那些被錯過的人: 跨班活動
返到屋企樓下，阿悠問我聽日有咩搞。
我好直接講，約咗諾曦佢哋睇戲。
「哦，咁你加油。」
我返到去，沖完涼就訓咗，因為約咗聽朝11點巴士站等。
第二日，我好早出咗門，10點3已經喺巴士站附近嘅茶餐廳食早餐。
「杰！」茶餐廳門外有人大叫我個名，我望出去見到諾曦同阿婷。
「喂咁啱嘅。」
我內心一陣喜悅，而佢兩個當然坐過嚟。
「你食咩呀？」
「我叫咗餐蛋麵呀。」
「咦咁唔健康咖。」諾曦皺住眉講。
「我好鍾意食餐蛋麵咖。」
「唔好食咁多呀，會肥咖！」
「知道。」
諾曦指住塊餐肉，然後我一啖就鯨吞咗，再望一望諾曦。
佢依然皺住眉，翹住手望住我。
「聽講你琴日去咗舊邨喎。」
「係。。係呀。你又知？」
阿婷突然開口講嘢，同時拎起對筷子插喺我碗麵度，唔知點解有種比人審問嘅感覺。
「口窒窒嘅？做衰嘢嚟呀？」
「吓？我可以做咩衰嘢呀。。」
之前我剩喺留意Cathy，無留意阿婷。
佢係一個完全唔起眼嘅存在，要形容佢嘅話，平平無奇，男仔頭。
「玩吓啫，唔洗緊張喎。」
佢拎起對筷子，夾起一注麵，然後放入口。
呢一刻我只有一個感覺，就係我同佢絕對做唔到朋友。
「你哋快啲嗌嘢食喇。」
我見到諾曦個樣有少少尷尬，所以好快扯開話題。
後尾先知道，原來係諾曦話俾佢知，我琴日去咗舊邨。
食完嘢之後，我哋就去咗巴士站坐，阿婷一個人坐埋一邊玩手機。而我同諾曦就坐埋一齊。
「嗯。。你唔好怪佢呀。。佢個人係咁粗魯咖。。」
「哦。唔緊要喇，不過你兩位朋友都幾有性格。」
「係咩？」
「係呀，Cathy就大剌剌，阿婷就更男仔頭，應該話根本就男人嚟。」
我豎起三隻手指，放喺太陽穴扮滴汗。
「佢好好咖，好保護我。有次行街我俾大叔望，佢即刻兇個大叔，阿叔俾佢兇到即刻走咗。」
「咦，睇嚟啲大叔啱你呢款喎。」
雖然諾曦唔算好靚，又唔係白白淨，塊面仲有啲包。
不過最重要係佢笑得好睇，仲有一雙笑眼。
「吓。。唔好喇。。」
「等我今日數吓有幾多大叔望你先。」
「咁如果有嘅話。」
「我會幫你兇走佢！」
諾曦聽完之後，笑咗一笑。
11點，除咗阿然同Cathy之外，全部人都到齊。
Cathy因為唔係住呢區，所以喺嗰邊等我哋，而阿然就。。唔洗諗一定訓過龍。
我經驗豐富，約親佢出去，都預佢起碼遲半個鐘。
果然佢11點半先到，佢一到埗，阿婷已經開砲轟佢。
另一邊廂，諾曦都收到Cathy嘅訊息，知道佢啱啱出咗門，所以我哋就上車啦。
我原本以為阿然會坐我隔離，但尾隨我嘅諾曦，好自然就坐咗我隔離，而阿然就同咗阿婷坐。
半個鐘嘅車程，我哋傾咗好多嘢。
「你知唔知Miss Wong幾時生日呀？」
「好似8月，做咩咁問？」
「你又知？」
「第一日返學，佢第一件事就將佢生日寫喺黑板。」
「吓，真係8月，我仲諗住買禮物俾佢添。」諾曦有少少失望。
「唔緊要喇，你補返俾佢囉。」
「咁你聽日陪我買呀。」
「哦，但係點解唔今日買？」
「今日咁多人。。」
即係諾曦宜家約我單獨出街？我有一個大膽嘅想法，唔通佢鐘意我？
「好，今晚傾吓幾點出發啦。」
「你做咩笑到咁衰呀？」諾曦皺起條眉問。
幸福嚟得太突然，我完全冇察覺自己笑得咁開心。
「開心嘛，有得行街。」
「吓？我。。我。。簡禮物咋，同你行街無無。。無其他意思囉！」
「我知呀，都無話同你出去開心！哈哈！」
諾曦面都紅哂，仲回避我眼神。
我見到佢個樣大笑咗出聲，而諾曦見我笑成咁，揮手打咗我手臂一吓。
「啪」一聲，成個車廂靜哂。
「阿杰激嬲諾曦俾人打呀！」
阿然打破沈默，其他人聽到之後都起哄。
本來諾曦塊面已經紅，加上其他人嘅反應，佢塊面變得更紅，我望住佢忍唔住又笑咗出聲。
續