因為EX 我成為左一個禿頭嘅毒撚 然後遇到一隻猫: 32. 覆水難收
人真係好奇怪，當人地當你係寶果陣，你總係會覺得好理所當然完全唔在意亦唔會珍惜而只係當人地係草。但當有日你發現一直當自己係寶嘅人有日突然都只係當返你係草果陣，你又會唔甘心唔願意接受現實，會後悔好想佢當返你係寶，那怕你自己之前明明係完全唔care…
我係屋企越諗越唔開心，然後我突然間醒起d野就立刻打開左房一個櫃門拎左個紙盒出黎，入面全部都係Mabel咁多年以黎送比我嘅禮物。有當年嘅果隻CD，模型，頸巾，手錶，銀包，學屆金牌等等，仲有每年從不間斷都會有張嘅生日心意咭。衣堆野過往我從來無在意過，但到今日當我再望住佢地，發過每一樣其實都滿載住Mabel對我嘅心意時，我先突然發覺佢地係有幾咁珍貴無比… 原來一件東西嘅價值，真係唔係取決於佢嘅實質帳面價值而係自己嘅心態。
(唔會架! Mabel對我唔會咁絕情! 佢以前咁鍾意我，點會話變就變? 等我花d心機一定可以氹返佢返黎架!) 望住衣堆禮物，我仍然唔相信Mabel對我會咁絕情。
於是我之後幾日花左好多心機整左份禮物比佢。份禮物係一個紙盒，入面鋪左個草地，然後我用手摺嘅花圍左個心型出黎，再整左d星星同燈係入面，成件禮物非常之靚。當然我仲寫左張心意咭比Mabel，內容都係講對唔住以前對佢咁衰，一直忽略左佢對我嘅好同佢嘅感受，衣家好後悔希望有機會可以正式同佢一齊好好補償返比佢。我好有信心衣兩樣野加埋一定可以感動到Mabel。
「Home?」萬事俱備下我再次msg Mabel。
「Yes。」可能見我幾日無再煩佢，今次Mabel有覆我。
知道佢係屋企，我就拎住個盒同張卡鼓起勇氣去搵佢。當佢開門見到我明顯有d意外。
「祖? 咩事?」
「可唔可以出黎陪我行一陣?」
「Sorry我唔想…」
「最後一次! 睇在我地識左咁耐份上，比個機會我講埋我想講嘅野，如果你之後都係唔想再見我，我以後唔會再煩你…」我苦苦哀求佢比最後一次機會我。
猶豫左陣Mabel都係心軟換左對鞋就跟我去左附近個公園。
「你仲有咩想講呀?」行左無耐佢就急住問，好似同我一齊嘅每一秒佢都好唔舒服咁。
「對唔住，衣份禮物同張卡送比你架…」我將手上嘅野比左佢。
「ok，收左喇，咁我走得?」Mabel從我手上拎完後問。
「你真係咁絕情睇都唔睇下先就走?」我當然唔會就咁放佢走，果刻我仲相信佢睇完會比我感動到。
於是Mabel打開左個盒，見到入面嘅內容佢明顯有d驚訝，然後佢再打開左張咭睇埋入面嘅內容。
「點解…」良久佢終於開口。
「近排我先發現自己之前有幾咁傻，竟然一直忽略你對我嘅好同付出，仲要不斷咁傷害你… 明明最好果個已經一直係身邊，但偏偏就為左d唔值得嘅人而放棄… 我真係好後悔，好想可以同你有一次機會，可以好好咁補償你… 我以後會好好對你架Mabel，我真係知錯喇，你比多次機會我啦…」我將預備好嘅說話講出，滿心期待Mabel原諒我嘅答覆。。
「祖…多謝你… 不過太遲喇。如果你今日嘅舉動早半年出現，我估我會死心塌地咁原諒你，仲會好開心我終於可以感動到你得到你嘅愛。但衣家，我做唔到…」可惜Mabel嘅答案再一次好似盤涷水咁一野淋落我度，再係咁淋法我應該好快感冒。
「點解? 係咪仲係覺得我唔夠誠意唔肯原諒我?」結果實在太意外，我亦唔明白點解，過左陣先反應到再追問。
「唔係… 只係有d感覺無左就係無左… 由小學開始其實我就已經一直都鍾意你，但我從來都唔太敢諗同你一齊，直至有次你鼓勵我有夢想就要嘗試，我先敢透過張生日咭同你表白。可惜當時我以為你並無發現背後嘅密碼，所以之後我都再無勇氣亦唔敢再諗，打算認命同你做一世死黨，繼續keep住衣70蚊其實都唔錯呀。點知到你父親過身無耐後果晚我知道左原來你只係一直扮唔知我對你嘅感覺，然後我地又突然發生左關係…
果晚雖然一方面我好驚，但另一方面我又好開心，因為同你嘅關係好似終於有機會突破，或者我終於可以正式成為你嘅女朋友。點知第二日你同我講可唔可以當無發生過… 果刻我真係心如刀割，不過我唔想逼你同比壓力你，加上知你唔開心果晚又大家飲醉左…. 所以過左一排後我諗通逼自己忘記左佢咁就可以同你繼續做返好朋友。點知過左排後，有日你又格硬錫左埋黎，仲… 我一方面唔敢拒絕你驚你唔開心，另一方面我亦真係鍾意你希望有日你會鍾意返我，結果我地一次又一次… 然後我又一次又一次咁失望…
但唔緊要，我知你一日係單身，我一日仲係有機會… 而且你仲搵我，至少証明你唔抗拒我需要我呀，只要我繼續努力，話唔定有一天我地真係可以一齊… 點知上到大學後無耐，你連搵我都越黎越少，然後有日終於同我講我最驚亦最唔想聽嘅野，你唔想我地再咁樣落去…
明明主動要咁果個係你，到到玩厭左有新歡喇要完果個又係你。到底你一直當我係咩? 我地識左咁耐，點解你可以咁狠心咁傷害我? 你真係完全無諗過我嘅感受? 果刻，我真係心死喇，我知一直都係自己一廂情願。其實當時係大學，有一個男仔一直都追緊我，但因為你我一直都拒絕佢。但果晚後，我終於醒悟，點解我要為一個唔珍惜自己嘅人而放棄一個珍惜自己嘅人?
望見佢我就諗起自己。於是我決定放過自己，比一次機會佢。結果佢對我一直好好，而因為佢我亦終於可以慢慢咁完全放低左你。原來只要你諗通肯去放，無野係話放唔低。所以衣一刻我可以好明確咁對你講，我鍾意嘅係佢唔係你，我無可能放棄佢而去接受返你，所以對唔住…」
由預備禮物果刻開始，我一直仲以為只要我努力Mabel一定會返黎我身邊。但聽到Mabel嘅剖白後，我終於知我錯喇，亦知我帶左咩傷害比Mabel令佢由極愛我到到衣家完全死左心，但我完全接受唔到。
「唔係架! 你呃自己! 我知你仲鍾意我架，你唔肯認咋嘛! 你之前咁鍾意我，點會話變就變架!」我不自控咁捉住左Mabel好激動咁講。
「好痛呀! 放手呀!」Mabel大力掙扎，而我亦終於清醒放開左佢。
「對唔住我唔係有心架…」我好似個做錯事嘅小朋友咁同Mabel講。
「我無講大話。無錯，我以前真係好鍾意你，為左你我甚至無左自己，放棄左自己嘅底線。但亦正正因為係咁，你比我嘅傷害都係無比巨大… 對唔住，或者女仔絕情起上黎原來真係可以好絕情。事實上多得你今晚搵我，我先知原來我真係已經完全放低左你… 頭先我其實完全無猶豫我就知自己應該點揀。更可況祖，其實你唔係真係鍾意我，只係你衣家咁岩無人陪，又接受唔到我已經唔係以前可以為你無條件付出嘅我啫… 當有一日你得到返我，慢慢你都係會變返以前咁架…」Mabel堅定有力咁講。
「唔係架… 我真係好後悔…. 衣家嘅我真係醒悟，好鍾意你好想同你一齊…」聽完Mabel絕情嘅說話，我終於忍唔住喊起上黎。
「係咪都好啦，已經唔重要喇… 祖，其實你知唔知我係幾時開始鍾意你? 」或者見到我喊得咁犀利，Mabel都真係好驚訝，然後佢語氣突然變得好溫柔咁問我。