雞仔聲表姐（全篇完）: 再嚟一次
（10）再嚟一次
某日，Johnny打電話俾Chloe。
「忙唔忙呀？」
「忙呀，幫啲客搞claim保險，又要揾新客。」Chloe講：「你呢？」
「無乜客，我好得閒。」Johnny講：「一齊食lunch吖？」
「唔得呀，無時間食，求其食三文治咋。」
「咁慘？」Johnny：「咁食晚飯吖？」
「我要上堂喎。」
「上堂前有無時間？」
「咁…」Chloe講：「食快啲都得嘅。」
「咁陣間食快餐喇。」
「Ok，我做嘢喇，再電聯。」
兩個有協議後，有時間就去拍拖。不過Chloe份工忙過Johnny，而且又要返學，所以拍拖時間唔多。
感情有增長，只係慢慢增加。
雖然如此，Johnny都係開心…
因為佢正式做Chloe男朋友，遲啲做埋佢老公㖭。
Johnny開心，但係Chloe越嚟越唔開心…
因為報告未有，月經都未有…
唔通真係有咗？
「醫務所呀，我係蘇雅兒，份驗孕報告有未呀？」
「蘇小姐，唔好意思仲未有。」
「好耐囉喎，仲未有？」
「因為我哋要嚴謹，所以時間會耐少少，放心一有報告會通知妳。」
「會唔會係有咗，所以要check嚴謹啲？」
「唔排除哩個可能性，如果真係咁擔心嘅，可以用驗孕棒，不過只係參巧性質。」
「咁…」聽到職員咁講，Chloe心大心細…
買唔買好呢？
Chloe擔心時，Johnny又打俾佢：「Chloe，妳今日係咪返半日呀？」
「係呀。」
「有無時間食晚飯？」
「可以吖。」
「咁妳想去邊度食。」
「無所謂，你揀間靜靜哋嘅餐廳，我有嘢想同你講。」
「好吖。」
Johnny搵到間餐廳，之後whatsapp咗地點俾Chloe，之後兩個會面。
Johnny見到Chloe，眼前一亮…
因為Chloe衣著係白恤衫黑短裙，黑絲黑高踭鞋…
即係性感OL！
「Chloe，好靚女喎。」Johnny拖Chloe手仔讚佢，Chloe微笑回應。
因為微笑，所以無瞇成一線眼，Johnny feel到Chloe有啲嘢，就問：「妳有心事？」
「係呀，份報告仲未有…」
「吓，咁耐嘅？」
「係囉，佢話要嚴謹啲，所以耐啲。」
「唔緊要喇，有又好無又好，我都會娶妳。」
Johnny嘅說話，聽在Chloe耳中安慰唔到佢。
「你就講得輕鬆，要考慮好多嘢嫁。」Chloe講：「我想買驗孕棒check check。」
「好吖，我幫妳買。」
「ok。」
Chloe話ok，Johnny即刻走去買。佢一講即做，比起前度掛住玩係好得多。
覺得Johnny諗嘢未夠成熟，但係本質係好…
哩個係初步評價。
好快Johnny返嚟：「我買咗喇。」
「Thank you。」Chloe攞咗枝棒，睇睇時有把熟悉聲音傳出。
「又捉到妳哋撐枱腳喇！」
講嘢嘅係Sandy！！
Chloe見到Sandy出現，即刻收埋枝驗孕棒。可惜收得快唔過Sandy對眼，俾佢發覺收埋嘢。
「鬼鬼祟祟收埋啲咩？」Sandy伸個頭埋去昅，哩一刻Chloe見到Sandy旁邊有個男人，就問：「妳朋友？」
「係呀。」Sandy攬住個男人手臂，講：「佢叫Alan。」
「Hi。」Alan同Chloe say hi，Chloe都hi返佢轉頭。
「咁啱妳哋又嚟哩間食嘢？」Chloe問。
「想囉，不過無位。」Sandy講：「係喎，我哋坐埋嚟一齊咪得囉！」
坐埋一齊？
都同Johnny傾咗驗孕棒…
「好吖。」
「真係好姊妹！」Sandy攬住Chloe錫咗塊面一啖，跟住坐低再介紹：「哩個係我姊妹Chloe，隔離果個就係佢男朋友Johnny…」
「而哩個就係我條仔Alan。」Sandy攬住Alan講。
「佢係我條女Sandy。」Alan講笑，引到Chloe大笑：「哈哈，你條仔咁搞笑嘅？」
「我平時好木獨，係見到靚女先多嘢講咋。」
「哈哈哈。」
Alan高大有型，加把氹女口材成個食女專家咁，同Johnny比外型贏幾條街…
佢不停講笑，搞到Sandy、Chloe笑不停。
佢嘅出現好似吸引到Chloe，Johnny湧起醋意。
條友係咁引Chloe笑…
搏乜呀？
想溝我條女？！
Johnny唔老黎，响三個笑、一個扁嘴情況下食完飯。
「我哋咁開心，去飲嘢吖？」Sandy提議，Chloe對飲酒麻麻，就講：「唔喇，我哋…」
「又去搞嘢？唔好重色輕友喇！」Sandy笑住拉Chloe隻手：「陪我玩陣吖。」
「咁…」Chloe唔想推佢，正想答應時Alan講：「係囉，落去飲番杯吖。」
「Ok。」
Chloe應承去，Johnny見到就唔開心。
Sandy叫妳唔去，條仔叫妳就去…
貪人靚仔吖？
哼！
埋單走人時，Johnny即刻拖住 Chloe宣泄主權…
話俾Alan知Chloe係佢條女！
Alan望見佢哋拖手，專登响Chloe面前拖Sandy…
拖住Sandy行，不時望向Chloe，佢係想對Chloe打心理戰，引起佢興趣。
Chloe無望Alan，只係同Johnny講講閒偈。
無幾耐去到酒吧，一入到去侍應講：「Hello Alan。」
「Hello kate。」Alan講：「我哋4個。」
Alan講咗4個之後，Kate帶佢哋埋位。當坐低Alan又不斷施展口材，令兩女笑不停。
「哈哈，Sandy係尖沙咀之花！」Alan講開Sandy，Chloe就講笑話 Sandy係尖沙咀之花。
「妳唔靚女嘅！」Sandy問Johnny：「你話Chloe靚唔靚女？」
「靚…」Johnny講咗個靚字， Alan就截糊：「Chloe唔止靚女，把聲都好正。」
「係呀，佢未成年，未轉聲嫁！」Sandy笑Chloe雞仔聲，Chloe笑住打佢。
「衰人，成日攞我嚟笑！」
「哈哈哈。」
「雞仔聲好聽吖。」Alan講：「之前有個台妹丫頭雞仔聲好受歡迎。」
「佢out哂喇。」Sandy望住Chloe：「呵！」
「我點夠妳in吖。」Chloe笑住指佢低胸裝，Sandy都大笑。
「妳都in吖，OL加雞仔聲，引死唔少男人。」Alan氹Chloe，Chloe以笑回應。
睇住Alan係咁撩Chloe， Johnny嬲到有啲黑面！
响我面前係咁撩我條女…
有無搞錯！！
Johnny怨氣散發， Alan都感受到。佢同Chloe講：「我哋悶親你朋友喎，一齊猜枚喇。」
悶親你朋友？
佢明知 Johnny係 Chloe條仔，咁樣稱呼即係唔當佢哋係情侶。
哩一嘢撻着咗 Johnny！！
「我女朋友唔係咁鍾意飲酒！」 Johnny搭住Chloe膊頭講：「我同你私片！」
「私片？私片好似單調啲。」 Alan講：「我哋猜，輸咗就條女飲。」
「好呀！」Johnny望住Chloe：「放心，我唔駛妳飲。」
Johnny作出承諾，Chloe微笑點頭。
兩個男人開始對決，高手過招好耐先一板，猜咗一大輪 Sandy、Chloe各飲兩杯。因為等佢哋猜等得太耐，兩囡都唔耐煩自己猜。
「邊個贏咗，邊個就係尖沙咀之花！！」
「好！我一定攞咗妳個朵！！」
兩囡自己猜，兩男輸咗都唔好意思要囡飲。男子賽女子賽幾粒鐘，大家都貓貓哋。
「我贏咗…」 Sandy講：「我係尖沙咀之花…」
「咁我…係尖沙咀台妹…」Chloe雙眼半合，醉紛紛講。
「妳係雞仔…」Alan又想撩Chloe，Sandy掩住佢個口：「唔準撩女仔…」
「你今晚係我嘅！」Sandy同Chloe講：「今次到我拖仔爆房！」
「哈哈…」Chloe豎出手指公：「妳…去爆…我影低…」
「我走喇，妳太遲喇…」Sandy拖住Alan去爆房，而家得返佢哋兩個。
Chloe面紅紅俟落張櫈，個頭顎後合埋雙眼，好似醉到瞓咗。
「 Chloe，妳瞓咗？」 Johnny拍拍Chloe， Chloe張開眼講：「唔…係…」
「咁我哋走喇。」
「走…」 Chloe講：「去…爆房？」
吓？
又爆房？
又係飲醉爆房？
Chloe咁講，對 Johnny係一大震撼…
一種考驗。
（10）再嚟一次---完