那些被錯過的人: 第一次

「你幾點打波呀？喺邊度打？校隊呀？」

我哋排隊等車嘅時候，諾曦連珠炮問咗好多問題。

「哈！你咁多問題嘅？」

「咁我想知呀嘛。。」

「搞到好似我女朋友咁。」





「吓？」

「唔似咩？管住哂，哈哈！」

「唔管囉！」

諾曦個樣唔似抗拒，嘴角仲好似笑緊咁。

呢刻我心諗，會唔會佢都對我有意思呢？

我應唔應該襯呢個機會表白？

「諾曦，我想講呢。。」

「係？」

我望住諾曦，感覺到自己塊面好熱，而佢嘅眼神溫柔又期待。

「其實我呢。。」

原來表白係咁難。

「我。。其實。。」

特別當望住佢雙眼，我突然鼓唔起勇氣。

 「屌！你兩個係咪上車咖！」

一聲怒吼喺我哋身後傳出，係一個阿伯。原來喺我準備表白嘅時候，巴士已經到站。

我哋前面嘅人已經上哂車，所以大叔先咁躁。

 「啊！Sorry！」

諾曦一手拉住我衝上車。

為咗避開大叔，我哋上咗上層最後一排。

 「笑死！」

「有咩好笑呀？俾人講粗口鬧喇。」諾曦輕拍我手臂。 

「等陣佢行上嚟點算呀？」

「唔緊要，我話過會幫你兇走啲大叔咖嘛！」

 「。。。」

諾曦笑一笑，之後耷低頭無出聲。

大叔最後無上到嚟，而諾曦一直都無出聲，入咗隧道，佢先抬返起個頭望出窗。

我望住車窗反射嘅諾曦，發現佢亦望住我。

隧道嘅黃燈不停閃爍，而我哋就一直望住對方。

 『我真係好鍾意你。。』

「杰，你邊度落呀？」

「我送埋你返去先啦。」

「吓？你唔會遲咩？」

「唔會！」

根本無打波呢件事，又點會遲呢？

落車已經差唔多7點，天亦都開始黑。

我哋慢慢行返去，路上有講有笑，直到佢屋企樓下，我覺得係個好時機。 

「諾曦。我其實好。。」

我決定鼓起勇氣。 

「其實我今日好開心呀！」

「吓？點解呀？」諾曦打斷我講嘢。





「其實我都係博吓，叫你嚟睇戲，點知你又應約。我好開心你陪我，唔係！係陪我哋睇戲，又抽到同你坐，我真係好開心。。」

我無俾任何回應。

「同你一齊真係好開心！」

諾曦望住我，露出一個好可愛嘅笑容。

呢個笑容，會永遠刻喺我腦海中。

「我哋聽日見喇。」諾曦轉身跑入大堂。

「喂！聽日幾點呀！」我向住大堂嗌過去。

「2點喇，但你要嚟接我！」諾曦背住我講。

「好！」


續