面紅哂喇。」

「不如你買返條長啲嘅校裙喇。」

「長啲？」

「係呀，俾人睇蝕哂，等陣有變態佬跟住你就麻煩。」

阿悠聽完無俾反應。

「我建議吓咋！唔好嬲，唔換都得！咁我可以繼續眅嘛，嘻嘻。。」

「死鹹濕仔。。」

過咗10分鐘，我哋差唔多去到舊邨，準備落車喇。


續