因為EX 我成為左一個禿頭嘅毒撚 然後遇到一隻猫: 26. 訣別
果次之後Mabel都無再搵過我。而過左兩個月左右後，我從其他途徑聽聞佢接受左個追左佢好耐嘅男仔，心入面都好替佢開心。不過因為咁我更加唔想打擾佢，亦唔想自己見住佢地開心幸福後又諗起自己嘅境況，結果慢慢我地就真係變左斷交咁。不過其實都係自己問題，因為Mabel仲一直有出席中同嘅聚會，只係我仍然沉醉係自己嘅傷痛之中所以無出席啫。
而之所以有機會見面，係因為三四年後嘅一日，佢突然黎左我屋企搵我。
「祖，好耐無見…」
「Mabel?」對於佢三年後突如其來嘅探訪我有d驚訝唔識反應。
「唔招呼我入黎坐?」佢見我呆左就笑笑口咁問。
「你唔介意就入黎啦。」於是我就招呼左佢入黎。
「好耐無黎過衣度喇… 都無咩點變，不過你就變左好多…」Mabel入左黎後四周咁巡視左一圈就有d唏噓咁講。
「係呀，我都無諗過自己會變成咁…都好嘅，等我專心做個宅男…」我帶住自嘲咁講。果陣嘅我頭髮已經甩左一半，變左做個肥佬，除左返工我都好少再出街，基本上我已經放棄左自己。
「為左佢攪到自己咁，值咩?」Mabel問道。
「你未失過戀唔會明白… 有d野唔到你控制架…」我無奈咁講，或者失戀嘅人總係覺得無人明白自己。
Mabel:「點解你成日會覺得我未失過戀?」
「之前都從未聽過你有鍾意嘅人， 係我地無聯絡之後先聽講你有男朋友咋嘛，咁何來失戀? 唔通…你地散左?」我解釋。
「唔係，我地好好。今次我黎搵你其實係想話你聽我黎緊要移民喇。」Mabel好快否定左我嘅推測。
「移民? 去邊呀?」我好驚訝，同時心入面都有少少失落。
「我同我男朋友一齊移民去加拿大，然後等settle好就結婚。」Mabel好淡然咁講。
「哦，恭喜晒呀~」雖然有d失落以後真係無左個好兄弟，但我都真心替佢可以離開香港又搵到個好男人而高興。
「多謝~ 話晒咁多年好朋友，走前都想再見一見你同你講一聲…」Mabel都有少少失落咁講。
「Mabel，我係真心替你開心，同埋咁多年黎，我知我爭你一句對唔住… 果晚，真係好對唔住…」知道再唔講真係無機會講，果日我終於可以將藏左係心入面好耐嘅果句對唔住同佢講左出黎。
「傻啦… 我無再嬲你好耐喇，唔係今日都唔會主動黎搵你啦~其實諗返轉頭，我可能仲要多謝你添…」Mabel有d感觸咁講。
「點解?我激嬲你你仲要多謝返我? 」我唔明白。
「算啦，已經唔重要喇… 不過阿祖，我最後想同你講，曾經我都好欣賞你對好多野都會好執著唔會輕易放棄同認輸，所以我都想自己好似你咁。但後來我先發現執著唔一定係好，有時原來只要你唔好咁執著肯放低，你會發現你之後先可以得到更多。希望有日你會可以放低過去，變返以前嘅你。」Mabel語重心長咁講。
「我做得到就唔駛咁啦… 而且衣家已經太遲。」佢講嘅說話我唔係唔明，只係覺得自己做唔到。
「所有野都係睇心態架啫，我相信有心就永遠唔怕遲。」Mabel盡最後努力講道。
「多謝… Mabel，祝你以後都幸福。」但我唔認同，而衣句係我最後可以同佢講嘅說話。
「我都希望你以後可以幸福。」
衣段就係我同Mabel最後一次對話。之後佢就同男朋友去左加拿大，兩年後仲寄左張佢地嘅結婚相比我。從佢IG，我知我嘅祝福成真，佢一直都好幸福，衣家仲有兩個小朋友。而我，就無聽到佢講，一直繼續過住頹廢嘅宅男生活。
回想完衣d片段，我先突然醒悟原來Mabel以前一直都鍾意自己，只係因為自己鍾意阿Grace仲同佢一齊，而佢地又成為左好朋友，所以佢一直都收埋左自己嘅心意。難怪當年Grace拋棄我後佢會咁嬲，而我當晚嘅說話又帶左咁深嘅傷害比佢…
突然間，我明白晒佢以前好多說話嘅意思。唔怪得佢話佢都失過戀，仲多謝返我果晚咁對佢。因為我逼佢選擇左放低，所以佢可以得到左之後嘅幸福。如果我當日都可以好似佢咁，我嘅人生會唔會可以變得幸福d? 又或者如果我早d知道Mabel嘅心意，我地嘅結局又會唔會唔同?
不過下面嘅我好快話左答案比我知，因為佢最後選擇左扮唔知。
(唔怪得佢果晚係咁問咁多野，最後又好似有d失望啦… 反正佢都以為我發現唔到，咁我就繼續扮唔知啦…)下面嘅我心諗。
始終一直都只係當Mabel係buddy，就算近排開始有d醒覺佢其實係一個女仔，我對佢都完全唔係果回事無果種感覺，所以我唔想同佢一齊但同時間亦唔想無左佢衣個好朋友。扮唔知係最好嘅選擇。
之後我地就好似無事咁繼續生活，只係有意無意間我都唔敢同Mabel太接近以免引起佢嘅誤會。然後時光飛逝，轉眼間又過左差唔多兩年。不過係衣兩年入面，Mabel竟然做左一樣我做唔到嘅事，就係佢係排球隊拎左學屆冠軍，仲係我面前躍武揚威左一翻。果刻我對Mabel有少少改觀，因為佢以前好少對一件事咁堅持同努力，但自從打排球後佢就慢慢唔同左，果刻我覺得佢好叻，仲好羨慕佢添。
「祖，我地排球隊入左決賽呀~你下星期可唔可以黎支持我?」四強嬴左果晚Mabel好開心咁打比我。
「咁犀利? 真係估你唔到喎! 無諗過你打左年幾排球就咁勁揪~」我真心替佢開心。
「教練教得好加上我都下左唔少苦工嘅~」Mabel帶住少少得意咁講，不過一直係佢身邊嘅我知佢背後真係下左唔少苦功。
「記得以前嘅你唔會對一件事咁堅持同努力，好易就放棄，估唔到排球改變左你咁多~」諗起以前嘅佢我又講。
「其實未必係排球改變我嘅… 咁你黎唔黎呀!」Mabel問。
「黎~ 你入到決賽點會唔黎呀~ 加油呀，我做唔到嘅野靠你幫我完成喇!」我當然會去支持我嘅青梅竹馬啦。
「無問題!」
我地學校嘅女排其實不嬲都係強隊黎，因為我地個教練以前都係港青個教練，所以Mabel係佢指導下進步得好快，衣年仲已經成為左主力。當然，佢自己嘅天份同努力都應記一功啦。
不過去得決賽當然唔會輕鬆，Mabel佢地都陷入左苦戰。Mabel 因為身型唔高，但就有出色嘅反應同預判能力，所以係球隊嘅自由人。睇住佢左飛右撲係咁救波，雖然身上佈滿大大小小嘅瘀痕但眼神永遠keep住有火同專注，衣刻嘅Mabel令我首次生出左耀眼嘅感覺。
雙方嘅分數一直咬得好緊，最後到決勝局憑住Mabel成功救到對方快過子彈嘅剎球佢隊友再成功咁轉守為攻拎左決勝嘅一分，我地學校終於奪得學屆冠軍嘅寶座。
「我得左喇~」慶祝完又醫完波，Mabel立刻飛奔過黎同我講。
「恭喜呀~你真係好勁! 頭先嘅你都唔似我以前識嘅Meimei嘅~ 型好多!」我由衷讚賞。
「去死啦你~不嬲都咁型!」Meimei就笑到見牙唔見眼咁講。
「係係係~ 不過真係恭喜你，做到我做唔到嘅野，算係幫我修補左個遺憾…」我帶少少感觸地說。
「唔駛羨慕喎~ 其實對我黎講，最重要係佢為我証明左一樣野，就係努力真係會有回報!」Mabel自信地講道。
「係呀，所以歌都有得唱，就算失望，不能絕望，面對逆境我地唔可以輕易就認輸。」我有同感。
最後Mabel仲將佢學屆個金牌送左比我，話知我好恨拎所以好堅持咁硬塞左比我。不過我知佢其實只係想某程度上埔我填補我係學屆嘅遺憾。衣種係Mabel男仔頭背後對我嘅溫柔。