那些被錯過的人: 鬼亭

諾曦把聲震哂，然後唔出聲就走上去，我即刻轉身跟住。

「喂！諾曦！」

佢冇理我，所以我加快腳步追上去。

「你傻咖？做咩跟埋嚟？」

我拉住佢隻手，佢先停低。

佢轉身望住我冇出聲。

我隻手就一直捉住佢。

「你驚可以返去，或者喺度等我？我影完之後同你返落去。」

「一齊上去喇，你都係讓我先輸啫。」

「我唔讓你，你咪要一個人上嚟？」





「係咖。。好彩你讓我咋。。雖然我最後都跟咗上嚟。」

我不斷同佢傾計，嘗試引開佢注意力，等佢冇咁驚。

「不過如果你輸，我都會好似你咁，跟埋上嚟。」

「點解？」

「點解？因為驚你嚇到瀨尿！哈哈！」我指住佢然後大笑。





「車！仲以為咩原因。。」諾曦耷低頭講。

我冇答佢，因為宜家未係時候。

「哇，咁快就到啦。」

行咗幾分鐘，就見到傳說中嘅鬼亭。

呢度同傳聞一樣陰森，附近得返一支街燈。

因為日久失修嘅關係，油漆已經甩到七七八八，不過仲隱約見到本來嘅紅色。

唔知係咪心理作用，我覺得呢度除咗我哋，仲有其他人存在。。

「我哋快啲影完走喇。」

諾曦行到好近，雙手緊緊捉住我手臂。

我拎部手機出嚟，背對個亭自拍咗一張，然後send俾Cathy。

「點解你有佢電話嘅？」

「佢搵我先嘅，我唔知點解佢有我電話。」

「幾好呀，俾人抄牌，我咁大個女都未試過。」

「你俾部手機我。」

「做咩事？」諾曦覺得好奇怪。





「Cathy叫我用你部手機影一張喎。」

當然Cathy冇叫我咁做。

我拎住佢部手機，打咗俾自己。

「喂你做咩呀？」

諾曦想搶返部電話，但唔成功。

「我抄咗你牌喇，你都save低我電話喇。」

我遞返部手機俾佢。

佢拎返之後，細細聲講咗句「蠢才」。

然後Save低咗我個名做「蠢才」。

「咁嘅你？咁我都Save你做蠢才先！」

諾曦聽完我講之後，用拳頭不斷打我。

而我用手擋佢，我哋都笑得好開心。

開心到忘記自己身處鬼亭，直到諾曦手機一響，「叮！」

「你兩個後面！」

嚟自Cathy嘅一段訊息，嚇到諾曦尖叫。

佢撲咗落我度，好大力攬實我隻手。

「無事無事，佢玩嘢啫！」

我用手輕拍佢個頭，同時向後望，確認後面真係冇嘢。

「不如走囉。。」

諾曦俾段訊息嚇到喊咗出嚟，所以我同佢就起程返去。

「無事我係度。」

回程中，諾曦仍然攬實我手臂，而我不停安撫佢。


我呢刻係度諗，如果呢刻「鬼打牆」，你話幾好。。


續。