「對唔住…」第二日林志偉走左去班女同學當中好艱難咁講左衣三個字。
 
「你…講咩話?」而其他女同學就唔太敢相信林志偉會同佢地道歉。
 
「我話對唔住… 如果我以前做過d咩嚇親或者激嬲你地,我係度同你地道歉,希望你地原諒我。不過唔原諒我都唔緊要,我只係希望你地唔好因為我而排斥李思敏,可以真心同佢做朋友… 我應承你地只要你地真心對佢,我以後都唔會再咁對你地,甚至以後仲可以保護你地唔比其他人蝦你地添…」林志偉由衷咁講。雖然最後仍帶有威脅嘅意味,但就已經足夠係班上做成唔少嘅回響。
 
得到林志偉嘅道歉,班上果幾位女同學都有d飄飄然然嘅感覺,而始終都係小學生亦唔會點記仇,所以好快佢地都無再排斥阿敏,真心接納同佢做朋友,相反,仲因為覺得阿敏可以令林志偉改變而當左佢係偶像。
 
「敏敏,你到底對林志偉施左咩魔法呀?點解佢肯為你同我地道歉嘅? 唔通佢鍾意你?」熟絡左後女生就係鍾意講八掛。
 


「痴線咩! 我地普通朋友咁岩坐埋一齊先熟d咋嘛… 可能係因為我循循善誘同佢講成日靠惡同暴力識唔到真心朋友掛…」果刻雖然係咁講同咁諗,但其實一顆種子已經俏俏咁落左係阿敏心入面。雖然佢口無講,但佢都真心感激林志偉為佢做嘅野。
 
當林志偉見到阿敏成功融入左其他女仔同學堆入面,發出會心嘅笑容果陣,林志偉都覺得好開心,知道自己做左個岩嘅決定,亦無再蝦過其他女同學。不過其他男朋學就無咁好彩,一來阿敏無特別想識男同學同佢地做朋友,二來林志偉心入面似乎都潛意識唔想阿敏同其他男同學熟絡,所以佢對其他男同學仍然係咁霸道,自己仍然係無乜朋友。不過對佢黎講似乎都無咩所謂,好似有阿敏同佢傾偈就已經足夠咁。
 
只但係人總會長大同升班,而升班後阿敏亦唔會再咁岩坐林志偉旁邊甚至係同班。無左衣個朋友同寄託,林志偉好唔開心,脾氣亦變得更暴燥,更加唔平易近人。
 
「果個林志偉琴日好似又打左人比人記左個缺點喎…」就算係隔離班,阿敏都間中聽到林志偉嘅野,於是有日小息佢主動過左去搵佢。
 
「做咩又旭手打人呀? 唔係講過暴力同威嚇唔岩架咩?」阿敏問。
 


「見佢樣衰衰又寸寸貢咪一時忍唔住囉… 乜你仲會關心我架咩? 我以為你唔同我同班就唔再理我添…」明明心入面就好開心,但林志偉表面上就扮晒唔在乎,卻又酸溜溜咁講。
 
「點會唔理你呀,雖然唔同班少見左,但你都仍然係我好朋友,我點會唔理你呢? 不過如果你再係咁成日仲蝦蝦霸霸又唔真心識下其他同學仔,咁我以後可能就真係唔再理你喇…」阿敏語重心長咁講。佢係真心希望林志偉可以改左衣個脾氣同陋習,可以自己擁有一班真心嘅朋友。
 
「你敢… 唔理我…咩?」林志偉聽到阿敏講嘅野一瞬間好勞氣想大聲質問阿敏,但講到個敢字見到阿敏怒啤住佢佢又即係泄晒氣然後越講越細聲,最後仲張責備變成左疑問句。不過成間學校應該得阿敏係完全唔驚林志偉仲敢咁啤住佢。
 
「點解唔敢? 但如果你肯改我一定會一直繼續同你做朋友~」比完皮鞭阿敏又比返少少糖果林志偉。
 
「但衣家唔係同你同班我成日都同唔到你傾偈…」林志偉果然態度開始服軟。
 


敏:「咁…你平時都可以搵我架嘛~」
 
林志偉:「你衣家咁多朋友,成日有唔同女同學係你側邊點搵你喎…」
 
「咁… 一係你以後想同我傾偈就返到屋企後打比我啦。」諗左一諗阿敏提議。
 
「真係可以?」林志偉即刻好興奮同堆雀躍無晒d唔開心。
 
「嗯~」
 
於是林志偉就有左阿敏屋企嘅電話號碼,之後仲日日夜晚都會打比佢傾偈。初初阿敏其實唔expect晚晚都會咁同佢傾偈,仲覺得佢有少少煩,但一來係自己講佢想搵人傾偈可以打比自己,二來知佢無咩朋友又幫過自己,所以就唔好意思拒絕,然後慢慢就習慣左。
 
不過當佢都當左衣個係習慣後,有晚當林志偉無打比佢時佢反而會有d奇怪嘅感覺,有少少忐忑不安。
 
第二日佢就知原來係琴日林志偉放學又同人打交,學校終於忍唔住叫左佢家長黎同佢傾。其實隨住年紀漸大,有d男同學都開始發育長高又反叛,所以佢地都無再好似以前咁驚林志偉,甚至開始會反抗。因為咁,林志偉係學校同其他同學嘅摩擦都越黎越多。佢父母知道左自己個仔嘅惡行後當然好嬲,然後就成晚困左佢係房唔比佢傾電話同睇電視,所以果晚佢就打唔到比阿敏。


 
本身阿敏有少少擔心林志偉有咩事,又有少少嬲佢唔知係咪唔記得打比自己。但當第二日佢聽到林志偉又打人,佢就變左真係好嬲。
 
「你又打人! 記唔記得我講過你再係咁我就唔再理你?」佢見到林志偉後質問佢。
 
「係佢唔肯借部遊戲機我玩咋!」林志偉解釋。
 
「人地唔借你就要打人? 部機係人地嘅人地無權唔借比你?」阿敏對林志偉咆哮。
 
「佢以前唔會敢唔借架,佢琴日唔借之餘仲要同我講話以後唔會再怕我,你叫我點忍喎!」林志偉繼續狡辯。
 
「總知打人點都係唔岩! 你衣個野蠻人我以後都唔想再理你呀!」
 
於是阿敏就嬲霸霸咁走左無再理林志偉,就算夜晚佢打黎只要阿敏一聽到係佢把聲佢就會即刻cut線。
 


如是者咁樣過左兩個禮拜,林志偉真係好驚阿敏以後都唔會再睬佢,終於佢係一次放學捉住左阿敏。
 
「敏敏,我知錯喇,你原諒我唔好再唔理我啦!」林志偉帶住少少哭腔咁講。
 
「知錯? 你話我聽你做錯左d咩?」敏目無表情咁問。
 
「我激嬲左你…」林志偉一臉可憐咁對阿敏講。
 
「… 咁點解我嬲?」阿敏追問。
 
「因為我無聽你講又打人…」林志偉唔好意思咁講。
 
「所以重點係你打人,唔係唔聽我講… 唔係,聽我講都重要,但最重要係你打人… 你再係成日咁衝動又蠻不講理,遲早會出事架…」阿敏苦口婆心咁講。
 
「我真係以後都唔會喇,你原諒我啦…」林志偉再一次道歉。


 
「如果你再犯,我就真係以後都唔理你! 你今晚寫一百個忍字比我,咁我就原諒你啦~」過左兩星期其實阿敏條氣一早都已經下晒,不過佢都擔心再係咁終有一日林志偉會出事,所以就希望透過自己可以幫佢改善衣個問題。
 
第二日林志偉果然寫左100個忍字比佢,而佢亦原諒左林志偉同佢做返朋友,又繼續每晚同佢傾電話。而衣次之後,林志偉都真係聽阿敏講修心養性無再打人,凡事願意容忍,應該真係好驚再打人以後阿敏會唔再理佢。而當習慣左忍,慢慢佢嘅脾氣都收斂晒,成個人都隨和左。