因為EX 我成為左一個禿頭嘅毒撚 然後遇到一隻猫: 54. 天網恢恢
「”姐夫”，你話衣個世界有幾細?」佢笑笑口咁講，但我絕對感受到背後嘅敵意。
「當年嘅事對唔住…」我除左道歉唔知仲可以講咩。
「以前嘅野我唔想再提，只可以怪自己蠢… 但我唔可以睇住我家姐走向不幸，佢嘅不幸已經夠多…」Ceci有d心痛咁講。
「我知以前係我唔岩，但我衣家真係唔同晒架喇，我對你家姐係絕對認真…」我嘗試解釋。
「你知我家姐以前都受過傷?」Ceci問。
我:「我知…」
「咁佢知唔知你以前嘅事?」Ceci再問。
我:「唔知…」
「你知唔知我家姐最憎人呃佢? 當年我前姐夫就係衰衣樣野… 你一方面同我講你對佢認真，但另一方面你又呃住佢，你叫我點信你?」Ceci質問。
「但我好驚我一講就會失去左佢，而且你仲要係佢嘅妹…」我真係好驚。
「咁係你嘅事… 鬼叫你以前自己咁賤格? 總知我話比你聽，我唔會呃我家姐，如果你唔講，我會同佢講，至少比佢知你係一個點嘅人，到時佢仲嫁唔嫁你，信唔信你真係變左就佢自己決定啦。」Ceci強硬咁講。
「但咁你會傷害到佢…」我嘗試同佢商量。
「我寜願衣家傷害佢，都好過第日比佢知道左後受更重嘅傷… 你到底了唔了解佢架? 而且我點肯定到你真係變左? 至少你要肯坦白我先可以信你係有誠意。」但Ceci堅持。
其實佢講嘅我都明白，只係我唔想咁做所以逼自己唔係咁諗啫。
「你比少少時間我…」我要求。
「仲比? 你地仲有唔夠一星期就結婚。再拖想反口佢都反唔切啦… 如果後日你都唔講，我會幫你講。」Ceci比左個死線我。
「明白…」
阿妹話已經講到咁嘅份上，我除非殺人減口，唔係基本上我都唔會逃避得到，但我真係好驚我講完Cherry會接受唔到。不過我知道由我親口講Cherry肯原諒我嘅機會絕對係遠比Cherry 個妹講大，所以逼於無奈下，我都只可以坦白。
「Cherry，有樣野結婚前我要講比你聽…」第二晚我約左Cherry上黎食飯然後講。
「…幾大?」佢面有難色然後問。
「咩幾大?」我摸不著頭腦。
「你個私生子有幾大?」佢問完自己都忍唔住笑。
「你諗左去邊呀~ 放心我無私生子呀…」雖然無心情但我都仍然嘗試同佢講下笑。
「所以…係有第二個女人?」佢今次帶少少凝重咁問。
「係關於我嘅過去…」避免佢再亂咁估我直接講。
Cherry:「過去? 我記得你講過自從酒吧果個女仔後都無同過其他人一齊，所以唔關女人事?」
「其實果陣我呃左你… Jessica件事後，曾經有一段好長嘅時間我如佢所願成為左一個玩家…」我如實咁講。
「…幾長?」Cherry臉上已經完全無左笑容。
我:「直至遇到你先完…」
「我有咩可以令你改變?」Cherry問。
我:「正如初初識你所講，我本身都已經有d厭倦果種關係同生活，加上重遇Jessica令我諗法改變左…」
「點解之前一直唔講衣家又突然講我聽?」Cherry再問。
「因為... 我今日先知當年曾經傷害過嘅一個女仔…係你阿妹…」我將最難果部份講埋出黎。
「講清楚d…」Cherry好驚訝，然後用命令嘅語氣講。
「當年我受Jessica影響，用相同方法傷害過好多女仔，而你阿妹係其中一個… 有次我見佢係酒吧飲醉，知道佢失戀，之後我地就一齊左一段好短時間，然後我再飛左佢…」我再解釋。
Cherry:「所以當年我阿妹係因為你嘅打擊而去英國?」
「聽你之前所講嘅野，好大機會係因為咁…」我好想否認佢嘅推測但我知佢好大機會講中。
「你地…當年有無訓過?」Cherry消化左後再問。
「有…」我只可以如實作答。
「咁點解你地今日見面要扮唔識?」Cherry已經開始有d眼淚係眼框。
我:「我見佢扮唔識我，所以我都扮係第一次見… 同埋我驚你會接受唔到…」
「衣家你又覺得我會接受到?」然後眼淚開始從佢眼框流出。
「我… 對唔住…」心痛嘅我只可以講出衣三個字。
「咪住… 我琴日走左後你地獨處過一段時間… 祖，你老實答我，係佢逼你講我聽定係你主動想講我聽?」Cherry諗返起琴日d野後再問。
「佢話如果我唔講佢就會講你聽… 因為佢知你寧願受傷都唔想佢呃你…」我繼續食左誠實豆沙包。
「所以如果佢唔逼你，你就唔會同我講?」Cherry追問。
「我都唔知道…」我估我應該唔會。
「Sorry… 我要d時間冷靜下…」Cherry一下子個人好似無晒能量咁，然後岩岩停左無耐嘅眼淚又開始再流落黎。
「Cherry，衣d都係以前嘅事喇，同你一齊後我真係再無其他女人…」我嘗試最後掙扎再解釋。
「但你隱暪左你嘅過去… 同埋唔係我妹逼你你都諗住會繼續呃我… 而你明明知我最介意係咩…」
講完Cherry就黯然咁離開左，而我亦無勇氣去追佢返黎。
最後Cherry都係接受唔到我嘅所作所為。佢解釋當年佢阿妹失戀後受左好大打擊好唔開心，佢地陪左佢好耐先終於見佢慢慢好轉，點知無耐後佢有日突然又好似再大受打擊，之後仲去埋英國，原來始作俑者就係我。係我傷害左佢阿妹，令佢無左個妹，令佢父母無左個女… 雖然已經過去左，但佢阿妹到衣刻仲係唔太願意返香港，仲係單身唔再拍拖，佢知道全都係因為佢阿妹以前受過嘅傷，佢唔知佢阿妹以後可以點面對我。如果係咁，佢阿妹更加唔會有可能係英國返黎香港…而且佢自己都唔知點面對佢阿妹，因為只要同時見到我地兩個，佢就會諗起我地曾經上過床…
另外仲有另一個最重要嘅原因，係我無同佢講真話直至佢阿妹逼我，而衣樣係佢一直都好介意嘅野。佢講過佢好重視兩個人之間坦誠嘅相處，如果佢因為咁同佢前夫離婚，咁佢無理由可以接受自己同我咁都仍然結婚，佢唔想幾年後又案發重演然後離婚收場…而衣一切明明係我都早已經知道…
如果當日我無隱瞞，主動講自己嘅過去，Cherry今日係咪會容易接受好多呢?
其實我明明知佢最介意係d咩，但我都係選擇左去搏佢唔會知，點知就真係咁唔好彩偏偏佢阿妹係我以前嘅其中一個受害者。又如果當日我講大話呃佢後就算佢阿妹無逼我我都會主動同佢坦白，今日嘅結局又會唔會唔同?
或者無人可以確實肯定，不過我相信應該都唔會，因為day1果日我都係呃左佢，而且我同佢阿妹果種尷尬亦係難以消除到… 所以無論點，由當日我同佢阿妹訓過再傷害左佢果刻起，應該其實已經註定左我同Cherry係無可能…
同Cherry分開後，我嘅心再一次死去，之後亦再遇唔到令我心動嘅女仔，然後沉淪返係夜場，穿梳於唔同嘅女人之中，甚至變本加厲玩得更放更顛，因為咁果段時間我個心先可以稍為舒服d。當然之後嘅我都只係追求一晚嘅開心而無再好似之前咁玩弄人地嘅感情。
而我都唔知係因為揮霍過度定心理影響，之後我細佬竟然慢慢變得越黎越虧，唔單只持久力越黎越短，有時竟然直程要借助藥物先至可以硬得到，連睇醫生都解決唔到。而因為衣樣野，我自尊受到好大打擊，慢慢竟然又再變成禿頭，繼而變埋肥佬，然後我再一次成為左個自閉毒撚。
之後我媽都有介紹阿敏比我識，但我地就無原本我個世界入面咁再有發展。佢見到我後好似有d驚又有d不屑我咁，之後我地都再無下文。結果我就係咁集齊左男人最痛嘅所有野下完結左衣一世。
你記住我當初不忠誠
不相信今天我愛上安定
我對著你怎保證
至夠力證明我 已是定了性
「我唔想再睇喇…」又係一個逆轉全壘打，不過係比人打，我真係唔知可以再講d咩，衣刻天上嘅我真係心灰意冷。
「真係? 但你仲有一個quota喎?」貓仙人問。
「唔喇… 睇完好似一個比一個sad咁… 到底我上一世係咪做左好多壞事?」我問。
「之前咪講過唔關好事壞事事囉… 衣個世界係有因果，但唔係關件事本身好定壞事，而只係單純有因就有果…」
「是但啦… 咁即係我衣世條命註定係咁… 就算其他世界最後咪一樣殊途同歸… 咁仲睇黎做咩?」起初我好期待自己係其他世界可以有唔同但更好嘅人生，點知最後就好似個個都比衣家更悲慘，咁繼續睇總有咩意思?
「一係咁，第五個時空，你可以選擇睇其他人嘅故事?」貓仙人見我無晒心機就提議道。
「其他人嘅故事?」聽到後我有d如夢初醒。
「無錯，咁個主角就會shift左去另一個人度，有無其他人嘅人生你會有興趣?」貓仙人饒有趣味咁問。
(其他人? Mabel阿偉阿釗Byran我都大概知佢地嘅人生，本身都過得幾好呀，佢地大部份野我都知，又無咩特別興趣喎…)
不過突然間，一個親切嘅面孔出現在係我腦海中。
(係喎…其實雖然我地做左夫妻都唔短時間，但我對佢以前嘅事都真係一無所知，佢亦唔會主動提起，而有幾次我想問佢佢都會搵機會轉移話題… 或者衣個都係一個好機會去睇下佢嘅故事…)
「我可唔可以睇下我衣家個太太李思敏嘅故事?」於是我問。
「可以，念咒啦~」貓仙人別有心意咁露出一個微笑答道。
「貓仙人醒，貓仙人勁，貓仙人無得頂，喵喵喵chance~」知道應該係最後一次，我竟然有d唔捨得，跳得仲特別落力。
強光一閃下，我見到一個女仔，一個好標緻又好可愛嘅小女孩，正企係課室前面。
「衣位同學係今個學期岩岩轉過黎我地學校嘅李思敏，以後就會同我地一齊上堂，大家一齊比d掌聲佢啦~」應該係衣班嘅班主任嘅向全班同學講道。
(衣個係阿敏? 咁瘦嘅?)