因為EX 我成為左一個禿頭嘅毒撚 然後遇到一隻猫: 49. 剖白

「總知我同祖係無可能係返埋一齊架喇… 由唔知幾時開始，我地已經唔係同一條線上面。至於你，你要因為咁嬲我同我絕交我亦無辦法。不過為你自己幸福著想，我勸你都係把握時間乘虛而入攪掂阿祖啦。你鍾意左佢咁耐，我都想你得償所願之餘佢都可以早日走返出黎唔駛咁傷心。為左咁你要我配合我都無所謂架。駛唔駛我專登去傷多去幾下等你機會大d?」過左陣見Mabel唔出聲Grace又講。
 
「你痴線架! 點解你可以咁自私架? 你仲諗住傷害阿祖傷得重d?」Mabel好嬲咁問。
 
「喂! 我都係想幫你咋喎… result oriented，如果衣家傷得重d結果可以令佢之後開心返過得幸福d，咁點解唔得?」Grace反問。
 
「你真係變左好多，變得好恐怖… 我估你衣家為求目的，真係可以不擇手段…」Mabel有d心寒。
 
「其實未必係我變嘅，可能係你地一直唔了解我啫，又或者我真係變左，因為以前太天真… 算啦，大家價值觀唔同，拗都無意思… 點都好，你當唔當衣個係機會都好，好好陪阿祖啦。」唔知係咪諗起d咩，Grace態度都和善返少少。
 




Mabel:「你唔講我都會…」
 
Grace:「仲有，叫佢放棄我啦…」
 
「佢肯聽嘅我都好想佢可以放棄你…」Mabel苦笑道。
 
「不過我明以佢性格係難嘅,… 而且傻妹，你都係呀… 有時堅持唔代表成功，放棄亦唔代表失敗，相反識係合適時間放手止蝕離場，你先可以唔會比眼前嘅野所蒙蔽望得更高，走得更遠。 如果睇結果，輸贏並唔係睇你得唔得到一個人，而係睇你自己過得開唔開心…明唔明?」
 
Grace別有心意咁講完拍左下Mabel膊頭就走左，而之後Grace亦無再見過Mabel。
 




不過下面嘅Grace話係Mabel移民之前，佢曾經send 過一句”多謝”比Grace，只係佢並無回應。
 
「果陣我仲以為佢多謝我令你地有機會係埋一齊，睇黎係多謝我另一樣野…」
 
聽完Grace的描述，衣個世界嘅我陷入左Mabel原來一直鍾意自己衣個深深嘅震憾之中。而天上嘅我雖然一早知衣件事，但亦同時明白到點解當時要求Mable幫自己做卧底繼續同Grace做返朋友時，佢會話已經返唔到轉頭，當然亦更加明白自己果陣到底有幾仆街同幾傷Mabel心啦。
 
因為Grace無同衣個世界嘅我講佢同Mabel 講嘅最後果段說話，即係叫佢去到某個時候要識止蝕離場果段，所以佢唔太明Grace講咩。而係天上嘅我因為睇到Grace嘅回憶片段，所以我明。
 
「咁你呢? 衣家係咪單身?」混亂完一輪唔想再諗Mabel嘅野所以我問返Grace。
 




「係呀~ 暫時我都唔想搵一段固定關係住。」Grace笑住咁答我。
 
「咁有無興趣今晚同我去懷緬一下過去?」然後我鼓起勇氣提出邀請。
 
「咁就要睇下你有無方法令我對你有返過去嘅感覺喇~」Grace笑得更甜咁講。
 
當然衣d都係說法黎架啫，事實上佢之後都keep住係咁撩我，所以飲多幾杯我就帶左Grace返自己屋企。
 
雖然對上一次同Grace有身體接觸已經係幾年前嘅事，而衣幾年我亦有過唔少其他女人，但當再次攬住Grace，同佢纏綿係咁kiss果陣，以前所有嘅感覺通通都浮現返晒出黎，然後我明白原來我地嘅身體，真係有專屬於佢自己嘅記憶。然後果種熟悉嘅感覺，同時間不斷咁刺激返我嘅腦部，令我腦入面同佢嘅所有回憶亦同時湧現返晒出黎，差d我就忍唔住喊埋出黎。但我知我唔可以，因為我知我嘅淚水唔會令Grace有任何感動，相反只會引黎佢嘅鄙視，然後奪門而出，所以我只可以將衣種悲痛嘅思緒化為力氣，然後狠狠咁轉移到Grace身上。整個房間都充斥住佢銷魂嘅陣陣哼音同埋我沉重嘅喘息聲。
 
「你係咪仲好嬲我?」完事後Grace懶洋洋咁訓左係我胸口上問我。
 
「唔係呀，點解咁講?」我裝作唔在意咁問。
 
Grace:「我感覺到你頭先好似想將所有怒氣都發洩晒係我身上咁~」




 
「又唔係嬲，不過當年比你飛或者潛意式有d想復仇嘅意味掛。」我繼續雲淡風輕咁講。
 
「咁衣家報晒舒服晒未呀?」Grace並無生氣，仲笑住咁問。
 
「未喎~ 你當年傷得我咁深，一次邊夠喉呀~」我亦笑住咁講。
 
「咁我唔介意你以後繼續搵下我渲泄下你d怒氣嘅~ 其實我都只係間中想relax下舒緩下壓力，與其搵生不如搵熟啦，而且你外型又唔差~ 頭先你嘅表現我都好滿意~」Grace笑得有d意淫咁講。
 
「咁我有靚女間中陪下都無所謂嘅~ 你好大壓力?」對於佢嘅邀請我雖然有d意外但當然唔會拒絕。
 
Grace:「係呀，不過好多時壓力都係我自己比自己嘅，始終有壓力先有動力去繼續進步。」
 
「成日咁逼自己唔累咩?」我好奇問。
 




「知唔知點解果陣我咁堅持要同你分手?」Grace合埋眼諗左陣後問。
 
「唔係因為你有第二個咩?」我裝作平靜。
 
「你地一個二個都咁諗… 其實有第二個係結果，唔係原因。」Grace有d累咁講。
 
「咁原因係咩?」我有d著緊咁問。
 
Grace:「原因係我知道你唔會係一個可以令我進步嘅男人，相反仲會令我退步。」
 
「原來我係你心目中係咁不堪…」聽完Grace個答案，我有d失望同唔開心咁講。
 
Grace:「又唔係不堪… 只係大家嘅生活態度或者追求嘅野唔同。」
 
我:「咁你係我地分手前係真係變得好唔同嘅…」




 
「其實唔係我變… 或者咁講，我係變返原本嘅我。」Grace若有所思地說。
 
「原本嘅你? 我以前識嘅你都唔係咁…」諗返以前我唔認同。
 
Grace:「你記唔記得我地初初識果陣我係好忙碌? 每日放學我都總會有唔同嘅活動。」
 
我:「記得… 果陣要約你都唔係咁容易。」
 
「其實我之前幾鍾意果陣咁嘅生活，因為我好似每一秒都過得好有意義，不斷咁有野學緊進步緊。直至之後同你開始熟，我先慢慢有d唔同左。或者因為第一次鍾意人，第一次戀愛啦，果陣同你一齊嘅時間係開心同舒服，而同時間我都漸漸懶散左，突然間有日我發現我有d厭倦日日要學野練野嘅生活，因為有你，我好似hea hea地咁生活都無咩所謂。
 
不過上到大學後嘅生活令我回想返起以前嘅我，果陣其實真係好忙，除左上堂外，hall嘅function同上庄都令我忙到抖唔到氣咁，但同時亦令我回想返起以前嘅我，我發覺我好享受果種chur嘅感覺，因為好似每一日我都過得好充實，每一日我都學到好多野咁。可能你果陣覺得我成日去玩，但其實玩只係佔好少時間，更多我係要攪hall嘅event同埋上庄嘅野。每日我都接觸到新嘅資訊，新嘅concept同處事手法，我覺得每日自己都進步緊成為一個更叻更能面對更多挑戰嘅人。而你，果陣都係繼續每日玩樂，遊憩人間，好似都唔知自己將來想做乜咁，然後我開始發覺我同你已經唔同步，甚至我覺得同你一齊我唔會再有任何進步，反而只會令我越黎越懶散，就好似我地一齊果幾年咁… 
 
我有嘗試去改變你，但我知我做唔到。而衣個係其實先係我地分開嘅原因，至於之後我鍾意左第二個，只係因為衣個因帶出黎嘅其中一個果啫。」Grace一口氣解釋道。
 




「咁佢有咩吸引到你?」我唔甘心咁問。