因為EX 我成為左一個禿頭嘅毒撚 然後遇到一隻猫: 41. 往事(二)

 
「Henry~」
 
「點呀…」Henry見到係Leanne後不耐煩咁應道。
 
「其實我真係好好奇，如果你係晴晴講得咁好，點解你平時又好似咁乞人憎架呢? 而且對我仲好似特別差咁…」Leanne好奇問道。
 
「我只會對我著緊嘅人好… 對你衣d淨係識利用自己個樣周圍收兵嘅人我係特別討厭。」而Henry亦直接作答。
 
「我? 收兵? 我邊有呀…」面對Henry嘅指責，一直都受人保護嘅Leanne覺得有d委屈。


 
「你持住自己個樣算ok，就係咁迷到個個男仔都圍住你轉甘心做你隻兵，仲話無? 你睇你平時幾多男人鍾意跟出跟入?」Henry提出佢嘅觀察同証據。
 
「我真係無特別收咩兵喎! 係佢地鍾意跟住我咋嘛…你估我好想咁咩? 但唔通我好無禮貌咁係咁趕佢地走? 你估佢地又一定會聽?」唔知點解果刻Leanne唔想比Henry誤會拼命解釋，仲有d想成為佢會對佢地好嘅果班人之一。
 
「你真係想避開佢地唔比佢地誤會其實有大把方法啦,..」Henry就堅持唔信Leanne。
 
「例如?」Leanne問。
 
Henry:「扮有男朋友或者Les佢地就自然會死心啦…」


 
「咁都得? 」Leanne有d懷疑咁問。
 
「睇你想唔想架啫… 」Henry聳一聳肩講。
 
Leanne:「我會考慮下…」
 
無耐Leanne就真係聽取左佢意見扮鍾意女仔仲拍緊拖，結果果然少左唔少人再埋佢身。而可能因為咁令Henry開始相信Leanne唔係專登有心收兵，之後對Leanne嘅態度亦再無之前咁差，大家有時仲會開始閒聊幾句。
 
 


「你下星期六得唔得閒?」有日佢突然問Leanne。
 
Leanne:「得掛，咩事?」
 
「晴晴話想去海洋公園話，話想我叫埋你喎…」Henry 有少少尷尬講道。
 
Leanne:「當比面晴晴唔係唔得嘅…但點解唔搵你女朋友?」
 
Henry:「晴晴點名話想同你去，咩女朋友都要放埋一邊啦，何況果d都唔係我女朋友…」
 
「哦~」聽到佢否認Leanne唔知點解暗地裏又有d開心。
 
之後Leanne真係同左佢地去海洋公園，仲襯機係晴晴身上打聽左Henry唔少嘅野，原來佢真係唔係Leanne本身想像中咁。因為Henry父親好早過左身，屋企一直靠Henry阿媽賺錢養家，因而無咩時間陪佢地。好彩Henry同晴晴年紀相差比較大，所以Henry都可以幫手照顧到晴晴。到到Henry夠18歲佢仲開始返唔同嘅part time幫補家計。而Henry之所以把口咁爛同咁串，原來都係因為佢以前比人恰得多然後發現原來只要夠惡對方就唔夠膽恰佢地佢先會變成咁。平時Henry對佢同媽咪真係好好，不過可能因為咁壓力大又或者想搵人愛，所以Henry花心都係一個事實，成日都會有唔同嘅女人係身邊。
 
知道左衣d事實Leanne對Henry又有d另眼相看。而由於晴晴鍾意Leanne，所以Henry對佢嘅態度都開始變得越黎越好。其實諗返因為衣個咁大嘅反差當時Leanne都感受到自己對佢嘅感覺似乎係有d與別不同，但另一方面Leanne又知佢成日換畫絕對唔係一個專一嘅好男人，所以都有d糾結。直次過左段時間有次係一個好老土嘅劇情下，Leanne先終於下定左決心。


 
事源係果排Leanne成日比個男仔纏擾，就算已經同佢講得好清楚唔鍾意佢自己係Les之後又完全唔理佢，但個男仔都完全唔信仲keep住煩住Leanne，有時仲會變態到跟踪佢，然後有次終於比佢發現左Leanne同Henry熟絡嘅關係。
 
「Leanne，佢係邊個黎架?」變態男上前質問Leanne。
 
「又係你? 關你咩事呀? 點解要同講你聽?」一方面Leanne本身已經覺得對方好煩，另一方面又擔心Henry會再次誤會自己收兵，所以對變態男嘅態度都唔好。
 
「你又話你係Les唔鍾意男人? 咁點解你好似同佢咁熟? 點解要呃我?」感受到Leanne嘅唔友善，變態男更加唔忿氣。
 
「佢係我好朋友咋，你唔好亂up啦…」Leanne望一望Henry又驚佢因為被誤會而唔開心。
 
「唔好再扮別，我睇得出你望佢嘅眼神係唔同架… 點解你要呃我，點解你揀佢唔揀我…」變態男開始有d情緒唔穩定，但佢衣方面又真係睇得Leanne幾準，知道Henry係佢嘅強敵。
 
「都話唔係咯，你唔好痴線啦…」Leanne仍然否認。
 


「你比次機會我啦，我會明比你睇我比佢更好架!」變態男開始失控上前想捉住Leanne。
 
「喂你好喇喎，顛夠未呀!」Henry衣個時候終於忍唔出手捉住變態男隻手。
 
「放手呀，關你咩事呀! Leanne，你信我跟我走啦!」變態男掙扎不果又對Leanne講。
 
「點會唔關我事呀? 我衣家就同你講我係佢男朋友，唔該你以後唔好再煩住我女朋友，佢唔會鍾意你架! 再比我見到你我就見你一鑊打你一鑊!」Henry對住變態男咆哮，展露佢凶狠嘅一面。
 
「你… 你…哼!」比Henry凶神惡煞嘅樣嚇倒，變態男唔敢再糾纏轉身就走左。
 
而當變態男走左後， Henry又好似無事發生過咁繼續行，Leanne只好繼續跟住佢。
 
其實頭先當Leanne聽到Henry講自己係佢男朋友果陣，佢心入面突然有種甜絲絲嘅感覺。而再行左段路後，佢終於忍唔住問Henry。
 
「你頭先講嘅野係咪真架?」


 
「講咩?」Henry扮唔明白。
 
「你話你係我男朋友囉~」Leanne 笑笑口追問。
 
「幫你嚇走佢咋嘛，點會係真呀…」Henry解釋。
 
「所以你真係少少鍾意我都無?」聽完Leanne有d唔開心咁問。
 
「呀… 衣個世界我估應該無男仔會唔鍾意你…」但Henry之後嘅答案又令佢有返希望。
 
「咁點解我地唔可以一齊?」佢再問。
 
「我唔係好人黎架，一齊只會破壞我地關係…」Henry再解釋。
 


「唔試過又點知?」但Leanne唔接受。
 
Henry:「你明知我有好多唔同嘅女人，我唔係專一嘅人黎…」
 
「話唔一定我可以改變你，令你以後淨係鍾意我一個?」Leanne堅定咁講。
 
「雖然你係好靚好特別，但我估… 應該都唔會可以…」但太了解自己嘅Henry對自己並無信心。
 
Leanne:「唔試過我唔會甘心架…」
 
「如果你真係咁想去受傷，我都唔會阻止你嘅…」本身Henry定力就唔係咁強，所以見Leanne堅持佢都無再拒絕。
 
就係咁Leanne就同左Henry一齊。而為左令Henry專一，Leanne亦真係好用心咁去愛Henry亦對佢超好，甚至無耐已經將自己比埋佢。Henry亦確實比佢感動到，所以破天荒真係有一段長時間無其他女人。不過隨著日子過去，始終有日佢都係悶需要搵其他人同新刺激，所以一年多後，佢都係有第二個然後同Leanne提出分手。