因為EX 我成為左一個禿頭嘅毒撚 然後遇到一隻猫: 52. 新緣份

「嘩!你隻松鼠狗好得意呀，佢叫咩名呀?」
 
喺一晚當我帶住Bobby落樓下散步嘅時候，一個跑跑下步嘅女仔見到Bobby就突然雙眼發光咁衝左埋黎一邊摸住Bobby一邊問。
 
「佢叫Bobby呀~ 不過嚴格黎講佢唔係我隻狗，我都係幫個朋友暫時照顧住佢先架咋。」我如實咁講，衣家嘅我亦都唔需要靠隻狗去識女仔。
 
「Icic~ Bobby 你好呀~ 我係Cherry姐姐呀~」
 
明顯地佢係一個愛狗之人，基本上由見到Bobby開始佢隻眼都無咩點離開過佢係咁摸佢同佢玩同講野，仲笑得好開心好燦爛。然後我發覺衣個叫Cherry嘅女仔雖然唔算好靚，但佢嘅笑容，充滿愛心嘅樣，加上運動開散發出黎嘅健康活力氣息同身型，令佢產生左一種獨特嘅吸引力。
 


(又比阿偉講中左添~) 我心入面開左個玩笑。
 
不過我並無講大話，因為連Bobby都比Cherry吸引到，好似好鍾意佢咁對佢搖晒尾兩隻耳反晒向後，好雀躍同熱情咁同佢玩得好開心，令到Cherry都笑得更加燦爛。
 
(衰狗，對我都未試過咁熱情…)我心入面暗駡左Bobby一下。
 
「你住衣頭附近?」見佢地玩左段時間後，我忍唔住問。
 
「係呀，你應該都係?」佢雙眼終於有稍為係我身上停留一陣。
 


我:「係呀，轉兩個街口就係。」
 
Cherry:「咁我遠你少少，因為我由屋企出發都跑左兩三個字喇。」
 
我:「哦~ 咁又真係唔算好近。」
 
或者Bobby見Cherry比我轉移左注意力，所以好快佢就企左係度係咁lur住Cherry只係著住條熱褲嘅長腿。而Cherry果然都即刻心動又蹲低返繼續同Bobby玩。
 
「佢真係好鍾意你喎~ 平時佢見到其他人都無咁興奮~」我繼續講。
 


「我地有眼緣囉可Bobby~」Cherry笑笑口講。
 
「佢衣個星期都仲會住係我度，所以衣個星期你都仲有機會見到佢架。」見佢咁鍾意Bobby所以我講。
 
Cherry:「係? 你會每晚帶佢散步?」
 
我:「佢主人交帶落，我都盡量會嘅。」
 
「Bobby仲想唔想見到姐姐呀? 」Cherry笑住咁邊摸Bobby個頭邊問。
 
或者人同狗都真係有眼緣，Bobby好似識聽Cherry講野咁吠左兩聲然後係咁舔Cherry隻手，彷佛真係答佢想咁。
 
「好啦，咁姐姐衣個星期盡量每晚都黎探下你啦~ 」於是Cherry就笑笑口答應左。
 
之後Cherry比左佢電話我，同我講衣個星期如果帶Bobby散步就話比佢聽，佢得閒會盡力抽時間出黎搵我地。


 
於是今晚之後，我就由一個人帶Bobby散步變成兩個人帶Bobby散步，而我同Cherry都慢慢成為左朋友。
 
原來佢細個都養過一隻松鼠狗同Bobby好似樣，但係四年前過左身，佢當時好傷心之後亦無再養狗，所以當果晚見到Bobby佢先咁開心咁大反應。而咁岩得咁橋，Bobby其實今年都係四歲，所以佢聽到後就成日覺得Bobby係佢之前隻狗嘅轉世，更加成日想陪佢玩。不過睇住Bobby每次見到佢好似總係特別熱情同依戀，我都唔敢否定佢講嘅可能性。
 
 
7日時間好快就過，還返Bobby比阿偉後，我同Cherry就再無每晚見面散步，但就應承左佢如果之後佢想我會帶佢去見Bobby，而之後我地都keep住間中有溝通。隨住我地越黎越熟，佢又都係自己一個人住，所以間中我地又會相約一齊dinner或者跑步，始終一個人住有時其實真係會悶同寂寞。
 
Cherry係一個好樂觀嘅女仔，見親佢都好似總係笑容滿面又好精神咁嘅感覺，同佢相處，不知不覺間自己都會開心左精神左。而當大家越黎越熟果陣，我地嘅話題亦好自然開始觸及大家嘅過去。
 
「你個外型唔錯，經濟狀況又好似唔差，點解會單身嘅?」有晚大家食飯果陣飲左少少酒後，佢突然問道。
 
「被傷害過兩次後，我唔係好想再投放精力時間係愛情…」於是我將自己同Grace以及Jessica兩段感情講左比Cherry知。
 
「原來係咁… 所以第二段感情令你更加無信心? 但一個人始終都會悶同寂寞喎…」Cherry聽到後問。最後衣句好熟，好似我無耐前先講過相同嘅說話。


 
「係呀… 所以近排我都有d開始改變左諗法。」我有諗過坦白將自己成為左player話比Cherry聽。但我驚佢會因為咁嫌棄我或者鄙視我令我地無機會繼續發展，所以我最後都無講出口，只係講衣幾年自己都係單身。
 
「改變左諗法? 變成點?」Cherry好奇問。
 
「我會開始想搵返個人陪自己，想有返愛情衣個元素係生活，然後有日組織家庭。」我說。
 
「咁都幾好喎~ 但點解突然改變?」Cherry再問。
 
「或者如你所講，一個人耐左會寂寞，同埋年紀開始唔細，覺得都要為將來打算下。」我解釋。
 
「但咁都唔會可以令你相信返愛情架喎…」Cherry疑問。
 
我:「其實仲有兩個原因嘅。一個係因為前排我撞返我第二個女朋友，而佢已經係一個女孩子嘅媽咪。佢之後遇到個好男人令佢相信返愛情，衣家仲好幸福添。所以見佢咁對我嘅沖擊都好大… 而另一個就係近排我遇到一個好似幾好嘅對象，覺得佢好似值得我再去試一試。」
 


「咁真係個天整定要你改變喎! 先比你遇返佢，然後再比你遇到個好對象~  咁佢係咩人黎架，駛唔駛我比下意見?」Cherry聽到後替我好開心咁。
 
「佢… 其實就坐係我對面。」或者之前溝女都慣左直接唔會花太多時間，所以今次我突然間就直接表白左。
 
佢有d愕然，然後大家就陷入左詭異嘅寧靜。
 
「唔好意思，有d突然，一時反應唔切… 不過…其實你對我了解有幾深? 咁快覺得我值得一試?」過左陣佢問道。
 
「唔知呀，但感覺你好樂觀同精神，同你一齊我不自覺間個人都好似開心左同後生左，而且直覺覺得你唔係感情玩玩下嘅人，大家又都算幾好傾幾投緣，我好耐都無試過有衣種感覺喇…」我再解釋自己對佢嘅感覺。
 
「可能當你知道左我嘅過去你就未必咁諗架喇…」Cherry神色有d暗淡咁講。衣次應該係我第一次見佢個人係有負面感覺。
 
「咁你可唔可以講我聽?」我問。
 
「我… 其實係一個離過婚嘅女人…」Cherry唔算點猶豫都直接講左我聽。