因為EX 我成為左一個禿頭嘅毒撚 然後遇到一隻猫: 12. 聯會營(三)
「各位同學，望遠鏡已經set好喇，大家食飽後可以輪流去睇下，我地都會有人係側邊幫大家講解。不過好唔好彩，今晚好多雲遮住，所以暫時都睇唔到d咩，可能要碰下運氣先有機會間中望到唔同嘅星，希望夜d天公會造美啦…」BBQ到中途，天文學會會長就同大家講觀星活動開始。
於是我地都去排隊睇下，不過因為真係太多雲，所以大家等左段時間後都係乜都睇唔到。
「仲諗住有機會可以睇下唔同星座添…」Grace係望遠鏡望左陣後好失望咁講。
「無計啦，突然間咁多雲… 好彩無落雨咋，唔係BBQ都攪唔成…」旁邊天文學會嘅學長講道。
當時嘅我睇見Grace失望嘅表情，突然靈機一觸諗到個idea，然後我就俏俏咁同Mabel佢地講左幾句野。
「Grace你好想睇星?」BBQ後我主動行過去問Grace。
「係呀，我未睇過所以本身都有d期待…」Grace仍難掩有d失望。
「記唔記得我差你一個願望?」我問道。
Grace:「梗係記得，不過我未諗到要你做d咩喎。」
我:「咁不如我幫你達成睇星衣個願望?」
「咁犀利? 係就當你完成到啦~ 不過有咩方法呀… 唔通你識借東風吹走d雲?」Grace唔相信我真係可以。
「一陣你咪知~ 咁你跟我地黎啦。」我笑笑口說。
然後我地就行左去遠d一個好黑嘅草地。
「嗱，你企起衣度先，然後望住個天唔好旭。」
當Grace跟住我指示做果陣阿偉就偷偷地拎左我預先比佢部相機出黎，然後我就拎住個電話開左閃光燈係Grace側邊旭下旭下。
「你唔係諗住著左閃光燈就當星呀?我唔會接受咁”行”當睇左星架!」Grace見到我開住個閃光燈好似傻左咁唔知係度做乜於是講道。
我:「你乖乖地唔好旭啦! 攪掂會話你聽架喇~ 好攪掂喇!」
過左幾秒後我見完成就示意Grace已經完成。
「咁星呢? 睇完喇?」Grace就既洩氣又失望咁問。
我:「唔好咁心急~ 跟我黎啦。」
之後我就帶佢一齊走去阿偉果度，佢就襟左岩岩影果張相比我地睇。相入面見到Grace望住個天，而個天就多左個好大嘅星型光點，好似真係粒星咁。
「嘩，好靚喎! 你點做到架?」Grace即刻好興奮咁捉住我問。
「Magic~」事實上衣個方法係我前排係網上見到，利用相機影相曝光嘅原理，只要附近夠黑你又有發光嘅source就可以做到衣個效果。但我當然唔會解釋比Grace聽啦。
「車! 不過我大概都估到啦~ 咦，咁應該可以畫好多野都得喎!」可惜讀書叻又識得多野嘅Grace好快已經估到背後嘅原理。
我:「係架~」
「等我又試下先~」Grace立即好雀躍咁拎左自己部電話出黎。
當晚我地成班人就不斷係度影相同畫畫，整左好多張低能相，例如Grace同Mabel變成左天使啦，Bryan出龜波氣功打落阿偉度啦，我就變左撒亞人咁周圍散發出”氣”嘅光茫等等。而因為咁大家同Grace嘅距離都再拉近左唔少，成晚個草地都充滿住我地嘅歡笑聲。
到到第二朝，因為琴晚大家都玩得夜，第三日又係自由活動時間，所以好多人都未起身，但我就因為訓唔慣而早起左床。於是刷完牙我又拎左個籃球諗住去籃球場射下波，點知去到果陣見阿Grace竟然都係果度呆企緊。
「咁早起身嘅?」我走過去問。
「係呀，慣左早起訓唔返。你又咁早?」Grace見到我有d驚訝然後反問。
我:「張床唔太舒服…」
Grace:「哈哈~ 咁勤力咁早黎練波喇?」
我:「見個個未起身無野做咪諗住黎射下波囉~ 你又點解會黎左衣度?」
Grace:「我諗住周圍行下呼吸下新鮮空氣咋。咁岩經過見到籃球場就停係度休息下，點知無耐你就出現喇。」
「咁… 一齊射下波?」醒起佢話黎衣個Camp部份原因係因為籃球隊但到最後一日佢都好似未有機會掂下個籃球所以我主動提出。
Grace:「好呀~」
之後我地就輪流係度射下波。
「今日唔撩我比賽喇?」射射下Grace竟然主動問我。
「哈哈，費事成日好似撩你賭咁啦… 同埋都唔知再用咩賭注好。」我解釋。
「嗯… 如果你贏我就黎睇你黎緊嘅學屆比賽? 如果我嬴，你就再欠我一個願望?」Grace諗左一陣後講。
「點解感覺我好似無咩著數咁嘅…明明係你自己想睇籃球比賽咋嘛…」我一副”你搵我笨”咁嘅樣。
「咁算囉~」Grace見我咁就無堅持。
「不過難得你咁有興緻咁又唔好~ 你今次想點比法?」但我當然又唔捨得同佢無互動啦。
「1 on 1，你讓我唔比跳同block我射波~」Grace提議道。
「咁唔公平? 咁你如果射入晒我咪實輸?」我又扮覺得佢係搵我笨。
「係架~ 我真係咁勁都抵你輸啦~」Grace直認不諱。
「算，就當我讓你~」
雖然唔比跳，但其實我要屈Grace籃底佢都係無我符，至於防守佢，雖然唔可以block，但只要遮下佢隻眼，佢要射入係一d都唔容易，所以衣場1on1如果我認真，要贏係完全無難度。不過我突然又諗，我贏，係咪最好嘅結果? 佢又會唔會開心?所以衣場比賽係我控制下分數一直都維持係你一球我一球。到到4比4果陣，我主動提議
「不如當打和算啦， 唔好下下分出勝負~」
「哈，對我咁好? 唔好以為我睇唔出你一直讓緊我喎…」原來Grace一早就睇得出我讓緊佢。
我:「咁衣場比賽我嘅優勢太大本身就唔係咁公平嘅~」
「係啦，係我輕敵諗得太簡單!」Grace初初無想過原來自己諗嘅條件係咁無用。
「定係其實你根本就係想搵個藉口黎睇我比賽呀?」我講笑問。
「喂! 點會呀~」Grace 抗議，但種感覺係比我講中左。
我:「好啦，咁你因為輸左所以之後要黎睇我比賽，而我又欠返你一個願望啦~」
「好呀，點睇都係我賺左~」可能知自己本身輸硬，所以好勝嘅Grace今次都好滿足咁講。
於是，衣個聯會營就係開心愉快嘅情況下完結。而衣次聯會營後，確實有d野係改變左。首先係雖然唔多，但之後間中Grace都會參與下我地嘅聚會同我地食lunch。另外就係…兩日後我終於首次見到佢係MSN online!
「HI~」驚佢好快又會offline，我即刻send左個message比佢。
「Hello~」雖然只係半分鐘，但我就好似隔左好耐先收到佢嘅回覆咁，一直擔心衣個online只係虛火。
「add左你咁耐終於係度見到你喇! 點解今日會online嘅?」我問。
Grace:「係呀，用開電腦咪上黎一陣囉~ 你成日玩MSN架?」
我:「因為我成日用電腦打機，所以開親電腦基本上都長開住架。」
Grace:「原來係咁~ 我通常都係要上網搵資料先會開電腦。」
我「你嘅生活太多姿多彩嘛，邊有我地咁清閒呀。」
Grace:「大家興趣唔同啫~」
傾左一陣後Grace話要練琴就好快off左line。不過自此，佢差唔多每日都會online大概15分鐘，而我地亦開始每日都會係衣十五分鐘入面傾下偈講下大家日常嘅事或者學校d八掛野。衣家睇返，有d野原來係果陣已經不自覺咁改變左。